السبت، ديسمبر 25، 2010

عارفه


******
عارفه

عارفه ؟

والله بقيت مش عارف

من يوم ما قابلت عيونك

وبقيت كده ليه مرتاح

خايفه ؟

انا مطمن مش خايف

قلبي انا عمره ما هيخونك

ولا يتسبب ف جراح

**

طمني قلبك وقوليله

اني ف قلبي انا راح اشيله

واسهر انا ليلي وليله

اغزل لعنيك افراح

**********************************

ع فكره

انا روحي هتفضل فاكره

يوم قابلتك ولقيتك

والقلب ف حبك داب

استني

بإرادتي وغصب عني

حبيت طيبتك وناديتك

مشتاق والشوق غلاب

**

قولي لقلبك ما يخافشي

دا اللي انا احبه ما يندمشي

وده لو قرب يلاقيني

مشتاق والحيره عذاب

************************************

حاسبي

براحه يا روحي علي قلبي

قلبي انا مش حمل عيونك

من حبك فين هيروح

شوفي

انا كان علي قلقي وخوفي

انا اخاف م النسمه عليكي

وافدي عيونك بالروح

**

طمني قلبك وقوليله

اني ف قلبي انا راح اشيله

واسهر انا ليلي وليله

اغزل ف عنيك افراح


الاثنين، نوفمبر 08، 2010

مين ده ..........؟


بدءا

لا الحال بيتغير

بعيد عنك

ولا الايام بترضى تفوت

ولا قلبي عاد يصبر

علي فراقك

وم الاشواق خلاص بيموت
*****
مين ده اللي يقدر


مين ده اللي يقدر يجرحك

هي الملايكه بتنجرح

دانا لو بايدي افرحك

اتعب سنين واسقيك فرح

***

مين ده اللي قلبه يطاوعه ده ويعمل كده

معقوله حد يبيع ملاك بالشكل ده

وف الزمان ده نلاقي فين زيك كده

ضحكة عيونك تملي كل الكون فرح

مين ده اللي يقدر يجرحك

هي الملايكه بتنجرح

***

مين ده اللي يقدر يقسى علي قلب القمر

لو في قلوب بالشكل ده تبقي حجر

دانت اللي زيك مستحيل بين البشر

دانت اللي زيك حلم م الاحلام طرح

مين ده اللي يقدر يجرحك

هي الملايكه بتنجرح

****

مين ده اللي يتحمل يشوف دمعة عنيك

دانا لو هتبكي عنيك هموت م الخوف عليك

وده مين يشوف طيبتك وميسلمش ليك

اول ما شفت عنيك لقيت قلبي انشرح

مين ده اللي يقدر يجرحك

هي الملايكه بتنجرح

انا لو بايدي افرحك

املى الحياه لعنيك فرح

الاثنين، سبتمبر 27، 2010

توووووهه

بدءا
توووووهه ..... وبتحير
وسكك بتتغير
ماشيين بأمل انما
مش مفروشالنا بورد
(ايمن بهجت قمر )
.....

الأربعاء، يوليو 14، 2010

ورا باب بلكونة الجيران




راجع وانا شوقي ماليني

واحلي حكايات بتناديني

ايام من ماضي سنيني

وزكريات من زمان

...................

***

بيتنا القديم والسطوح

وحاجات لا يمكن تروح

من قلبي وعقلي وروحي

وحبي البرئ اللي كان

ورا باب بلكونة الجيران

***

بنوته حلوه وجميله

وحكاية من ألف ليله

واسهر ليالي طويله

استني القمرا تبان

ورا باب بلكونة الجيران

***

ألمحها بطرف عيني

اجمل بنوته ف عيني

واسمع من غير ما تناديني

وعيونها تقول وانا كمان

ورا باب بلكونة الجيران

***

ورا شيش مقفول تستخبي

تتداري وتبان المحبة

وكبرنا سوا حبه حبه

وشاهده علينا البيبان

ورا باب بلكونة الجيران

***

سحر الخجل كان خاطفني

والضحكة لما تشوفني

مع قلب طيب عارفني

اجمل احساس بالامان

ورا باب بلكونة الجيران


واخير ا


احب اوضح ان بيتنا القديم كان في الأرياف

يعني حكاية بلكونة الجيران دي هناك

محض خيال (حلوه محض دي )

كمان بيتنا كان قدامه هوووو


و

بيتنا الجديد اللي قدم خلاص برضه كان قدامه هوووو

وشكرم

الاثنين، يونيو 28، 2010

اسفكسيا .................. قصة ليست بالقصيرة

خالد..............قتل
امام الماره وعلي مرأى ومسمع من الجميع قتل خالد بايدي جنديين من جنود الاحتلال الانجليزي في زمن غابر
ولا استطيع ان اصف مدي وحشية قاتليه وعنجهيتهم

خالد .... اصبح تقرير


التقرير الصادر من الطب الشرعي بإملاء من الحكومه ( بما اني اتحدث عن الاحتلال الانجليزي فبالطبع لا اقصد حكومة انجلترا)جاء ليقول " ان الشاب قتل (باسفكسيا)* الاختناق نتيجة ..................................................... "


هامــــــــــــــــــش
ـــــــــــــــــــــــــــــــ
*حاول ان تبحث معي علي معني كلمة اسفكسيا

################


خالد .................رمز

اتشحت مصر بالسواد من شرقها لغربها ومن شمالها لجنوبها ليس لان خالد بطل او قائد

ولكن لان خالد رمز .... رمز لكل منا ...رمز لكل مصري دهسته دبابات الاحتلال

وامه ايضا اصبحت رمز ..لمصر....المكلومة علي ابنائها المقتولين بـــــــــــ( الاسفكسيا)**




هامــــــــــــــــــش
ـــــــــــــــــــــــــــ


**لا تشغل نفسك بالبحث عن اسفكسيا فحتما لن تجد

#########################

خالد .................ثورة

في الاسكندرية قامت النخبة متمثلة في كل من ( سعد زغلول - احمد عرابي - مصطفي كامل -حسن البنا )

بمظاهرة كبيرة منددة بالاحتلال الانجليزي وتصرفاته الهمجيه

انتهت المظاهرة سريعا حتي يستطيع المتظاهرون ان يشاهدوا مباراة انجلترا في كأس العالم


هامـــــــــــش

ـــــــــــــــــــــــ

اسفكسيا : كلمة علمية لابد ان يطعم بها اي تقرير (مضروووب ) للطب الشرعي


##################

قامت الدنيا ولم تقعد فتحركت الحكومه مرة اخري لترسل اطباء شرعيين لاخراج الجثة وتشريحها مره اخري

ليعطي املا جديدا بتغير تقرير الاسفكسيا

هامــــــــــــــــش
ـــــــــــــــــــــــــــــ
اسفكسيا : كلمة ( ابيحه ) بمعني اسفخس عليكم يا اولاد الكلب

###################

واخيرا جاء تقرير الاطباء الغير شرعيون ليؤكد انه مات بالاسفكسيا ذاتها


هامـــــــــــــــــش

ـــــــــــــــــــــــــــــ


اسفكسيا : في المعجم الوجيز والمحيط والوسيط جاءت بمعني

( الظلم - الفساد - التزوير - الاستبداد - البلطجة - الوقاحة - القذارة - التبجح )

وكلمات اخري مشابهة

##################

نهاية الاحداث

وانتهت الاحداث دون ان تفعل النخبة اي شئ

فأحمد عرابي نفي لجزيرة هاواي

وحسن البنا اغتاله المحتل ولم يجرؤ اي طبيب ان يحاول انقاذه وهو في لحظاته الاخير في مشهد شديد المأساوية

وسعد زغلول نفي ايضا الي فرنسا لينعم بالخمور الفرنسية المعتقة ولعب القمار

اما مصطفي كامل فمازال يعاني من المرض حتي الان

واخيرا

يسقط الاحتلال الانجليزي

عاشت مصر حرة مستقلة



هامــــــــــــش

ـــــــــــــــــــــــــــــــ


كلمة اسفكسيا : هي كلمة لا تعني لي شيئا


فانا اشعر اني لا شئ


( )


فراغ عديم الفائدة




















الأربعاء، يونيو 09، 2010

عيونك ايه ...... عوده للرومانزيه


عيونك ايه

رموشك ايه

شفايفك مرسومين كده ليه

****

عيونك ليه بشوف فيهم

حنين نايم في بحر سواد ملوش اخر

بتوه انا فيه



عيونك ايه مفيش فيهم

غير السحر اللي خلى قلبي مش قادر

ياروحي عليه



عيونك دول ملايكه

ملايكه وقلبي انا محتار



خدوني ف الف سكه

ومقدرتش علي المشوار



أمانه لو ف يوم طيفي لمس قلبك

يفكر فيييييييييييه

عيونك ايه



****

رموشك ايه

سهام من نار.... وباستمرار

يشاغلوني ...كتير كده ليه



رموشك ليه

شداد قادرين ... وانا مسكين

وشبكوني ..وهعمل ايه



رموشك دول حكاية

حكاية وسحرهم جبار



يزيد شوقي وهوايا

وبحكيلهم علي الاسرار



امانه لو ف يوم طيفي لمس قلبك

يفكر فييييييييييييييه



رموشك ايه

****



شفايفك ايه

دي رقتهم

ضياع وعناد ... وباستبداد .

بتتحكم ... في قلبي انا ليه



شفايفك ليه

ف ضحكتهم

امل من نور .... وبدر بدور

بيتبسم .... بسحر عنيه



شفايف ايه دي جنه

دي جنة وجمرتين من نار



وانا عاشق وبتمني

وبحلم بيكي ليل ونهار



امانه لو ف يوم طيفي لمس قلبك

يولع فيييييييييييييييييييييه



عيونك اايه

رموشك ايه

شفايفك مرسومين كده ليه













الجمعة، مايو 28، 2010

انا ..........والعياذ بالله من قولة انا

بدءاً

ونتواعد

نعيش العمر بس لبعض
وحب قلوبنا يملي الارض
ولا هيبعدنا شئ عن بعض

و نتباعد

ياريتنا لحقنا قربنا
يا ريتنا ما كنا قربنا
ولا عشقنا وجربنا

ونتعاند

ومهما نكون بنتوجع
بنحلف عمرنا ما نرجع
ولا هنشوف ولا هنسمع

وبس لوحدي بتألم
ولا بنسي
ولا اتعلم

************************************
بعد البدء

قبل ما اتكلم في بوست النهارده
عندي كلمتين بس للدكتور ياسر عمر عبد الفتاح
ردا علي تعليقه ع البوست اللي فات

بالنسبه للاشتغاله
اكيد كدب طبعا
امال هو في اشتغاله صدق
طبعا كذب
لكن عشان تعرف انه احيانا بيبقي للكدب غرض
او لازمه اقرا البوست ده عند كريم ( شاب فقري )
وهتفهم قصدي جداااااااااااا

إلى كل مدوني الأرض

****************************************



***************************
نيجي بقي للتخارف






هتلفي كل الكــــــــون بعدي وهترجعي تاني
ولو لقيتي واحــــــــــــد زيي يـيجي يتحداني
دانا اللي زيي يادوب واحــــد ومفيش له تاني
وانا اللي يعرفني ف مره لا يمكن ينساااااني
مانا
انا
انا
انا الوحيد اللي بيكتب في عنيك اشعار
وانا الوحيد اللي مكنتش هربان م التار
وانا الوحـــيد اللي مريش وحدايا حمار
وانا اللي لما اتكلم جــــــد تقول دا هزار


وانا الوحيد اللي مهندس ومعايا دبلوم
وانا الوحــــيد اللي مسافر ومن الفيوم
وانا الوحيد اللي ببلبط ف الترعه واعوم
وانا اللي نص اسناني واقعه وما بكلشي لحوم


انا اللي يا ما اتحنـــــــجلك ومشيت عالحيط
وانا اللي طول الـــــــــــيوم واقف قدام البيت
وانا الوحـــــــــــيد اللي اتجنن وعملت عبيط
وانا اللي حالف ما هســـــــيبك لو حتي هموت


انا الوحيد اللي بحــــــــــــــــبك زي المجنون
وانا اللي طــــــــول الليل قاعد جمب التليفون
وانا اللي لوخدني الاهلي راح اجيب ميت جون
وانا اللي اخــــــــــرته وياكي هتبقي الكراكون


وانا الوحيد اللي اتجــــــــــــند ومخلص جيش
وانا اللي من عيله كبيره وجوز خالتي شاويش
وانا اللي ليا ياناس واســطه في طابونة العيش

وانا اللي معرفتش اكمل ( البوست )
وهقضيها تطنيش





الأحد، مايو 16، 2010

الطريق الي عتليت .......

في البدايه



المفروض بوست النهارده كان عشان اقول ان البوست اللي فات



كان مجرد اشتغاله او فكره مجنونه او تخاريف من تخاريفي



ويمكن كان الغرض منه اني اقول



اننا كلنا في عالم التدوين نعرف بعض



في ناس نعرفهم كويس وبنحبهم



وبنعرف بعض تفاصيل حياتهم



مصدقينهم في عالم كداب



وبنحس بيهم في عالم خيالي



وبنشاركهم في عالم افتراضي



الحاله غريبه بس جميله



لان محدش بيفكر اللي قدامه ده بيكدب والا صادق المهم اللي بيكتبه



كمان انا متأكد انه محدش يفرق معاه اللي بيكتب ده شهادته ايه وللا عايش فين



هي دي الحكايه كمان حبيت اهزر معاكم


انا سعيد بالناس اللي مصدقوش عشان حسيت انهم قريبين مني

وسعيد باللي صدقوا عشان عرفت اشتغلهم



ولا ايييييييييييييييييييييييييييييه






******************************









المهم



ميموتش حق وراه مطالب



دا اللي اتعلمناه من صغرنا



لكن للاسف حكوماتنا ما اتعلمتش



دي دعوه اطلقتها د / ستيته



اننا نطالب بحق اسرانا اللي قتلوهم اليهود بوحشيه



وده الموضوع



الجزء الاول

http://www.youtube.com/watch?v=Jkuk2RAR9VI&feature=fvst


الجزء الثاني


للا سف النت عندي مرضيش يجيبه فيديو فاضطريت اجيب الروابط


******




وزي ما كان واجب علي اني انشر الموضوع




واجب عليكم انكم تنشروه




انا هختار بعض الناس وهعملهم تاج ياريت مايكسفونيش




وينشروه بحيث ان الموضوع يتنشر علي اكترؤ عدد ممكن من المدونات







اللي عليهم الواجب




د/ عصام ..... احوال الهوي




م / محمد محتار ( ميحو ) .... رحيق الحياه




أ / كريم ............ شاب فقري




م / موجه ........... بين السماء والارض




أ / رانيا .........ليس فقيرا من يحب




د/ منارفايد ............شباك موارب




أ/ كيكي ............فكك مني ( حلوه استاذه دي .... اي حدمه )




well ............ كشكول 100 ورقه




كيارا ......... عالم مولان


جودي ..........علي جناح يمامه




واخيرا اي حد يقدر ينشر الموضوع







تحياتي للجميع
















السبت، مايو 15، 2010

اعترافات ........... ليلية


لاول مره هكتب كده هنا علي طول من غير ما اجهز مسوده
لاني عايز الكلام يطلع من قلبي دوغري عالكيبورد اللي حروفها طايره دي
عايز اريح ضميري واعترف بالسر اللي شايله ف قلبي بقالي سنه ونص
لاني كلها شهرين وكام يوم واخلص اللي انا في واحتمال اختفي
زي ناس كتير اختفوا ومعدناش بنشوفهم
هما سابوا زكري طيبه وحبيناهم لكن انا مش عارف انا هسيب ايه
فعشان كده هعترف واقول الحقيقه واريح ضميري
الحقيقه ان انا
انا
انا كداااااااااااب
اوه كدااااااب
بقالي سنه ونص بكدب عليكم
اوهمتكم اني اسمي محمد علي
والحقيقه انا اسمي مش كده خالص
قلتلكم اني مهندس معماري وانا مش كده
وكمان مش شغال ف السعوديه زي ما كلكم تعرفوا عني
انا عمري ما شفت السعوديه حتي ف التلفزيون

انا كدبت
وانتوا صدقتوا
حد هيقولي انت كدبت ليه
هقول كدبت عشان كان نفسي ابقي واحد منكم
كان نفسي ابقي زيكم
تفتكروا كنتوا هتتقبلوني ف وسطكم لو عرفتوا
اني معايا دبلون صنايع قسم جرارات الكترونيه
واني ف الجيش وقاعد علي كمبيوتر
عشان قسم الجرارت الالكترونيه ديه افتكروني بفهم ف الكمبيوتر
فمسكوني الكمبيوتر هنا ف الاداره الهندسيه
في العباسيه

خفت ما تقبلونيش وسطكم وانتوا كلكم مهندسين
واساتذه ودكاترا واطباء ومحامين
فاخترعت الكدبه دي

اه
مهو النت ده عالم خيالي وبما انه خيالي
انا اتخيلتني مهندس وعشت القصه دي
واتخيلت كل حاجه قلتها عني هنا

سامحوني

كمان انا عمري ما كتبت شعر
ولا عمري رسمت

وكل دي حاجات سارقها من عالنت
ومن اصحابي
استمتعت بمعرفتكم جدا
وسعدت طول الفتره اللي فاتت

سامحوني
مش هقدر اقول ياريت تفتكروني بكل خير

تصبحوا ع خير
ارجوكم علقوا بس من غير شتيمه
انا هتقبل اي نقد
بس بادب
بلاش شتيمه


امضاء
من العباسية
اللي مش محمد علي
دبلون زراعه قسم دوده القطن

الاثنين، مايو 03، 2010

لما قالت ...............من دفاتري القديمه



بدأ

اه لو عرفت اللي جرالي
وازاي ف بعدك بقي حالي
كانت عنيك حنت ليا
وقلبك كمان رق وجالي
مانت الحياه بالنسبالي

******

دي حاجه رومانزيه كنت كاتبها وانا ف مصر
اهو نفتكر معاكم


***

لما قالت

لما قالت
انت عمري
واغلي حاجه
وروحي فيك

وانه صعب
تلاقي زيي
حد يتجنن عليك

يومها قلت انا مش اناني
ومش مكاني
قلبها

سهل تبقي لحد تاني
ومش بايدي اوصلها


**
هي قصه ف الف ليله
حلوه لكن مستحيله
هي حلم حلمت بيه

هي شوقنا اللي ف عنينا
هي احساس بينادينا
هي بحر غرقت فيه

*******

لما قالت
انه ممكن
ييجي يوم
والقاك هنا

وانه مش صعب
الليالي
في يوم تحقق
حلمنا

قلت ممكن
بس مش لازم
ف يوم
ننسي الحقيقه

اللي بيني وبينك انت
يدوب كده
احلام بريئه

**
هي جرح وغصب عني
كان بعيد بقي جوه مني
هي ايه كده ولا ايه

هي سهله ومستحيله
هي كلمة مالي حيله
ومش بايدي واعمل ايه


وايييييييييييييييييييييييييييييييييييييه




السبت، أبريل 24، 2010

إعلانات مبــــــــــــــــــــــوبة


للبيـــــع
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

مدونة للبيع
ــــــــــــــــ

بما اني بقالي فتره كبيره مش عارف اكتب ولا اقرأ اي حاجه فقررت ابيع المدونه
واللي مواصفاتها كالتالي

لاعلي سعر
مدونه مصريه ترفيهيه ثقافيه مهلبيه ميه ميه
مدونه فاخره ساخره زاخره باخره
مدونة بسيطه حويطه غويطه عبيطه

مدونة تخاريف ابو االعريف مدونه شرحه وبرحه وتحتوي علي الكثير من التخاريف
فاتحه علي البحري وقريبه من المواصلات
احلي جيران حيث يحدها من الشمال شاب فقري ومن الجنوب كيكي عووووووووووووووووووو
ومن الشرق احوال الهوي وتخاريف ايوشه وعالم مولان ومن الغرب مش عارفه بس نفسي اعرف
والشارع كله مدونات جامده بصو كده عالشمال

والمفاهمه مع البواب


حلم للبيع
ـــــــــــــ
لعدم الجدوى والجديه ولظروف السفر حلم للبيع
حلم بسيط وصغير وبرئ ولسه جديد استعمال مهندس
مقاس small بس للي عنده استعداد يكافح عشان حلمه
حلم مهوش مستحيل بس صاحبه نفسه اتقطع


مطلوب
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

مطلوب عروسه
ـــــــــــــــــــــــــــــ
مطلوب عروسه ( ليا انا طبعا ) بالمواصفات التاليه
- قصننه
- مجنونه
- بتعرف تقشر برتقان
- بتلبس كوتشيات

من يجد فيه المواصفات فليتفضل بارسال ( cv ) وصورتين 6*9
علي العنوان التالي
( السعوديه - الدور الثاني )
ملحوظه : -
لا يشترط الخبـــــــــــــــــــره


وظائف خاليه
___________________________________________

مطلوب فورا

مدرب للاهلي
_______

اي حد ان شاء الله حتي اي وزه علي راي عبله كامل
اهو اي حد والسلام عشان نستريح من حسام البدري ده


رئيس جمهوريه
________

مطلوب رئيس جمهوريه معاه عصايه سحريه
تقدر تغير حال البلد تقدر تقضي عالفساد تقدر توحد الناس وتلمهم حواليه
تقدر تصلح الاقتصاد والتعليم والصحه والنقل والمواصلات
تقدر تتقدم بينا او باي حد المهم تتقدم
تقدر ترفع اسم البلد
تقدر تعيشنا ف حريه من غير طوارئ ولا تعذيب
تقدر تحل مشاكلنا من فقر لبطاله لجهل لمرض
كفايه كده احسن تعبت اكيد كلكم عارفين الباقي

ملحوظه :-
يشترط خبره لا تقل عن 30 سنه


الأربعاء، مارس 10، 2010

....................................قصيره جدا


بدءا
أحبته .. وكتبت علي قلبه .. هذا ملك لي
فاهداها اياه وقال " اما انا فلست لأحد "
( محمود عبد الغفار )

دي جمله من شعر صديق
انا شايفها قصه قصيره جدا
استفزتني اني احاول
وادي المحاولات


****
(1)

قالت ان توقف ساعة يدها افسد نظام حياتها
فلم تعد تشعر بالوقت ... ثم تذكرت انها لم تحمل ساعة يد قط


(2)

لنقترب قليلا ونظل معا بعض الوقت
فأحيانا اود ان أدرك قيمة أن أكون وحيدا


(3)

كتبت قصتها معه ..وسردت أحداثها ببراعه
كيف بدأت .. وكيف كان طول الوقت هو المتحكم في الاحداث
اعجبت بما كتبت ... فنشرتها بتوقيعه


(4)

انتظرته طويلا ...وظلت تحلم بعودتة
فلما عاد ...افتقدت لذة الانتظار


(5)

أعجب بكونه يحتل الترتيب الثاني فيمن احبتهم
وحده يعرف من كان قبله .. ومن جاء بعده
فهي لم تخفي شيئا عنه
وهنا ادرك .. انه الوحيد الذي لم تحبه يوما



(6)

جلست امام صورته تتأملها بحزن
تزكرت كيف كان جميلا .. كيف كان حنونا
كيف كان رائعا... نزلت دمعه علي خدها
.
.
جاءها صوته من خارج الغرفه
" فين الجزمه البني يا حبيبتي "

ردت ببرود " عندك ف الضلفه الشمال "







الجمعة، فبراير 05، 2010

هبطل الســـجاير


نفسي ابطل السجاير واكون انسان جديد

بس ما اقدرش اوعد بموضوع الحديد ده عشان خلاص يناير عدي

طبعا الموضوع محتاجله شوية اراده قويه

علي شوية اصرار وحبة عزيمه وتحدي

وطبعا الحكايه مش حكاية نيكوتين او قطران

وكلام من ده

الموضوع موضوع تعود


يعني مثلا الواحد بيتعود انه دايما في حاجه محشوره بين صوابعه

او بين شفايفه طول الوقت

وبعدين مين يقدر يقاوم فكرة انه ينفخخخخخخخخخخخخخ

الله علي شكل الكلام وصوتك وهو خارج مختلط

بالدخان القرمزي ( عمرك شفت دخان قرمزي )

( ثم هو ايه اللون القرمزي ده اصلا )

واللي بيرسم خطوط افكارك قبل ما تتلاشي

في سماء الغرفه ( علي اساس انه مفيش سقف )



لأ والولاعه

انا مقدرش اتخيل حياتي بدون ولاعة

وافرض حبيت اولع روما بحالها

اعمل ايه

اقول والنبي ناولوني الولاعه ما ولاعتي في جيبي واديها


طبعا غير برستيج العلبة المارلبورو جمب الموبايل والمفاتيح

تبقي عامله احلي شغل ف القعده

حتي لو اللي جواها سجاير كلوباطره او حتي فررررط



طبعا احساسك وانت خرمان ومعاكش سجاير

وييجي واحد يحييك بسوجاره احساس لا يمكن وصفه

اوعىىىىىىىىىىىىىىى

وللا في رمضان بقي وانت قاعد مش طايق كلمه من حد

وبتخانق ف طوب الارض

اصلك خرماااااااااااااااااااان



نفسي ابطل السجاير واكون انسان جوديد يا جدعان

بس المشكله مش في الاراده ولا الاصرار موجودين الحمد لله

المشكله اني مش بشرب سجايراصلا

مش بدخخخخخخخخخخخخخخن من اصله

طاب ابطلها ازاي

*****

اللي عايز اقوله من التهييس اللي فوق ده

ان الواحد فيه حاجات كتيره بيعملها

وبيبقي عارف انها غلط ومش بيحاول يغيرها

لانه اتعود عليها

انا كمان في سلبيات كتيره قوي عندي

منها اللي قدرت احط ايدي عليها وبحاول اغيرها

وساعات بنجح وساعات لا

ومنها اللي مش شايفها

وبستني حد قريب مني يدلني عليها