الثلاثاء، مارس 31، 2009

التدبيس في تاج جودي النفيس


اولااحب اشكر جــــــودي علي التدبيسه دي

يعني اللي يخاف من تاج يلبسه

واحب اقول ان ده اول تاج جالي

وان شاء الله يكون الاخير

نرد بقي

استعنا عالشقا بالله

****

اسمك....؟

محـــمد علي ( ومحدش يقول محمد علي باشا ولا كلاي ولا الكبير)

المشهور بيه وسط اصحابك..؟

محمد برضه وفيه ناس بتقولي ( ابو علي ) مش عارف ليه

سنك...؟

يوم 30 مارس اللي فات كملت 27 سنه

مجال دراستك ؟

هندسة معماريه

اسم مدونتك ..؟

تخاريف ابو العريف

عندي مدونه تانيه مش هقولكو عليها

الصوره الرمزيه لمدونتك بتعبر عن ايه ...؟

ما بتعبرش عن حاجه ... انا حر احط الصوره اللي انا عايزها حد عنده اعتراض

بس هي عباره عن كلمة تخاريف من الشمال لليمين بخط ايدي طبعا

وفي الخلفيه عنين بتبص علي الحاجات اللي بحبها ومنها

( ابو تريكه -علم مصر -احمد اخويا )

ولوحة انسياب الحواس لسلفادور دالي

حد خد باله من حاجه من دووول

هل فكرت في اغلاق المدونه ؟ والسبب ..؟

طبعا

ونفذت كمان

دي مش مدونتي الاولي

لاني ما كنتش راضي عن الاولا نيه فغيرتها

وبعدين ان حد ملول بيزهق بسرعه

ولو حسيت ان معنديش اللي اقوله هولع في المدونه عادي يعني

تاني حاجه

حاجه (exclusive) عشان خاطر جودي

انا قررت اقفل مدونتي التانيه اللي قولتلكو عليها او علي الاقل اجمدها لحد ما اشوفلها حل

ودا لان بقي دمها تقيل وانا مقصر مش قادر اديها حقها

حد سأل علي اسمها



ايه رد فعلك لو حد قل ادبه عليك في تعليق ...؟

هو اولا دا ما حصلش واتمني انه ما يحصلش

بس انا غالبا هحذف التعليق لو هو مزود قلة الادب

او هقول نو كومنت زي بتوع السيما لو مش مزودها قوي


اسوء مدونه...؟

المدونات الكويسه هي اللي بتعلق مع الواحد

لكن العكس مش بيحصل


هيحصل ايه للايميل بتاعك لما تموت...؟

ما يولع اعمله ايه

ههههههههههههههه

انا هبقي فاضي للاميل


اديت الباسوورد بتاعك لحد ...؟

ييييييييييييييييه

نص مصر تقريبا معاها الباسوورد

لانه كان تاريخ ميلادي و نص اصحابي كانو عارفينه

وكمان مره اتسرق اد شهر كده وما كنتش بفتحه ساعتها ولما رجع لقيته مشتركلي

في منتديات امة لا اله الا الله

بس كان لازم احتفظ بيه لانه مع كل اصحابي حتي اللي بره مصر


السفر بالنسبالك ايه ...؟

ليه بس الاسأله اللي بتيجي الوجع دي

السفر.........غربه

وتجربه انا عايشها ..اكيد استفدت منها كتييير

في السفر سبع فوائد اول فايده انك ما تفكرش تسافر تاني


المود بتاعك ؟

دلوقت طول الوقت الواحد بيحس بحنين لكل حاجه في مصر

بتعمل ايه في وقت فراعك..؟

حاليا النت والتلفزيون لو فيه ماتش ولا حاجه

الاول . القراءه . والرسم . و الرغي مع اصحابي

كنت بحب قوي اقفل اوضتي علي واقعد اقرا في مجلة العربي والدستوور


الأكلة المفضله

انا مش اكيل قوي يعني ما عنديش حاجه مفضله

بس عندي لسته حاجات مش مفضله رغم اني باكلها عادي


الصفات اللي ورثتها عن والدك.؟

عارفين الجملة بتاعة ( اتقي شر الحليم اذا غضب ) اهي هي دي


الصفات اللي ورثتها عن والدتك ..؟

اي حاجه حلوه فيه تبقي منها

وخاصة الحنيه حكم انا حونين قوي


اكتر ست حاجات بتكرهها...؟

مش عارف هو اشمعني سته يعني

هههههههههه

الكدب

الخيانه

الناس اللي بوشين

( كده يبقي اربعه افتكر اللي اتنين وابقي اقولهم )


اكتر ست حاجات بتحبها...؟

اهلي

والكلمه دي يندرج تحتها حاجات كتير قوي منها

( روان -رقيه - عيلتي -اهلي - اصحابي - وحبايبي )


شخصيتك نوعها ايه....؟

( نوكيا وحش النص اللي هي بني برباط دي )

مش عارف بس انا حد هادي جدا

بحاول ابقي اجتماعي وايجابي اكتر من كده


لماذا دخلت عالم التدوين ...؟

طبعا لاني بحب اخرف كتيير فقلت الناس تشوف تخاريفي

والحقيقه انا كنت بسمع عن المدونات لكن اول مره كده اتكعبلت في مدونة ميوشه


وقريت البوست عجبني جدااا

ومنها الي العالم اللي بقي فيه ناس كتير جدا بعتبرهم اصحابي مع اني معرفش ولا حد فيهم

وبحبهم وبحترمهم جدااااا


اجمل كلمه اتقالت في وصف مدونتك.....؟

هي اي كلمه بتتقال بتسعدني جدااا

لكن فيه موقف حصل فرحت بيه قوي

ودا لما نزلت البوست بتاع عيد ميلاد روان وكنت حاطط صورة دبدوب كده هديه ليها

ومره وهي خارجه مع مامتها وفجأه مامتها لقيتها بتشدها عند محل وبتوريها الدبدوب

وتقولها دا الدبدوب اللي عمو محمد جابهولي وطبعا شبطت فيه وما مشيتش الا لما جابته

ولحد دلوقت مصره انا انا اللي جبته مش مامتها


أهمية التعليق بالنسبه ليك ؟

اي تعليق بيسعدني جداااا

وفيه ناس تعليقاتها بتهمني جدااااوببقي قاعد مستنيها


احسن بوست كتبته ....؟

هو انا كل اللي كتبتهم 9 بوست ودا العاشر

وطبعا ما فيهمش حاجه تقدر تقول عليها احس بوست كلهم عاديين جدا

بس فيه بوست انا بحبه قوي ودا طبعا اللي كان في عيد ميلاد روان



افضل بوست قرأته ...؟

كتييييييير..كل الناس اللي موجوده عندي في البلاك ليست (الحته الشمال يعني )

عندهم بوستات جامده جدا مقدرش احدد حد بعينه

بس مش هنسي البوست بتاع

مها لما اتشفطت قعدت اضحك كتيير جداا
كمان البوستات اللي سرقتها لما كنت حرامي

( مدونة امسك حرامي )

تمرر التاج لمين...؟

هو انا كان نفسي امرره لحد بحبه جدا بس هو اعتذر

وبما ان التاج دا تدبيسه يعني فانا نفسي ادبس ناس كتيير

ودا لاني بحبهم

بس انا همرره لاي حد ما وصلوش التاج في الناس اللي علي الشمال دي

**********
تحديث صغير كده وابن ناس
******
بما اني كنت بهدي التاج ده للناس اللي علي الشمال
وبعدين لقيت كل واحد بيعدي مخبي وشه وعامل مش واخد باله
قلت الكلام العايم دا ما ينفعش لا انا لازم احدد وبالاسم والعنوان كمان
بس عارفين اي حد هيكسفني ومش هيجاوب عليه
طبعا انتو عارفين اني كنت حرامي ولسه تايب قريب
ومستعد ارجع للاجرام تاني
ودول اللي الخلق اللي بيهديلهم التاااج
- مهـــــا زين
( انت اللي جبتي دا كله لنفسك )
- امينه
( موني ولا تزعلي ) اوعي تقولي لعمووووو لأ
-ميوشه
( لو ما عرفتيش تجاوبي غشي من اللي جمبك وما تبقيش فاشله )
- عتلم
( انا عارف ان مدونتك ملهاش في الجو ده بس اعملها وجاوب وليك مني هديه قيمه - صينية بطاطس )
_ منوش
( لو ما جاوبتيش هقتل تشفيده وابقي شوفي هتكملي ازاي )
- م/ احمد الضايع
( انا بقي عايز اعرف الاقيك )
- موجه
( اوعي تكسفيني ازعل قوي )
-افنان
(جاوبي يا فنونه)
-بس خلاص
( هما فعلا مافيش حد تاني بس هي اسمها كده....ولا يهمك )
اخيرا

اسف اني طولت

الجمعة، مارس 27، 2009

الحياه بقي لونها ............بطاطس

فاكرررررررررررررررررررين البطاطس
اللي انا من كام يوم حطيتها في الفرن
( ايه مش فاكريييين)
ولا انا
انا اساسا مكنتش عايز اعرفكم مصيرها المشؤم بس انتو اللي اصريتوا
( هنكدب من اولها هو حد عبرك )
انا كنت اخر حاجه قولتها اني حطيت البطاطس في الفرن
**************
نكمل بقي
****
بعد ما حطيتها في الفرن
كل خمس دقايق اروح اتطمن علي البطاطس
عدي خمس دقايق
ربع ساعه
بس ما فيش حاجه حصلت
نص ساعه
ساعه
ان حاجه تحصل
ابدا
ساعه ونص
مافيش اي تغيرات كيميائيه ولا فيزيائيه
ولا حتي فسيولوجيه حصلت للبطاطس
اعمل ايه انا في صاحبي اللي عملت برررم وعزمته علي الغداء
لا هو يستني بقي ونخليها عشاء
وفعلا اتصلت بيه وخليتها عشاء
ودلوقت
ما قداميش غير كيمو هي اللي هتنقذني كالعاده
( هي ممكن تضربني بحاجه في وشي عبر الموبايل بس اكله تفوت ولا حد يموت )
انا : الووووووو كيمو الحقيني
كيمو : ايه يا فالح ناوي تعمل سلطه وعايز مساعده
ولا عايز تسخن العيش ومش عارف
انا : لا يا كيمو انت فاكره البطاطس اللي كنا بنعملها
هي بتاخد كام يوم علي ما تستوي
كيمو : نعم كام ايه .. انت بتستهبل هي نص ساعه لو البوتاجاز بيشحت
شوف ياااد يمكن انبوبة الغاز فضيت
انا : لا انا لسه مغيرها امبارح
كيمو : طاب والصينيه سخنت ولا ايه ظروفها
انا : معرفش وانا ايه اللي عرفني انا ماسكها بالفوطه من قبل ما احطها في الفرن اساسا
كيمو : اوعي ياد تكون نسيت تولع البوتجاااز
انا : لا ولعته والنار بتاعته اد كده
دانا حتي مولع الاربع عيون عشان تستوي بسرعه
كيمو : مولع ايه ....؟
عيون ايه .... انت مش مولع الفرن
انا : ايه داه هو الفرن بيولع
(طبعا ما فيش داعي تعرفوا اللي هي قالتهولي
ايه واحده بتهزق اخوها الصغير
لازم يعني تعرفو قالتله ايه )
وساعه علي ما عرفت اولع الفرن
طبعا حطيت الصينيه وعملت زي ما كيمو قالتلي
استني بقي عليها ربع ساعه ولا حاجه ما تقعدش علي باب الفرن
قلت اشوفلي حته من الماتش اللي كان لسه بيبدأ لحد ما الصينيه تستوي
ولما ييجي عن الدقيقه 15 ابقي ابص عالصينيه
الحقيقه كان ماتش هايل
الاهلي والمصري
والمصري بهدلنا يومها واتهزمنا( 2-صفر )
والواحد نفساويته اتسدت وكنت مولع من جوه
لدرجة اني من كتر الولعه شميت ريحة شياااااط
ايه ......... الصينيه
دانا كنت بعمل بطاطس
يا لهوووووووووووي انا نسيتها
مدة شوطين بالاضافه للوقت المحسوب بدل الضائع
هعمل ايه في صاحبي اللي جاي يتعشي معايا
بسيطه هتصل بيه يجيب عشاء معاه وهو جاي
( ودا مصير اي حد يفكر اني ممكن اعزمه في يووووم )
*******************
طبعا انا مش هقولكم انا طلعت الصينيه لقيتها عامله ازاااي
واللي يعرف يا ريت يقولي
او يتصل عالمطافي
************
ولحد ما تفكرو في الاجابه
وبمناسبة الاكل
انا اول ما جيت السعوديه كنت مش متظبط في الاكل وكنت بحلم بالاكل المصري
كان نفسي في الفول والكشري والذي منه
فكتبت حاجه كده
بس بعد كده اكتشفت ان كله موجووووووووود
وجاري البحث عن المش
واليكم التخاريف
************
يابلد مافيهاش عربية فول
ولا علبة كشري ترد الروح
اول ما تجوع روح كده علي طول
هتلاقي الكبسه منين ما تروح
لا محل عصير
ولا حتي فطير
ولا مسمط م اللي راويحة تفوح
اكل ( معصوب ) انا بتعصب
واضرب ( مقلوبه ) حالي يتشقلب
وان جيت اطبق ( بمطبق)
يطبق علي نفسي وروحي تروح
يا مانفسي ياناس .. اتغدي سجوووق
وكبده تلوث م اللي في مصر
واقف في طابور عيش كده ..مزنوووق
م الصبح لغاية بعد العصر
*********

الأربعاء، مارس 25، 2009

SMS


لو عايز تبعد يا حبيبي وخايف ...تجرحني

وحياتي لتبعد يا حبيبي ارجوك ...ريحني

دا بعادك ارحــــــــــم من قربك

طول مانا ما بقيتش حبيب قلبك

ما بقيتش حبيبك قول طاب ليه ...قاعد مستني

هتحمل بعدك ابعد بقى ..عن قلبي وسيبني

الثلاثاء، مارس 24، 2009

ما بين جفنك والورق

دي بقي تصبيره لحد ما البطاطس تخرج من الفرن ونشوف عملت ايه
ودي قصيده لصديقي الشاعر الجميل
محمود عبد الغفار
*****************************
مابين جفنك والورق

**************

ما بين جفنك والورق
يحلو الأرق

ويهيم قلبي في فضاء ساكن

ومدى وديع كالشفق

وسفينتي

مكسورة المجداف فاقدة الطرق

ترجو الغرق

ما بين جفنك والورق

يحلو الأرق

ويتوه قلبي في فضاء واسع

لا ينتهي فيه مدى

وأهيم فيه بلا هدى

أرجو خيالك مرشدا

ومتي استغيث يجيبني

ضحك الصدى

ما بين جفنك والورق

يحلو الأرق

**************************************

يا ريت ترجع تكتب تاني يا محمود


الثلاثاء، مارس 17، 2009

يووووم ...في المطبخ ......(1)

السلام عليكم
لموضوع بتاع النهارده عشان الناس اللي ملهاش ف الطبيخ زيي
لكن لو حد بيعرف يطبخ بلاش يقرا
لانه مش هيستفيد حاحه
اما اللي ما بيعرفووووش 
اكيد هيستفيدوووو ا كتيييير

الحقيقه انا طول عمري علاقني بالمطبخ كمكان كانت لا تتعدي
اني بس كنت احب اسرق اللحمة من الحلل 
او بما ان شكلي اللي يشوفه لازم يقول علي هفتان وجعان وصدمان
فاصعب عليه ويروح مسلكلي حتتين لحمه كده ف الخباثة
ومن علي وش القفص كمان

اما علاقتي بالطبيخ نفسه فكانت علاقه غير مسبوقه
كنت كل ميت سنه لما اتزنق وافكر اعمل اي اكله 
وكان مصيرها يا اما تترمي
يا تترمي برضه
او ان كان  حد من اصحابي موجود وفكرت انتقم منه ولا حاجه
غير كده ماكنش ليه اي صله بالطبيخ

لكن بعد ما سافرت كان لازم اعتمد علي نفسي في موضوع الاكل ده
وبالفعل  في الاول اعتمدت علي نفسي
كنت كل يوم اتغدي في المطعم اللي قريب من الموقع
واخد عشاء وانا مروح
لحد ما واحد صاحبي مغترب زيي كده بيكلمني وبيطمن علي موضوع الاكل
ده فقلتله تني مقضيها مطاااااعم
قالي " يا ابني اعمل زيي كل ما ا تزنق 
اجيب شوية بطاطس علي طماطم علي بصل وتبقي صينية بطاطس
ما فيش اسهل من كده
- ايه داااااااه دا الموضوع سهل اهو امال انا كنت مصعب الامور ليه كده
وعنها ونزلت السوق
اشتريت حاجات تكفيني 3 سنين علي اساس اني هطبخ كل يوم بقي
مكنتش اعرف انها مره ومش هتتكرر وهضطر افتح
سوق خضار عندي في الموقع عشان ابيع الحاجات اللي اشتريتها زياده دي
واهو منه شغل ومنه تجاره
( ودا اول درس   هتتعلموه مني لو ما بتعرفوش تطبخوا )


جهزت نفسي ورحت لابس البالطو والطربوش والشورت والفانله والكاب
وجهزت عدة الطبخ
ورحت محضر صينيه كبيره ورحت حاطط البصل والبطاطس والطماطم فيها و.....
وو......................
وبعدين ...... اعمل ايه بعد كده
انا مش عارف اعمل ايه
-اه ما فيش غير اختي كيمو اللي هتنقذني
( ودا تاني درس .....لازم يكون ليك اخت اسمها كيمو تساعدك لما تحتااس )

- الوووووووو....كيمو  ازيك يا حبيبتي باختصار شديد انا بطبخ ومحتاج منك شوية مساعده كده
بس بسرعه والنبي عشان الفاتوره بتيجي نار
( ودي درس كمان ... لازم يكون تليفونك خط مش كارت احسن الرصيد يخلص والطبخه تبوظ)
- كيمو :  معقول يا حبيبي هتطبخ ..يا عيني ؟!!!
قولي هتطبخ ايه ووصلت لحد فين
انا : اه انا هعمل صينية بطاطس
كيمو : صينية بطاطس مره واحده
انا : ايه ده هي المقادير كتيره انا ممكن اقسمهم علي مرتين
كيمو : لا يا حبيبي مش قصدي بس قولي وصلت لحد فين
انا  : انا حطيت البطاطس والطماطم والبصل في الصينيه  اعمل ايه بعد كده ؟ 
كيمو   : حطهم بقي في الفرن
انا : في الفرن ......!! علي طول كده طاب ما الطبيخ سهل اهو امال انا كنت بقول صعب ليه 
 كيمو  : علي طول ازاي
انا : من غير زيت ولا سمن ولا بهارات والحاجات الغريبه دي
كيمو  : استني ياد يا محمد  انت مش حاطط سمنه او زيت
انا  :  لأ وبعدين البطاطس شكلها مبعجره قوي  والبصل ليه ورق ناشف كده
وكمان الطماطم فيها حاجات خضره طالعه من نص الحبايه كده ودا من ايه بقي يا كيمو
كيموو :  ايه داااااه  انت حاططهم زي ما هما استني يااااااد
انت لازم الاول يا حبيبي تقشر البطاطس والبصل وتقطعهم طرنشات وتحط زيت او سمن وترصهم فـ...........
انا  : استني  ....استني   اقشر البطاطس  دي عارفها بس ايه علاقة المجاري باللي احنا فيه ده
اه ولا انت قصدك علي حفر القواعد المنفصله للاسوار
كيمو  :  استني استني   ايه بس اللي بتقوله دا يظهر الشغل لحس دماغك
انا اقصد اعملهم حلقات
انا :  حلقات  وابقي اقعد اتفرج عليهم في رمضان ولا ايه
طاب اعملهم كام حلقه 30 ولا اعمل حساب يومين العيد معايا ؟ !!!
كيمو  : يا ابني اقصد دوايييييير
انا  : اه دواير طاب استني هدخل اجيب البرجل وجاي
كيمو  :  برجل ايه انت هتتجنني  ايه ما عندكش سكينه 
انا    سكينه .....! مش عارف هدخل اشوف العده اللي حوه دي
طاب تنفع سنجه   او ساطور ولا اجيب شفرة الحلاقه
اقولك فيه مسدس صوت
ولا اي حاجه من عده الخناقات اللي جوه دي
كيمو  :  مسدس ايه انت هتقتلهم  بقولك اقطعهم 
انا  :  ماشي طاب هسيبك بقي عشان  اعمل اللي انت قولتيلي عليه
كيموو :  استني .... انت عارف انت هتحطهم ازاي في الصنيه  ؟ 
انا :  ايه دا هما ليهم طريقه كمان
كيمو : اه هتحطهم علي طبقات  طبقه بصــ........
انا : اه عارفها دي طبقات مع الدمك جيدا بواسطه دكاك يدوي بحيث لا يزيد سمك الطبقه عن 30سم
ايه دا هو ردم برمال نظيفه
كيمو : امشي يااااد 
اعمل اللي تعمله  اقولك اطلب دليفري  ولا روح كل في المطعم اريحلك واريحلي

وطبعا نفذت كلام كيمو بالحرف الواحد وكمان حطيت الفراخ اللي كنت سالقها ومجهزها 
بس ما رضيتش اقول لكيمو عليها احسن تعقدني 
( اه طبعا في واحد بيقول اني حاطط الفراخ صاحيه  لا يا معلم انا اصلا شاريها مدبوحه )
وظبط الصينيه ورحت حاططها في الفرن

المره الجايه بقي هتعرفوا مصير البطاطس
ايه اللي هيجرالها وهيجرالي


الأحد، مارس 08، 2009

تـــــــوتـــه .......حبيبتي

بصراحه البوست دا كنت منزله في المدونه القديمه
بس ما ينفعش ما يبقاش موجود في المدونه الجديده
لان روان دي اجمل حاجه في حياتي
وبمناسبه عيد ميلادهابقولها كل سنه وانت طيبه
وحشاني يا بنت الايه
ودي عشان عيد ميلادك
اما دي هديتي ليكي
مع انك هتنفضي للهديه وهتتشغلي بالتورتايه

دا بقي البوست اللي بقولكم عليه

**************************

دي كتبتها اول ما سافرت

***

عارفين ايه بيكون احساسي لما بقول وحشاني يا مصر

عارفين ايه بتمني سا عتها وبيكون نفسي اعمل ايه

بيكون نفسي اتمشي شويه

تحت القمرا ف عز الصيف

بيكون نفسي لو اسمع ضحكه

من واد صاحبي دمه خفيف

بيكون نفسي اقعد ف البيت

انا وروان نحكي ف حواديت

بيكون نفسي اخدها ف حضني

واقولها عالصياد والسمكه

وما تسمعش اللي انا بقوله

وتزعل مني وتعمل دبكه

"هو السمك بيتكلم يا عمووو"

-ايوه يا توته

بيتكلم ف الحدوته

******

ودي حاجه كتبتها في اول عيد ميلاد ليها

روان

وانتي كده عندك سنه

مليتي دنيتنا هنا

عملتي ايه فينا اوام

ملكتي روحنا وقلبنا

***

يا روان عملتي ايه فيا

بقيتي روحي وعنيا

معقوله كل دي طعامه

والله الفرحه دي شويه

***

دي روان لو تبتسم ثانيه

ضحكتها تنور الدنيا

بدعيك يارب خليها

ومامتها تجيب بنات تانيه

***

يا حظنا يا بختنا

الحلوه توته عندنا

مولوده من حبة شهور

وبحبها من ميت سنه

***

يا روان يا اغلي من عيني

دا بعدك ثانيه علي عيني

وكل لحظه بتعدي

بتحلوي كتير قوي ف عيني

**

دي روان لو تبتسم ثانيه

صحكتها تنور الدنيا

بدعيك يا رب خليها

ومامتها تجيب بنات تانيه

***************************

ودي حاجه تانيه
***

عارفين اجمل حاجه ف عمري ايه

لحظة روان ما بتبتسم ف عنيا

لحظة ما تملي الدنيا حواليا

لحظة ما صوتها يرن ف خيالي

لحظة ما بمسك ايدها باديا

لحظة ما بحضنها

كده لما بتقولي

الكلمه بعيونها

وف لحظه توصلي

اجمل ملاك ف الكون

دي جمالها مش عادي

ضحكتها دي الجنه

واجمل عيون هيه

*************************

روان

****

يا روان مافيش زيك ملاك

ولا فيه احن ولا ارق

مش عارف اعيش وانا مش معاك

شفتك لقيت قلبي اتسرق

قبلك ما حستش بحنين

والعمر من بعدك فرق

***********************************

لو هوصفك يحتار وصفي

كل الكلام مش هيكفي

يا توته يا شهد مصفي

يا اجمل بنات الكون ف عيوني

**********************************************

لو هحكي عنها اقول ايه فيها

اقول ماشاء الله عليها

ملاك دي ولا من البشر

وعيونها دي ولا القمر

اول ما عينك تيجي عليها

هتحبها قوي وتموت فيها

يا اجمل هديه من القدر

يا روان يا حته من القمر

*************************

ودي بقي كتبتها لما مامتها جابت رقيه من 4شهور

***

هتفضل روان زي ما هيه

روح قلبي والنور لعنيه

غلاوتها بتزيد جوايا

واكيد هحبك يا رقيه

*************

ودي اول ما بعتولي صورة رقيه

*****

حوريه دي ولا رقيه

الشمس دي ولا القمرا

اول ما لمحتها عنيه

حبيتها من اول نظره

******************************

ودي جديده

**********

هتفضل روان زي ما هيه

روح قلبي والنور لعنيه

غلاوتها بتزيد جوايا

في كل ثانيه معديه

**

هي لحياتي النور والشمس

هي اللي جاي واليوم والامس

وهي اجمل حاجه تتحس

بحبها بكل ما فيه

****

هي النضاره الورديه

هي الهوا وهي الميه

والضحكه دي اللي منديه

وعيون بتطرح حنيه

*******

هي الشقاوه اللي تفرح

هي الحلاوه اللي تريح

هي البراءه

هي الجراءه

هي العيون الملاليه

************************

ودي اخر حاجه كتبتها لحبيبتي

*****

يا قمرا ياللي نصك نووور

ونصك عطر م الجنه

تغير منك بنات الحور

وصوتك زي طير غني

هعديلك يا عمري بحور

خلاص مش قادر استني

*******

يا نسمه لما بتعدي

علي قلبي وبتهدي

بلاقي عقلي م الفرحه

خلاص بيجيب وبيودي

*******

يا ضحكه بترسم الفرحه

علي قلوب اللي حواليها

يا شمس وف القلوب طارحه

بتزرع ضيها فيها

معاكي الدنيا مش رايحه

دي جايه باحلي اغانيها

*****

وحشتيني يا بنت الايه

الأحد، مارس 01، 2009

بنوته ............. رسم(او شخبطه)

النهارده بقي هغير نشاطي
من فتره كده كنت استلفت حبة صور من مدونة الفنان الجميل محمد عتلم
وقلت انا هرسمهم وارجعهم تاني ودي بقي اول محاوله (فيروز)
(عتلم انا حاولت اخليها تضحك زي الصوره ما عرفتش شكلك مزعلها يا معلم )
عموما اللي عايز يشوف الصوره اللي هي الاصل يعني يروح يشوفها
بس ييجي تاني عشان يقولي رأيه
يارب تعجبكم