الجمعة، مارس 27، 2009

الحياه بقي لونها ............بطاطس

فاكرررررررررررررررررررين البطاطس
اللي انا من كام يوم حطيتها في الفرن
( ايه مش فاكريييين)
ولا انا
انا اساسا مكنتش عايز اعرفكم مصيرها المشؤم بس انتو اللي اصريتوا
( هنكدب من اولها هو حد عبرك )
انا كنت اخر حاجه قولتها اني حطيت البطاطس في الفرن
**************
نكمل بقي
****
بعد ما حطيتها في الفرن
كل خمس دقايق اروح اتطمن علي البطاطس
عدي خمس دقايق
ربع ساعه
بس ما فيش حاجه حصلت
نص ساعه
ساعه
ان حاجه تحصل
ابدا
ساعه ونص
مافيش اي تغيرات كيميائيه ولا فيزيائيه
ولا حتي فسيولوجيه حصلت للبطاطس
اعمل ايه انا في صاحبي اللي عملت برررم وعزمته علي الغداء
لا هو يستني بقي ونخليها عشاء
وفعلا اتصلت بيه وخليتها عشاء
ودلوقت
ما قداميش غير كيمو هي اللي هتنقذني كالعاده
( هي ممكن تضربني بحاجه في وشي عبر الموبايل بس اكله تفوت ولا حد يموت )
انا : الووووووو كيمو الحقيني
كيمو : ايه يا فالح ناوي تعمل سلطه وعايز مساعده
ولا عايز تسخن العيش ومش عارف
انا : لا يا كيمو انت فاكره البطاطس اللي كنا بنعملها
هي بتاخد كام يوم علي ما تستوي
كيمو : نعم كام ايه .. انت بتستهبل هي نص ساعه لو البوتاجاز بيشحت
شوف ياااد يمكن انبوبة الغاز فضيت
انا : لا انا لسه مغيرها امبارح
كيمو : طاب والصينيه سخنت ولا ايه ظروفها
انا : معرفش وانا ايه اللي عرفني انا ماسكها بالفوطه من قبل ما احطها في الفرن اساسا
كيمو : اوعي ياد تكون نسيت تولع البوتجاااز
انا : لا ولعته والنار بتاعته اد كده
دانا حتي مولع الاربع عيون عشان تستوي بسرعه
كيمو : مولع ايه ....؟
عيون ايه .... انت مش مولع الفرن
انا : ايه داه هو الفرن بيولع
(طبعا ما فيش داعي تعرفوا اللي هي قالتهولي
ايه واحده بتهزق اخوها الصغير
لازم يعني تعرفو قالتله ايه )
وساعه علي ما عرفت اولع الفرن
طبعا حطيت الصينيه وعملت زي ما كيمو قالتلي
استني بقي عليها ربع ساعه ولا حاجه ما تقعدش علي باب الفرن
قلت اشوفلي حته من الماتش اللي كان لسه بيبدأ لحد ما الصينيه تستوي
ولما ييجي عن الدقيقه 15 ابقي ابص عالصينيه
الحقيقه كان ماتش هايل
الاهلي والمصري
والمصري بهدلنا يومها واتهزمنا( 2-صفر )
والواحد نفساويته اتسدت وكنت مولع من جوه
لدرجة اني من كتر الولعه شميت ريحة شياااااط
ايه ......... الصينيه
دانا كنت بعمل بطاطس
يا لهوووووووووووي انا نسيتها
مدة شوطين بالاضافه للوقت المحسوب بدل الضائع
هعمل ايه في صاحبي اللي جاي يتعشي معايا
بسيطه هتصل بيه يجيب عشاء معاه وهو جاي
( ودا مصير اي حد يفكر اني ممكن اعزمه في يووووم )
*******************
طبعا انا مش هقولكم انا طلعت الصينيه لقيتها عامله ازاااي
واللي يعرف يا ريت يقولي
او يتصل عالمطافي
************
ولحد ما تفكرو في الاجابه
وبمناسبة الاكل
انا اول ما جيت السعوديه كنت مش متظبط في الاكل وكنت بحلم بالاكل المصري
كان نفسي في الفول والكشري والذي منه
فكتبت حاجه كده
بس بعد كده اكتشفت ان كله موجووووووووود
وجاري البحث عن المش
واليكم التخاريف
************
يابلد مافيهاش عربية فول
ولا علبة كشري ترد الروح
اول ما تجوع روح كده علي طول
هتلاقي الكبسه منين ما تروح
لا محل عصير
ولا حتي فطير
ولا مسمط م اللي راويحة تفوح
اكل ( معصوب ) انا بتعصب
واضرب ( مقلوبه ) حالي يتشقلب
وان جيت اطبق ( بمطبق)
يطبق علي نفسي وروحي تروح
يا مانفسي ياناس .. اتغدي سجوووق
وكبده تلوث م اللي في مصر
واقف في طابور عيش كده ..مزنوووق
م الصبح لغاية بعد العصر
*********

هناك 76 تعليقًا:

maha zein يقول...

ده ايه ده ان شاء الله يا عم انت

عجايب

shemo يقول...

مش معنه بطاطس علشان صنية البطاطس يعنى هى اتحرقت ولا ايه..............فهمنة بالله عليك.......دومت بخير.

ستيته حسب الله الحمش يقول...

كل هذا من اجل صينية بطاطس نفسك فيها

امال لو نفسك في محشي كنت عملت فينا ايه؟

كنا شفنا بوست بعنوان "أنا وانت وبابا في المحشي؟"

MaNoOoSh يقول...

لا حول ولا قوة الا بالله
ااااااااااه يا خسارة البطاطس
يا عينى على الخزين اللى راح
على العموم ملحوقة
ايه رايك المرة الجاية تجرب تطبخ كشرى أو مكرونة بالبشامل

أبو العريف يقول...

maha zein
هههههههههههههههههه
شكلك علقتي قبل ما الموضوع ينزل
اصل العنوان بسلامته نزل قبل الموضوغ
ال ايه كتبت العنوان ودوست enter

أبو العريف يقول...

shemo
ايه دااااه
انت كمان ما لحقتيش تقري الموضوع
طاب انا اعمل ايه دلوقت
لو فيه خدمة توصيل البوستات الي المنازل

أبو العريف يقول...

ستيته حسب الله الحمش
هههههههههههههه
انا وانت وبابا في المحشي
حلوووووووه قوي
اجمل تعليق جالي في حياتي
يا د /ستيته

أبو العريف يقول...

MaNoOoSh
الكشري ممكن
بس معكرونه
بمين
انت قلت مين
انت بتشتمي علي فكره

maha zein يقول...

ههههههههههههههههههههههههههههه
هههههههههههههههههههههههههههههه
يخرب بيت كده
انا بردو قلت ايه الهم ده
قلت لا تكون دي طريقة جديدة للبوست

المهم
انت صعبت عليا
اصلك فكرتني باخويا اللى كان في دبي
يا عيني كان متبهدل ذيك كده
وكان نفسه في حجات معينة
لدرجة انى بعتله مع واحد وميلي كان رايح دبي في مؤتمر كده
بعتله مع شنطة لب انواع
وللوا الملامة كنت بعتله حجات تانية يا عيني مش موجودة هناك

احسن اتمرمط ودوق العذاب
ادي جزات اللى يسافر ويتغرب عشان القرش


بقولك ايه
ما طالما طلعت في السعودية كده
ابعتلي الفين جنية امشي بيهم نفسي عقبال بس ما اشوف حد يسلفني كده

أبو العريف يقول...

مهاااااااااااا

ايه الناس بتاعة مصلحتها دي
بقي الحكايه كده
انت جايه تستلفي اصلا
تصدي العنوان من غير البوست كان احسن
علي الاقل ما فيش من وراه خساره
ايه الناس دي

أبو العريف يقول...

مهااااااااا
اامري
انا ممكن ابعتلك خمسين هلله تمشي نفسك بيهم لحد ما تفرج
عارف الهلله
زي القرش عندنا

Habiba يقول...

عادى بتحصل

انا اعرف واحد فى سكن المدينه الجامعيه عمل مكرونه فى البتاعه اللى بيعملوافيها الفول وتخيل انت المنظر

اسفه لانى مش علقت عالبوستات اللى فاتت
بس قولى وزعت حبيبك ولا لسه؟

fnoonh يقول...

انت قاعد فين ياابني اخلي ماما تجيبلك حلة محشي ولا حاجة يعيني داانت شكلك اخر بهدله
بس على فكرة هنا في جدة في كل حاجة في فول وطعمية وفلافل والحجات البتولع القلب وتعمل حموضة للناس دي((انا عارفه بيحبوها ليه))مالها الجبنه والعيش على الصبح
انت محسسني انك قاعد في مكان وحش قوي اينعم السعودية بلاقي فيها حجات عمري مابشوفها في مصر
احمد ربنا
غير كده بقى والاهم احنا معزومين عندك على الغدا اوك ماتتهربش بحجة انك مابتعرفش تطبخ
تثبيييييييييييت :)
تحياتي وماتنساش العزومة

أمبارح كان عمرى عشرين!!! يقول...

ههههههههههههههه
صينيه البطاطس دى شؤم أخر حاجه
فيه حد بردو كان له نفس ياكل فى اليوم الاسود بتاع الأهلى والمصرى ده انا فضلت اسبوع مبخرجش من البيت

وكمان بطاطس محروقة هههههههه
___________
واقف في طابور عيش كده ..مزنوووق
_____________
لا دى الحاجة الوحيدة الامش هتخلص متقلقش ان شاء الله ترجع تلاقيها بخيرها واكبر كمان

سلاااااااااااااام

(Joudy) يقول...

هو بصراحة مصيبة انت كده هتحرق الشقة فى يومين وكمان فلوسك هتضيعها من قبل نصف الشهر على الديلفرى فلو عايز تبدأ صح ابدأها واحده واحده اسلق بيض الأول وبعدين اقلى بطاطس وباقى المقليات ولو حابب تعمل عزوم يبقى ابدا بالفراخ البانية هى سهلة وطريقتها كمان بتكون موجودة على علبتها وبلاش تعمل أرز فى الوقت الحالى اتعلمه الأول وبعدين قدمه للناس والا هتبقى أول مصرى يقتل الناس من أكلة رز...... وأهم شئ لازم تعرفه فى الطبخ انك لما تكون بتعمل حاجة يا تضبط التايمر بتاع البتوجاز يا ما تسيبش المطبخ نهائى وكمان مع ضبط التايمر ....


ملحوظة مهمة جدا جدا جدا :
اللى الأكل اللى بتجربة تجربه فى نفسك الأول علشان تتعلم أو تحرم تدخل المطبخ أو حتى تفكر انك تعمل فيها شيف مرة تانية

شباك موارب يقول...

لا انت بجد حرام اللي يخليك تخش المطبخ بعد كدا
انا بقول تقضيها دليفري احسن حاجه

أحمـــــــــــــد أبو العلا يقول...

ههههههههه
على فكره, اتحاد مصالح المطابخ قرر أن يمنعك تأشيرة دخول المطبخ
ولو اتمسكت حتى قريب من المطبخ قيها مؤبد
هههه

بوست جاااااااااااامد

smilyrose يقول...

هههههههههههههههه


كويس انك قلت عشان منفكرش نتعزم على اكل عامله

بايديك يا لخرابى شوطين والاستراحة والصنية فى الفرن



دى بقت صنية فحم

هههههههههه


يالى ربا يعوض عليك فى صنية مكرونة بشمل


ههههههههههه


smilyrose

وردشان

روح الحب الصادق

ضايع يقول...

كل ده يا عم على صانيه بطاطس طيب بما انك في السعوديه اديني الو وانا اقول لك تعمل كمان محشي ازاي هههههههه

وعموما اكتشفت بس بعد فتره طويله من اكل البروست لما معدتي نشفت ان فيه هنا كل الي انت تتخيله من الاكل المصري الجميل بدايه من البط والحمام المشوي والمحشي لغايه المش منزوع الدود

تحياتي ......

صفـــــاء يقول...

سيبت صينيه البطاطس قيمه الماتش وبين الشوطين بس ؟؟ وجاى على نفسك كدة ليه
ما كنت خللتها قد جمعتين
عموما لو مستعجل على صنيه البطاطس ومش فاضى لما تقعد فى الفرن شويه ابقى حطها على عين بوتجاز قيمه ربع ساعه بس تستوى شويه ولما تحطها بعد كدة فى الفرن متاخدش غير ربع ساعه او تلت ساعه بس تستوى ويحمر وشها
على الله يتمر بقى

موجة يقول...

بص بقى بغض النظر عن انى زعلانة منك
وشايطة زى البطاطس اللى انت عملتها دى
وبيتهيقلى هولع فى نفسى يعنى مش محتاجة الفرن يولع عشان اشيط
بس بجد صعبت عليا الصينية اوى

بجد بجد زعلانة منك يابو العريف

موجة يقول...

بص يابو العريف عشان متتحيرش انا زعلانة من ايه
انا زعلانة من حاجتين بس مش هقولك الا على حاجة وحدة بس
وهى انى برضو مفهمتش انت عاوز تقول ايه فى البوست اللى فات
ومش هقولك ع الحاجة التانية لانى هحتفظ بيها لنفسى ولمن يهمة الامر

أبو العريف يقول...

Habiba

لا مش بتحصل
دا بيحصل اكتر من كده
تخيلي انا قبل كده عملت مكرونه
طلعت شربه مكرونه

مين
ايه
اوزع مين يا ستي

أبو العريف يقول...

fnoonh
فين ايه
انت اللي فين وانا اجي لحد عندك
طالما فيها محشي
انت بتقولي محشي
الكلمه دي مش غريبه علي
فاكرها

اما بالنسبه للاكل المصري
تقريبا كله فعلا موجوووود
بس انا قعدت فتره كده علي ما عرفت الاماكن دي

انا موافق عالعزومه
بس هتعملي زي صاحبي
وهتجيبي معاكي الغداء
انا ممكن اعمل الشاي عادي

قبلاوى يقول...

آدى آخرة إللى يشجع الأهلى

يخسر وتتحرقله البطاطس

هو الأهلى السبب على فكره

أبو العريف يقول...

أمبارح كان عمرى عشرين!!!
ايه دا يا عم
انت هتجيب السبب في البطاطس
الاهلي اللي كان وحش يومها
طاب دا هو اللي حرق دمي
وحرق البطاطس

بالنسبه لطابور الغيش
لا انا مطمن من الناحيادي
انا بس بهزر

أبو العريف يقول...

(Joudy)

هههههههههههههههههه
انا فعلا بسلق بيض
بس اول مره عملته بطريقه احمد حلمي
يعني كل بيضه بتستوي في ربع ساعه
يعني 10 بيضات عايزين 150 دقيقه

أبو العريف يقول...

شباك موارب
مهو دا اللي بيحصل حاليا
لما معدتي نشفت من الاكل
المطاعم ده

أبو العريف يقول...

أحمـــــــــــــد أبو العلا

يا ريت
بس اكل منين
انت تفكر انا بدخله محبه
دانا ببقي مش عايز اجي ناحيته


تحياتي ليك

أبو العريف يقول...

smilyrose
لا انا ممكن اعزمكم عادي
بس تجيبو اكل معاكو

نورتيني

أبو العريف يقول...

ضايع
بتهرج
مش
قلي فين وانا اجيبه
حتي لو مش منزوع الدود

انت فين يا عم الضايع
انا منمكن الاقيك

BAsMA يقول...

ههههههههههههه

والله حلوة البطاطس دى
بس قولى كده وبصراحه هيا بطاطس ولا ايه بالزبط
اصل من كلامك كده جانى احساس انها لا تشبه بالطاطس او بينهما صله اطلاقا

وبعدين معاك حق فى مصر الفول لايعلى عليه
ايه ده الواحد جاع
انا قايمة وسلامو عليكو

أبو العريف يقول...

صفـــــاء
الشوطين والاستراحه
والتحليل كمان

ودمي اتحرق والبطاطس اتحرقت
وكل حاجه كانت سودا في اليوم ده

أبو العريف يقول...

موجة
ايه اللي مزعل البحر مني
دي ما كانتش صينية بطاطس

ما عاش اللي يزعلك
وما يصبش عليك غالي

Teawater يقول...

ربنا يكون في العون متاخر جدا كالعاده
بس اهي ظروف ربنا يقدرك ويقف جنبك في غربتك

أبو العريف يقول...

قبلاوى
ايه ده
شكلك زملاكاوي
المصيبه لا تكون من بورسعيد
يا شماتة ابله طاظه فيه

أبو العريف يقول...

BAsMA
ايه ده هي ماكنتش بطاطس
والله ما حد قالي
تصدقي انا كنت مفكرها بطاطس


طبعا هو فيه زي الفووووول

أبو العريف يقول...

Teawater
حمدالله علي السلامه
ايه الغيبه الطويله دي
يا رب يكون خير

متشكر قوي

shemo يقول...

السلام عليكم.........
انا جايه اصلح غلطتطى ههههههههههههه.....شكلى باه وحش جدا فى مدونتك يا ابو العريف والله مش مقرتش البوست انا فكرتك انك نزلت عنوان بس تصبيره الصفحة وانا بقرا تقريبا كان فيها حاجة........بجد سورى على الى انا كتبته فى التعليق مكنتش شوفت البوست ........سرعت النت ما قدراك ما سرعت النت كانت وحشة معلش مش حقولك باه اكيد بتحصال معاك...........نيجى باه للبوست اعد ما انا قراته انا عن نفسى كنت متشوقه لمعرفة مصير الصنية بس بجد فرحت لما لقيتك ولعت الفرن قولت اخيرا الصنية حتتعمال ههههههههههههههه بس صعبت عليا اوى لما عرفت انها اتحرقت والله الله يكون فى عون صحابك ابقى اعمال حسابك بعد كده حرام عليك الناس .........دومت بخير .

نبض الحياة يقول...

ياخساااااااااارة البطاطس
والحمد لله انها جت سليمة وجت على أد كدة.
والمرة دى متسلمش على الاستاذ حضرتك اللى زعلت منه البوست اللى فات فى تعليقى .
تحياااااااااااتى .
دمت بخير .

أبو العريف يقول...

shemo
ولا يهمك
وبعدين دي غلطتي انا
انا اللي نزلت العنوان الاول
ال ايه كتبت العنوان
ودست ENTER

مالهم اصحابي
اللي عاجبه يتعزم يجيب اكل معاه
ولا ايه

أبو العريف يقول...

نبض الحياة
ايوه كده
خلي البساط احمدي
انا اقولك انت يا نبض الحياه
وانت تقوليلي حضرتك
اه مانا الكبير

ضايع يقول...

خد يا عم ادي ال ميل مبتاعي وابعتلي عليه وهنتقابل اكيد

bassiouny70@hotmail.com

سفروتة يقول...

هههههههههههههههههههههههههههههه
لكي الله يا صينية البطاطس
زمان البطاطس بتدعي عليك دلوقتي
لا وكمان الصينية اللي حرقتها دي ... اكيد اكيد طلعت عينك في الغسيل
والله شكلك رميتها وخلصت منها
ههههههههههههههههههههههههههههههههههههههه

اقولك
المرة الجاية ابقي اعزم صاحبك علي
صينية كشري
:))

كل التحية

ايوشة يقول...

ههههههههههه ياسيدى على الانتماء الوطنى طعمية وفول وسجق وتلوث كمان بجد والله ربنا يكون فى عونك دا الواحد لما بيكون عايز وياكل مسلوق بيكون نفسى ياكل اى حاجة ليها طعم وياريت لو التلوث هاريها
الحل زى ما قولتلك اتفرج على فتافيت :)

MǿиY El-Shreef يقول...

هههههههههههههههههههه

ياعيني ع البطاطس

بس المهم انك عرفت الطريقه واتعلمت

وبعدين بلاش تفكرني بماتش المصري المشئوم ده

جماهير بورسعيد لسه بيتحاكوا بيه

بس يومها كسرنا بورسعيد :D

المهم .. ابقى اشتري اكل من بر بقى وبطل تعمل دمار شمال ف بيتكم .. والفول منتشر هنا اووووووووي

دور بث :p

بالهنا والشفا

norahaty يقول...

اشترى بريانى
كنت بحبه اوى
وانا فى السعوديه

norahaty يقول...

مش محتاج اقولك طبعا
ان ريحة الشياط وصلت لنا هنا
فياريت ياريت ياريت لو ناوى تطبخ
تانى تبقى تقعد فى المطبخ من اساسه
وكمان ما تولعش ايتها فتزيون خالص
كفاية الراديو على اذاعة البرنامج العام.

شجر الليمون يقول...

السلام عليكم
يا عم أبو العريف
حب البطاطس كيف
مشوي أو مسلوق
هيبقي طبيخك زيف

شكرا لك يا أخي لمرورك علي صفحات مدونتي
وأتمني التواصل

أحمد الصعيدي

د. ياسر عمر عبد الفتاح يقول...

هههههههههههههه
والله العظيم فكرتنى بنفسى
برضه كانت بطاطس .. بس مقلية عادى
ومكنش ماتش .. كان فيلم
بس الإنفجار بتاعى كان أقوى شوية
لأنى ببديهية قررت إن الزيت المولع قدامى ده ينطفى عادى جداً بجردل مية كبير
المهم المطبخ إنفجر إنفجار كبيييييير
والزيت طلع على وشى ..
بس الحمد لله الإصابات كانت طفيفة
وبما إنى صيدلى وعندنا صيدلية فقعدت يومين كده فى قسم الحروق فى الصيدلية عندنا والحمد لله خفيت

ولا لما عملت طبق فول بالسكر .. والله كان حلو
حلو جداً .. مش سكر
ولا صينية اللحمة فى الفرن .. مش عارف إيه خلانى حطيت عليها خل .. كان طعمها زوفت
وفضلت يومين أخد دوا للمعدة وبطنى بتموتنى

وطلعت بحكمممممة .. الطبيخ ده بتاع الستااااات

أبو العريف يقول...

سفروتة
لكي الله يا صينية البطاطس
امال انا ليه مين

الصينيه
هي بقي ليها اثر
اغسل دي تاخد اد تمنها 10 مرات مساحيق ومش هتنضف

نورتيني

أبو العريف يقول...

ايوشة
ايوه كده
شوفوا الناس اللي بتفهم
هو دا الانتماء الوطني
وانا كانت تايه عني فين الحكايه دي
وانا اقول ايه اللي بيخليني ادور علي الاكل ده
هو الانتماء اللي انت قولتي عليه ده

أبو العريف يقول...

MǿиY El-Shreef

يا ستي الماتش هو السبب
الاهلي حرق دمي
وحرق البطاطس

أبو العريف يقول...

norahaty
اطبخ
تاني
لالالالالالالالالالا
انا حرمت اعدي من قدام المطبخ

أبو العريف يقول...

شجر الليمون
نورتني
الدنيا بقت كلها لموووون
شرفتني

أبو العريف يقول...

ياسر عمر عبد الفتاح
الحمد لله يا دكتور
ربنا عالم بحالي
انا كنت هجيب صيدليه منين اقعدلي فيها اسبوع

فتافيت يقول...

ياا عيني .. انت وجعتلي قلبي يا ابني
بجد انا هاعيط خلاص.. انا اتقهرت اصلا

وطبعا مش عهلشان انت مش لاقي الاكل ولا حتى علشان البطاطس

ولا علشان المكالمات الدولي

نيييفررررررررررررررر

علشان فكرتنى بالمصري لما علم علينا 2 صفر

عااااااااااااا عااااااااااااا

يلا روح يا ابنمي اللهي يوقعك في مطعم مصري

بيعمل فول بالذبدة والطحية والزيت الحار

وطعميلة محشية وسادة

وكشري مصري واسكندراني

ومحشي كرنب ورق عنب وبتينجان

وحمام وفطير وام علي كمان

ديه دعوة خالتك فتافيت

محمد عتلم يقول...

يبنى انتا لسه جديد هنا ... وكمان عاوز تاكل مش ؟؟
طيب لو عندك بنده او هايبر او بن داوود اكيد هتلاقى عندهم مش بس طبعا مش زى المش المصرى بتاعنا بس اهو اسمه مش وخلاص يابو العريف وانصحك متاكلش من المطاعم كتير عشان الاكل هنا بيجيب عته مغولى وتأخر فى النمو الفكرى واحتمالية حدوث جلطه وسكته ثقافيه مما ينتج عن هذه الامراض تخلف عقلى بحت .. يعنى حاول تقضيها جبنه بطماطم .. بيض .. لحد ما ربنا يتولاك برحمته انشاء الله وتلاقى بنت الحلال اللى تعملك اكل بيتى انشالله عك بس اسمه اكل بيتى ..
ونصيحه منى متكلمش اختك تانى فى موضوع الاكل عشان متخسروش بعض ... الاخوه اهم

أبو العريف يقول...

خالتي فتافيت

انا كمان اللي مزعلنيش علي البطتطس
اني كنت مقهور اساسا علي الاهلي
ودا اللي نساني الدمار الشامل اللي حصلي
سواء البطاطس والفراخ
والفاتوره اللي مش عارف اسدها لغايه دلوقت

بس الحمد لله
امبارح بس عملت تجربه ونجحت
عملت صينية بطاطس
والله بجد

بس للأسف البطاطس لسه موجوده
والمنتخب اتعلدل مع زامبيا
يظهر البطاطس دي نحس

ঔღঔ نـــوارة ঔღঔ يقول...

ههههههههههههههههههههههه
هههههههههههههههههههه

لا بجد بجد انت خطيررررررررر

حرام عليك بدال ماتولع الفرن تولع البوتاجاز
ههههههههههه

ال وايه ماسك الصينية بالفوطة قبل ما تسخن اساسا ههههههههههههههه

ياربي هموووت من الضحك

نصيحة اخوية بلاش تدخل المطبخ تاني وارحمنا وارحم اختك ههههههههههههههههه

بجد بووووووست هاااايل

أبو العريف يقول...

محمد عتلم
موجود بس مش المش اللي بالي بالك
اللي هو نسبة الدود الي الماشي حوالي 2:3
وعلي فكره كل حاجه موجوده فعلا
دانا اخيرا لقيت عصير قصب
ايه داه
وانا اقول الاحساس اللي انا حاسه اليومين دول من ايه
هو العته المغولي
حاسس ان نسبة الغباء عندي بدأت تتوغل وتنتشر وتتسرب


لا اختي اساس هي اللي ما بقتش ترد علي تليفوناتي
لنفس السبب

أبو العريف يقول...

ঔღঔ نـــوارة ঔღঔ

ادخل المطبخ تاني

انا اساسا جبت العمال وهديت المطبخ
و عملت مكانه سوبر ماركت صغير علي قدي

احسن الشيطان يوزني وافكر ااطبخ تاني


نورتيني

gana magde يقول...

ههههههههههههههههههه
بالهنا والشفاء
حد مبيعرفش يطبخ يعمل بطاطس
عموما بوست دمه خفيف ولذيذ رغم البطاطس اللى اتفحمت
تحياتى

أبو العريف يقول...

gana magde
ما هو فيه مثل بيقول اول ما يشطح ينطح

حد فاهم حاجه

عموما نورتيني

maiosha يقول...

معلشى لحظة كده
هى دى البطاطس أللى انا كنت عايزاك تسيبلى منها طبق

لا معلشى الف شكر

انا متنازلالك عن طبقى

العمر مش بعزقة

(Joudy) يقول...

لحضرتك تاج عندى ياريت تقبله ويارب ما يكون وصلك قبل كده هو موجودة فى مدونة كلمات من ذهب http://words-of-gold.blogspot.com/

aliaa يقول...

انا لاول مره ادخل مدونه حد واكتب تعليق يابو العريف بس بصراحه انا كنت جعانه اوووووى ولما شفت بطاطس قلت انى هااكل لكن للاسف ماكنتش اعرف انك كده تشيط البطاطس واجوع انا يلا عموما مره تانيه يكون حظى احلى على فكره اسمك حلو اوووووى ابو العريف انا قلت الجواب باين من عنوانه بجد طلعت ابو العريف
سلام

aliaa يقول...

يالله عليا نسيت استاذنك يابو العريف
تسمحلى اكون من ضمن المدونين عندك ده بعد اذنك يعنى وحتى لو رفضت هاادخل برضو بس
سلام

أبو العريف يقول...

maiosha
طبق
ال طبق ال
انا بعتلك الصينيه كلها
انت مش عندكو صيدليه
ممكن تقيمي فيها اسبوع محدش هيقولك انت بتعملي ايه هنا

أبو العريف يقول...

(Joudy)
ايه التدبيس دااااااه
بس مقبوله منك
بس سبيني امخمخ
اصل الموضوع صعب قوي
ودا اول تاج يوصل ليه

أبو العريف يقول...

aliaa
اولا اهلا بيك في عالم التدوين
وانا سعيد ان اول تعليق ليك يكون عندي
نورتني

aidy يقول...

يا مانفسي ياناس .. اتغدي سجوووق
وكبده تلوث م اللي في مصر
واقف في طابور عيش كده ..مزنوووق
م الصبح لغاية بعد العصر


**********************

ليه ما الكبسة ارحم :)

بجد طريقتك فى الكتابة بالعامية تحفة

انا لغاية دلوقتى بضحك على الموضوع وكلماتك اللى فى الاخر

تحياتى ,,

والمرة الجاية لما حضرتك تيجى تعمل بطاطس ممكن تظبط جرس البوتجاز يرن بعد الربع ساعة :)

ميرام يقول...

(:

هههههههه
الله يرحم البطاطس
(:
من فضلك بلاش تدخل المطبخ تاني عشان مش عايزين نسمع خبر انفجار أنبوبه ..بسبب ارهابي مصري ولا حاجه (:

(:
على الهامش...
عجبني الكلام الي في الاخر
حسسني انك دايما جعان (:
وبعدين مالفول مالي السعوديه ..
صحيح تميز ..وامريكانا ..
راح ولا جه ..فول بردو
بانتظار الاكلة الجديده
عفواالبوست الجديد
تحيــــــــاتي
(:

أبو العريف يقول...

aidy
ايه دا بوتجاز
وجرس
انا ممكن اكون سمعت عن المنبه اللي في المبوبايل
لكن البوتجاز
لسه التكنولوجيا دي ما جاتش عني


متشكر جدااا
نورتيني

أبو العريف يقول...

ميرام
ماشي يا ستي هجيب فول وتميز
مع انه مش الاكل اللي واحشني
لأ الوقفه علي عربية الفول وامة لا اله الا الله
تتفرج عليك وانت بتاكل
احساس مالوش حل

koketa يقول...

ههههههههههههههههههههههههههه
كل ده حصل
اومال لو عامل عزومة بجد كنت عملت ايه
يا نهار ابيض
انت فكرتنى ب احمد حلمى لما بيسلوق البيض
عموما تعيش وتاخد غيرها