مصر..في كأس العالم للمرة الثالثة

المكان ...

استاد القاهرة الدولي

الزمان ...

12 يونيه سنة 2327

الحدث...

المبارة الافتتاحيه في بطولة كأس العالم بين مصر والبرازيل

بعد احتفالات دامت لمدة 10 شهور متواصلة بعد صعود مصر للمرة الثالثة في تاريخها

وبعد اعتذار دولة جزر القمر عن تنظيم البطوله قرر الاتحاد الدولي لنقلها الي مصر

حيث اعتذر ايضا عن تنظيمها كل دول افريقيا

... ودا طبعا بعد توقف للبطوله دام لمدة 17 عام بسبب الحرب العالمية الثالثه والتي كان السبب في قيامها

هو مباراة في كرة القدم في تصفيات المؤهله لكأس العالم

****

نبدأ بتشكيل الفريق المصري اللي بيقوده المدرب الوطني حفيد حسن شحاته

وفي حراسة المرمي حفيد عصام الحضري

خط الضهر حفيد وائل جمعه وحفيد هاني سعيد واكيد انتوا عارفين باقي التشكيل

عشان كده ندخل في احداث المباراه علي طول

بالطبع مازلنا في انتظار نزول الفريقين الي ارض الملعب مش عارف اتاخروا كده ليه

اه جاتلي اخبار حالا ان كاوتش الاتوبيس اللي بيقل المنتخب المصري فرقع

مما اضطر اللعيبه انهم يأجروا عجل من عند عم سعيد العجلاتي اللي اصر انه ياخد

النمر بتاعة فانلات اللعيبه رهن لحد ما يرجعوا العجل

وبالتالي اللعيبه هيلعبوا بدون ارقام

****

واخيرا وصل الفريقين الي ارض الملعب

وضربة البدايه مع منتخب مصر

حفيد ابو تريكه لحفيد بركات ... ماشي حفيد بركات بيمرر لحفيد سيد معوض

اللي بيرفعها حلووووووه لحفيد زيدان وهو والجون وحلوه جوووووووووووووون

ايه الجمال ده الله عليك يا حبيب والديك يا مجرم يا زيدان يا مجرم

اوباااا هو الحكم مش بيصفر ليه محسبهاش ولا ايه

هو فين الحكم اصلا ... انت فين يا حكم ايه يا حكم... الحكم مش موجود في الملعب

اه معلش يا جماعه الحكم كان في الحمام وبالتالي الجون ما اتحسبش لظروف خارجه عن ارادة الحكم

*****

نستأنف احداث المباراه الممتعه للغايه

الكوره مع حفيد روبينيو

بيباصي لحفيد سيلفا وماشي سيلفا

لحفيد كاكا وكوره صاروخيه موجهه لمرمي الحضري

وحلوه يا حضري بيمسك الحضري للكن بتاخد الحضري وجوه الجوووون

وانفجار في مرممي الحضري

ايه اللي بيحصل ده انا شايف ضرب نار واللعيبه بتجري

الله ايه ده انا شايف طائرات مروحيه في الملعب وبتنزل جنوود

والجنوددد شايله دبابات في ايديها ايه اللي بيحصل يا جماعه

استنوا كده انا سامع المعلق الداخلي بيتكلم

لالالالالالالا

دا مكنش المعلق الداخلي دا رئيس الاركان الكوستاريكي بيعلن

احتلال كوستاريكا لمصر لتنضم مصر الي الامبراطوريه الكوستاريكيه العظمي

وبكده تبقي افريقيا كلها في قبضه كوستاريكا

طاب ومصير الماتش ايه

***

اعلن قائد القوات الكوستاريكيه بنقل المباره الي استاد شرم الشيخ

حيث انها تم اعلانها منطقه ذات سياده دوليه منذ خمس سنوات

يعني شرم الشيخ بقت مع نفسيها مش تبع مصر ولا اي بلد تاني

**

والحمد لله ان العربات الكارو اللي كانت جايبه المشجعين لسه وافقه بره الاستاد

عشان تنقلهم مع الفريق لشرم الشيخ لان عم سعيد العجلاتي بعت خد العجل بتاعه

**

كان معكم المعلق الرياضي حفيد مدحت شلبي

وكل سنة وحضراتكم طيبين وعيد سعيد عليكم كلكم

****

ملحوظه

اي شخص يري تشابه بين احداث القصه واية احداث حقيقيه

يبقي اكيد اكييييد بيستعبط

انا نسيتك

بدءاً

وارسم وطن

واعشقه

وان يوم تعبت

اكرهه

واموت فداه وقت المحن

وارسم علم

مرفوع

علي جبهتي

واصرخ واقول الله

والكوره بتتركن

*****

انا نسيتك

نسيت اني في يوم شفتك ولا لقيتك

نسيت اني بكل جوارحي حسيتك

نسيت اني يا فرحة عمري حبيتك

نسيت انك في يوم كنتي

نسيت انك في يوم خنتي

نسيت انك جرحتي

وسبتي

ومشيتي

نسيت انك في يوم جيتي

نسيت صوت كان يصحيني

ف عز الصبح من نومي

وكان يحلي معاه يومي

نسيت ضحكة كانت تشرق

وتمسح حزني وهمومي

نسيتك ايوه مش فاكرك

ولا فاكر انا طيفك

ولا فاكر انا كدبك

ولا زيفك

ولا فاكر كلام غنوه

بسحر عنيكي مغزوله

تهز القلب

بحروفك

انا نسيتك

نسيت الضي ف عنيكي

نسيت انا كل شئ فيكي

نسيت حتي اني ناسيكي

لمه.....

بدءاً

هي لما تلاقي حد بشوش

بيضحك

في عز ما قلبه م الاحزان بيتقطع

ووقت الفرح بيدمع

هي لمة ناس واحلي وشوش

في فرحك

تلاقي عيونها م الفرحه كده بتلمع

وفي جراحك بتتوجع

هي دي بلدي اللي قلبي حسها

هي دي مصر اللي انا مشتاقلها

******

اولا

احب اوجه الشكر لصاحبة المجهود الجبار

في عمل النيو لوك الجديد للمدونه

هي بصراحه خدتها عالطوب الاحمر

وسلمتهالي متشطبه لوكس وعالمفتاح

وكمان هي اللي منفذه الديكورات والذي منه

اللي عايز يشطب يروح هناك

واسعار مخفضه للمغتربين

بجد متشكر جدااااااا

انها

كيـــــــــــــــــــــارا

بحبك.............وكلام تاني

بدءاً

ارسم كلام عالورق ما يهمنيش

لو يتقري.... ما يتقريش

بس المهم ان الكلام

يكون م القلب ...

له معني

يكون صادق

يكون مش بس لقمة عيش

ليه ادفن كلمتي فيا

واسيبها تموت

بلاش اكبتها

ما اكتبها

واسيبها تعيش

****************************

بحبك

***********

بحبك ألف دقة قلب جوايا

وهمسايا

تناديكي

وغنوة كلها آهات

وحبة خوف

وناي ملهوف

غناه ليكي

بحبك زقزقة عصافير

وروح هايمه في سماك بتطير

واحبك قلب حر اسير

اسير لياليكي وعنيكي

*****

بحبك نبض م الاحساس

وتر حساس

مغناشي

وثورة شعب كله حماس

وحبة ناس

متنساشي

بحبك تبقي ليا مصير

اميره ... وابقي ليكي امير

واحبك خوف من المشاوير

لكني في الطريق ماشي

****

في حبك عمري متسرب

بخاف واهرب

واتوه مني

وقلبي في دنيا متغرب

خلاص قرب

يجنني

بحبك رغبة في التغيير

واحبك مانت قلب كبير

وافكر

لا مفيش تفكير

عشانك قلبي بيغني

....................

عن لقاء مدوني السعودية ........لن اتحدث

بدءاً

لا سبتني ورحت بعيد عني

عشان انساك

ولا يوم بتبقي قريب مني

واحس هواك

حيرت قلبي تعبته بجد

علقته بين السما والارض

لاعمري شفت انا زيك حد

ولا مره قلبي ارتاح في هواك

****

كنت ناوي بعداللقاء الجميل ده

اني اكتب كتير عنه

لكن سبقني د/ عصام

وميخو

ومينفعش اكتب بعدهم

ودي اللينكات

لقاء مدوني السعودية ( احوال الهوى)

لقاء القطرين ( رحيق الحياه )

.

ولكن لي تعقيم علي اللقاء

.

انا سعدت جدااا بكل اللي اتعرفت عليهم وزي ما ميخو قال

حسيت اني اعرفهم من زمان

ودول الابطال حسب الظهور

من اليمين

1-عبد الله الفهيد كاتب الأنثى

2-محمد السعيد ( في طريقه الي عالم التدوين)

3- د/ عصام علام أحوال الهـوي

4- محمد علي (ابو العريف)

5- محمد سعد القويري قويريات

واخير اللي قاعد

6- حليب هارتي محمد مختاررحيق حياة ميخوووووووو

واللي صورنا الصوره دي عشان كده مش باين

7-المهندس The eng

******

علي هامش اللقاء

صاحب الفكره

وصاحب الدعوة م/ احمد واحد ضايع

لم يحضر اللقاء

فص ملح وداب

واظن انه ضاع مننا

وطبعا دا حرمنا منن حاجات كتير جداا

اولها اننا نتعرف عليه ونتشرف بيه ونعرف ايه اللي مضيعه

ثانيا ودا اللي حز في نفسوياتي جامد

الكحك والذي منه اللي وعدنا بيه

م/ محمد مهندس مصري بيحب مصر

انا بعتذرله وبقوله اننا خسرنا مشاركه جميله

واني انا السبب في عدم حضوره

ودا طبعا بسبب الزهايمر بالاضافه الي حبه نداله مني

علمني حبك ان اتصرف كالصبيان

بدءا

لا الحال بيتغير

بعيد عنك

ولا الايام بترضي تفوت

ولا قلبي عاد يصبر

علي فراقك

وم الاشواق خلاص بيموت

لانك عيله وتصرفاتك تصرفات عيال

من يوم ما عرفتك وانا بقيت اعيل منك

بعمل حاجات ميعملهاش غير العيال

- بقيت بحب المصاصه اكتر منك

.

-وكل ما امسك ورقه وقلم الاقيني بكتب اسمك

.

- حتي حيطان اوضتي اسمك مكتوب في كل حته عليها

.

- لما بزعل منك بخاصمك

واستني تصالحيني بشيكولاتايه او واحدة كونو

.

- بفرح قوي واتنطط من الفرحه لما التليفون يرن والاقي اسمك عالشاشه

.

- تخيلي انا بكتبلك جوابات ولما ارجع هبقي اقراهالك

.

- وصورتك اللي كل شويه اطلعها من محفظتي اللي مش بتفارقها واقعد اتكلم معاها

.

- بتكهرب لما بتقولي

"بحبك قوي يا محمد "

وببقي سعيد اني الوحيد في عمامك اللي مش بتقوليله يا عمووووو

وحشتيني قوي يا روااان

************

.

.

بالنسبه للقاء المدونين

لقد تقرر الاتي

اولا

المكان

ان شاء الله اللقاء سيكون في مدينة الرياض

والمكان بالتحديد

الناس اللي في الرياض هما اللي يحددوا بقي

هو انا اعرف حاجه هناك ايه الناس دي

ثانيا

الزمان

ان شاء الله تاني او تالت ايام العيد

ايهما انسب للاغلبيه

وكل عام وانتم بخير

لقاء المدونين ...........العيد فرحه

في البدء

مهما العيون تدمع

والغربه لو توجع

هفضل عايش علي طول

احلم بيوم ما ارجع

يوم ما القلوب تتلاقي

وعيون كتير مشتاقه

والدنيا لو فراااااقه

في اليوم ده بتجمع

*****

اولا السلام عليكم ورحمة الله وبركاته

ازيكم يا بشر

عاملين ايه في الصيام

كنا اتفقنا اننا هنتجمع احنا المدونين اللي موجودين في السعوديه

في اجازة عيد الفطر المبارك

وكان الاتفاق يكون اللقاء في الرياض

وانا هنا عشان احكي في نقطتين

اولا

انا لحد الان معرفتش اتلم الا علي خمس مدونين غيري

ومنهم اتنين لسه مش متأكدين من حضورهم

ومش هقول عليهم عشان كل واحد يأكدلنا النهارده وهنا

هو ايه ظروفه

بس انا هقول حاجتين

اول حاجه اني ان شاء الله هحضر وهعمل اللقاء ده

حتي لو كنت لوحدي

تانيه حاجه بقي

ياريت اللي يعرف حد موجود هنا في السعوديه من اخوانا المدونين

يخبص عليه ويقولنا

عشان نعرف نوصل ليه

ثانيا

اخونا ضايع صاحب فكرة اللقاء ده

اقترح اننا نخلي اللقاء في المدينه المنوره بدلا من الرياض

.

.

وانا شخصيا معنديش ايها مانع سواء هنا او هنا

لاني في كل الاحوال رايح الرياض اشوف اصحاب ليه هناك وزملاء دراسه

.

وعليه فانني اطالب بحاجتين

(1)

نقول علي المدونين اللي هنا في السعوديه

.

(2)

نحدد مكان اللقاء

اسيبكم بقي مع رمضان جنه و منير