الثلاثاء، أغسطس 18، 2009

بوست كومبوووووو..............

يعني تهنئة ...و دعوة .... ولقاء .....وتاج .....وsms


البوست ده كومبو يعني طويل وممل بس كان لازم

طبعا كل واحد يقرأ اللي يعجبه ويولع في الباقي

واللي يكمل لحد الاخر ليه جايزه قيمه

لما ارجع مصر

*****

تهنئة


اولا احب اهني كل اصحابي وحبايبي المدونين بحلول الشهر الكريم

واقولهم

شهركم مبارك ان شاء الله

وادعو لهم

اللهم بلغهم شهرك بعظيم غفرانك والعتق من نيرانك

وادخلهم جناتك وسخر لهم الطيبين من خلقك واشرح صدورهم بذكرك

اللهم آمين

**************************

دعوة


طبعا انا سبقني اخونا الاستاذ ( ضايع ) واقترح الدعوة دي

والدكتوره( ستوته) دعمتنا بقوه

وانا من هذا المكان ادعو كل المدونين اللي موجودين هنا في السعوديه

اننا نتلم ونتقابل ونقضي يوم معا ودا ان شاء الله في اجازة عيد الفطر

بمدينة الرياض

وعلي المدونين المقيمين خارجها ( زي حالاتي كده ) يجهزوا شنطهم من دلوقت

وسنوافيكم بالاخبار ان شاء الله


*************

لقاء


امبارح ان اتقابلت مع المدون

مهندس مصري بيحب مصر

هنا في حائل واتعرفت عليه

وشربت احلي كباية نسكافيه من ايده

الحقيقه ان سعيد جدااا باللقاء ده وبالشخصية الجميله دي


************


تاج


****

التاج دا جالي من ناس كتير جداااا

بس اول حد بعته كانت ( جودي ) انا مكنتش عارف اجاوبه عشان كده اتأخر كتير قوي

بس عموما انا هجاوب السؤال اللي يعجبني منه حد ليه عندي حاجه

المهم انجح ولو بمقبووووول


- من انت؟

انا اتولدت مغمض حدفوني في الدنيا وقالولي روح ربنا معاك

ولحد دلوقت لسه ما فتحت


حل اخر

انا ابو العريف اللي مش عارف حاجه



-وما الذي تفعله هنا؟


والله ما عارف انا شكلي تايه



-اسرائيل تقصف كل جنوب بحثا عنك اي شمال ستقصد؟


عني انا ليه دانا حتي مصري يعني بصدرلهم حديد عز وغاز طبيعي ومحاصرلهم غزه وفل الفل

ولا بهش ولا بنش


حل اخر

هروح أمن حته في الدنيا

( حضن امي )


اوعي حد يقول ابن امه ...ولا بيهمني



- انت مكلف بحذف حرف من حروف اللغه العربيه اي الحروف ستختار ولماذا ؟

انا مش هحذف حرف

انا هحزف الهمزه اصلها بتستهبل وبتغاظ منها اوي

مره تلاقيها فوق الالف ومره تحت الالف ومره عالسطر وعلي نبره وعلي الواو

ماتهمدي في حته بقي خيلتينا


حل اخر

كنت عايز احذف اربع حروف تاني بس خفت من روان



- علي مفترق طرق لافتتان اليمنى تقول ( الي حلمك )
واليسرى ( الي مالم يحلم به البشر ) اي الطرق ستسلك ؟


هلف وارجع تاني ههههههه

اصلي فقري


-بجمله فقط اكتب تعريف لكل كلمة من الاتي


الوطن

ليس اماكن نسكنها

بل اماكن تسكننا


الام

حته من الجنه علي الارض


الليل

علي رأي فيروز ( الليل مش للنوم اصل الليل للسهر)


الحب

الحب اوهاما واحلاما وآلاما وذاتا تحتويها ذاتي
     " شعر لمحمود عبد الغفار "


امريكا

بلد بيتنا اقدم منها وبقت اكبر قوة في العالم


المرأه

اسألوا توفيق الحكيم


الانترنت

عرفني عليكم


- قيس وعنتره وجميل هم الذين يقولون الشعر وليلي وعبله وعزه وبثينه

وسها ورشا ونجوي وتيته وماما صموت

هل هذا تغييب للمرأه


لا طبعا المرأه ليها حضور طاغي في شعر كل الناس دي

والدليل انهم اغلب شعرهم واغلب الشعر اصلا اتقال في المرأه


حل اخر

اغار عليك من نفسي ومني ....ومنك ومن زمانك والمكان

ولو اني خبأتك في عيوني ....الي يوم القيامة ما كفاني

0 ولاده بنت المستكفي 0


- الي اين تمضي كلمات الحب بعد ان نقولها ؟

بتتسرب وتتبخر وتستمر وتستمر وتستمر



- هل تجد علاقة بين المرأه وقطاع الطرق؟

لالالالالالالالالالالالالا

انا اجد علاقه بين المرأه والساطوور



-هذا فراق بيني وبينك متي ولمن تقولها ؟


للغربه بس بعد سنه من دلوقت

وللبني ادم اللي عمل التاج ده


- كيف هو غدااااا ؟

علي رأي نور ( فيه خير جاي ان شاء الله )

بتعجبني وانت متفائل


- لمن تمرر هذا التاج؟


مش لحد قطعي



***************

sms


انت اكتر حد مخلص....وانت اكتر حد خانني

انــــت اقرب حد ليه....وانـــت ابعد حد عني

انت اكتر حد منصف ....وانت اكتر شئ ظلمني

انت احلي حلم عشته ....وانت اقوي كابوس قتلني

****

انت اصـــدق حد شفته....وانت كدبة عمري كله

انت اقوى حــــــاجه فيه....وانكسار قلــــبي وذله

انت فرحة عاشتها عيني ....وانت جرح القلب مله

انت اسهل شئ حصلي....وانت لغز وصعب احله

*****

انت احلي واغلي ضحكه ....والف دمعه بكاها قلبي

انت اطيب قلــــــب شفته ....واقسي قلب جرحلي قلبي

انت نور عمري وسنيني .....وانت عتمة ساكنه دربي

بعشقك مش قادر اخبي ..........بكرهك من كل قلبي


********

اسف علي طول البوست

بس هتوحشوني قوي

لاني هعتزل التدوين في رمضان

الا لو هقول حاجه تخص لقاء المدونين










الاثنين، أغسطس 10، 2009

يوم البهجة.............والاستظرااااف


فكرة يوم ال (بهجت ) دي فكره جميله جداااا لكن فكرة انك تكتب بوست حفيف

دا اللي مش جميل خالص لان البوست اللي دمه خفيف ده بييجي لوحده من غير قصد

لكن لو ناوي وقاصد هتلاقي نفسك مقضيها استظرااااف

ولذلك ياريت تتحملوا الاستظراف اللي هنا ده

دا ان عرفت استظرف اشاسا

( وش بيستظرف )
************************************



نبدا بقي بالفصحي كده و نقول


فكاهه


التفت احد المدعوين في حفل ساهر الي شاب يجلس بجوار وقال له

" كم انا غبي فقد قلت لذلك العجوز المتصابي ( الدبه اللي هناك ده )


ان ربة البيت قبيحة المنظر ثقيلة الظل ثم اتضح لي انها زوجها "

فرد الشاب قائلا " وماذا قال لك ابي "
*****************************************



علي رأي المثل


اغرب حاجه يا جدعان الامثال الشعبيه دي لاننا دايما بنلاقي امثال وعكسها

كمان فيه امثال دمها خفيف جدا والغريب بقي ان كل مهنه وليها الامثال اللي تخصها

يعني مثلا لو سألنا اخونا ( ضايع ) مهندس الكمبيوتر عن المثل اللي يؤمن بيه

هيقول

- ان كان لك حاجه عند الديسك قوله يا CD

-والويندوز اللي يجيلك منه الفيرس سده واستكنيس


اما اخونا المهندس

هيقولك المثل المفضل ليه

- معماري بناله بيت انشائي سكنله فيه

ودا اساسا كان اصله

طمعنجي بناله بيت فلسنجي سكنله فيه



اما لو قلنا للاخ عادل ( البلد دي فيها حكومه )

وهو متخصص نقد فني وسينما

هيقول

- الحظ لما يآتي يخلي نانسي حمااااتي


ولو سألنا موني الشريف الرياضيه الكبيره

هتقولك المثل المفضل بيقول

- الشاطره تحكم بدون صفاره


اما لو سألنا ميوشه ( الطالبه الفاشله دي )

هتقولك لا لا انا مليش في الامثال دانا حتي

- معرفش الالف من كيس الفيشار


اما الاخت كيكي

هتقول عووووووووووووو

عضدة اسد ولا نظرة حسد

اللي بيته من ازاز ما يحدفش الناس بالطوووب

يغور اللبن من وشه الجاموسه العكر

يا واخد القرد علي ماله يغور المال ويفضل القرد علي حاله

( كل دي امثال يا مفتريه )


اما كل اخوانا اللي عايزين يتجوزوا هيقولو ايه

- قليل البخت يلاقي القرد في الزفه


ولو قلنا قول يا عم عتلم هيقول

_ لا دا يرش ولا يبلش

ولا حد هيفهم حاجه غيرك يا عتلم


طاب قولي يا باشمهندسه حبيبه

تقولك ولا يهمك

- دانا هطلعك زي الورده من الصاموله

( سلميلي علي بليه الصبي بتاعك )

( نيهاهاهاهاهاهاهاهاها)



اما لو حد بيحب الاكل وبيحب يدخل المطبخ زي حلاتي كده هيقول ايه


- يا ساتر وشك يقلي الفطيره في الزيت

- قالك تعرف فلان قلت اه

طاب دقت طبيخه قلت لا قال يبقي ما تعرفوش

وبمناسبة الاكل

خدوا الكام مثل العجيب الغريب المريب

( علي وزن رسمي فهمي نظمي )


- كل اكل الهبال ( جمع اهبل ) وقوم قبل الرجال


-كل وبحلق عنيييك أكله واتحسبت عليييييك


-اللي ياكل علي درسه ينفع نفسه


- اللي يقول ماااااااااء تفوته قطمه

ودا اللي بينطبق علي شلة المقاطيع اصحابي لما بنتلم علي اكل سوااا
********************************************************




اغاني شكل تاني


امبارح كنت عند واحد صاحبي وبعدين لقيته مشغل اغنيه قديمه كده

فاكرين علي حميده اهو هو ده كان مشغل اغنيه اسمها حبابه


ودي فكرتني بالكلام اللي كانو بيكتبوه علي وزن الاغاني دي زمان

فمثلا حبابه كانو عاملين عليها غنوه بتقول


- حبايه طلعت في قفايا

جبتلها مرهم تراميسين

قالتلي شكرا مش عايزين



لولاكي برضه علي حميده

- لولايا لولا لولا

لولايا ما كان ليك بيت

دانا جبتلك بوتجاااااز بدل وابور الجااااااز

دانا جبتلك تليفووووون بدل ايدين الهووووون



- وكمان غنوه لعلي حميده مش فاكر اسمها بس الكلام كان بيقول


- عمي عمي عمي ضرب خالتي

ستي ستي ستي ما سكتتشي

قامت حريقه ونار

قامت حريق في الدار

يارب يا ستار

استر علي عمي



طبعا عمرو دياب ليه ميال بتقول


- وطلعت فوق فوق السطوح

ورسمت عينك فجـــلايه

ونسيت هناك فردة شراب

ونزلت بالجزمه معايا


طبعا لازم مانساش الاكل اللي في اغنية

ايهاب توفيق رسمتك


- رسمتك وسط طبق الفول

فطيره واللمون معصور

ابوكي فص ملح وداب

ومامتك ساندوتش كباب



ها مزهقتوش من الاستظراف


انتو اللي قلتوووووا


اخيرا بقي دي نكته بمناسبه اني موجود في السعوديه

بهديها للمهندس ولضايع ولعتلم ولميخو

وكل اخوانا اللي هنا


- واحد سعودي لقي مصباح علاء الدين

فالخادم ( العفريت ) بيقوله نفسك في ايه

قاله " انا عايز اطرد كل المصريين اللي في السعوديه

رد العفريت قاله " حرام عليك هو احنا عملنالك ايه


فهمتوهاااااااااااااااااااااااااا



طاب خدوا دي



- مره واحد خليجي كان عامل حديقة حيوان

وجايب فيها قرد واسد وفيل وكل الحيوانات

وبعد اسبوع من انشائها مرت لجنه من الرفق بالحيوان تستفقد المكان

لقيو كل الحيوانات مبسوطه الا الاسد

سألوه مالك


قالهم

بقالي اسبوع مش باكل

اول ما جيت حطلي علي الفطار موز وسوداني

قلت يمكن الفطار هنا كده هستني للغدا برضه موز وسوداني

ولما قعدت اسبوع باكل موز وسوداني بقوله يا عم ارحمني حرام عليك

دانا اسد اسد مش قرد

قالي

اخرس انت جاي علي فيزة قرد


حد فهم حاجه

انا عارف ان اللي انا اهديتهالهم فاهمين


واخيرا

سلام



الأربعاء، أغسطس 05، 2009

امرأة المؤتمرات الصحفية

دي قصيده كنت قريتها في مجلة كلية صيدلة تقريبا من ييجي 8 سنين

ومن ساعتها وانا حافظها طبعا مش فاكر مين اللي كاتبها بس عجبتني قوي

وانا من هذا المزنق هنشرها مع الاعتذار الرسمي لصاحبها المجهوووووول


*****


اني احتاج الي امرأة

تتحول عيناها حين تراني

لقضية رإأي عام

تعتبر وكالات الانباء هواها

اخطر احداث العام

يختطف العالم صورتها

يهتم بتاريخ ولادتها

ومتي تصحو

وكيف تنام

اني احتاج الي امرأة

من دفء خام

ليست لوحا ثلجيا

او تمثال رخام

اني احتاج الي امرأة

لا تشعرني بدوار البحر اذا رقصت

لا تدخلني غيبوبة حزن

او دور زكام

احتاج الي امراة

تمنحني عشقا فعليا

لا كوم كلام

يكفي ان المسها حتي تتحول
لعريشة ورد
او سرب حمام

احتاج الي امرأة

اتحدث عنها مبهورا

في المؤتمرات الصحفية

اتحدث مبهورا عن انثي

تتفجر فيها ابار مياه جوفيه

اتحدث عن حارات الجان

وميدان المرجان

وفوهة البركان

وشمس البحر المتوسط فيها

وشيوخ الطرق الصوفيه

احتاج الي امرأة لا تشبهها اي امرأة

في اللون

ولا في الدفء

ولا الحرية

احتاج الي امرأة

تلقي القبض العشقي عليّ

بتهمة تحريض الثوار علي الملكيه

ولقرصنتي في ماء العينين

وخلجان الخدين الاقليميه

ولتنقيبي عن نفط ضفائرها

دون استئذان جهات رسميه

احتاج الي امرأة

اتمني لو اقضي عمري

في زنزانتها الزوجيه