الثلاثاء، يناير 05، 2010

تنويعات .... علي بحر الملل

بدءا

وببني الحلم

وف لحظه بيتكسر

وألملم في بقايا الحلم

وارسم بيها حلم اكبر

واعيش الحلم

بس بخاف

في يوم اخطائي تتكرر

**

وبسأل نفسي الف سؤال

وبستفسر

ليه كل ما اروح في سكه

واقول خلاص هقدر

اكمل رحلتي واوصل

الاقي السكه تتغير

****

اولا كل عام وكل الناس بخير

ويارب سنه سعيده علي الجميع

وربنا يحقق كل احلامكم


***

تنويعات علي بحر الهبل


( للمرح والنكد فقط)

مع الاعتذار للشعراء الكبار

فاروق جويده

نزار قباني

نازك الملائكه

ابو القاسم الشابي


***
(1)

لماذا اراك علي كل شئ

كأنك في الارض كل البشر


كأنك عدوى وملت المكان

كانك مرض عضال انتشر

كأنك بلوى بعتها الزمان

كأنك مصيبه وبعتها القدر

اروح عمان الاقيكي ف عمان

وانزل قطر الاقيكي ف قطر


***
(2)

الحب في الارض بعض من تخيلنا


وهتعمل ايه بقى في اللي خياله عالي

عشرين سنه بنحب لما خللنا

والشقه مش موجوده والمهر ف العالي

والشغل بقي مستحيل يلاقيه شباب جيلنا

قطر الحياه داسنا واهو ماشي طوالي


***
(3)

قالو الحياه

هي لون عيني ميت


غرقان ف عباره وللا لوحده ماااات

وللا اندهس بحديد القطر ف العياااط

وللا انتهي م الجوع هناك ف الصعيد

وللا اتنسي ف مستشفيات بور سعيد

وللا اتردم تحت التراب في الدويقه

وللا اتحرق ف قصر الثقافه ف حريقه


***
(4)

اذا الشعب يوما اراد الحياه

فلابد ان يستجيب القدر


وللابد للكوسه ان تنتهي

ونضرب بدالها مربي جزر

ولابد للباشا ان يختفي

وكلمة بطاقتك دي تبقي اثر

ولابد لقفايا ان يحترم

محدش يهوب ناحيته م البشر

**