الجمعة، يوليو 31، 2009

رسايل ............البحر


عدت سنه...سنه من البعد ... سنه من الغربه ...سنه من الوحده

ولكن

كان هناك مايهون كل هذا ... انها رسائل البحر

نعم رسائل البحر .. ليس لانها تأتي عبر البحر الاحمر ولكن لانها

تأتي حاملة بحر من المشاعر والاحاسيس الصادقه التي استشعرها في كل كلمة ولو كانت بسيطه


اليوم اقلب في رسائل تليفوني

واتذكر كل شخص بعث الي ببعض مشاعره

لذلك

*

*

البوست ده هيبقي طويل حبتين

ونفساوي تلت حبات ( نفساوي يعني كاتبه لنفسي مش خنقه يعني )

لاني هقعد اقلب في الرسايل

وطبعا الامر ما يسلمشي من تعليق ولا حاجه علي اي رساله

تستفذني

*

نقلب معاكم

*

1- تمضي بنا الحياه ..في بحر لا نعرف مرساه .. ولكن يبقى طوق النجاه

( طاعة الله) .... محمد صلاح 11/8/2008

دي اول رساله لقيتها علي الموبايل ... اكيد كان فيه رسايل قبلها واتمسحت

*

2- ابتهج بك الصباح يامن غاب عنا ضياه وما اظلمت ضواحينا

اضائتها زكراه .... ياسر وجيه 14/8

*

3-اقترب شهر المحبة .. وجال بخاطري همس الاحبة ونادى لساني داعيا لهم بموده

" اللهم بلغهم شهرك بعظيم غفرانك .. والعتق من نيرانك وادخلهم جناتك.. وسخر لهم الطيبين من خلقك

واشرح صدرهم بذكرك ....... عماد 25/8

*

4- الان


وحصريا


ولاول مره


فقط


علي شاشة تليفونك


قبل لي حد


بقولك

" رمضان كريم "

.....( يويو ) ...27/8

*

5- جميل ان يكون لك قلب انت صاحبه

والاجمل ان يكون لك صاحب انت قلبه

علاء ....6/9

*

6- .......... يارب...........

طاهر .....7/9

*

7- اذا احتجت صاحب اتصل بيا

واذا احتجت حبيب رن عليا

واذا احتجت فلوووس

.

هذا الرقم غير موجود بالخدمه

.... علاء محمود ...21/9

ندل ندل يعني ..............حتي في رسايله ندل


*

8- حبيبي يا باش مهندس

دعواتك جابت نتيجه ... انا نجحت ... نجحت

علي فكره انت اول حد اقوله

نور .... 10 /10 /2008

ايه ياد ده كله ... الف مبروك ... مع انك بعد كده مش عارف تكررها

اول مره واحد يقولي دعواتك جابت نتيجه اصلها دايما تيجي بالعكس


*

9-واحشني ... وبتوحشني ... وهتفضل توحشني .

.....مهدي 27/10


*

10- قولها يا رقيه

.....توته ..14/11

دا كان رد علي رساله بقول لوحبيت انادي لبنت اخويا اقولها ايه

دا لما رقيه شرفت


*

11- بجد انا تعبان قوي من غيرك .. نفسي حد يقولي اني صح بعدك انا بحبك قوي

.... احمد ....19/11


*

12- بمناسبة موسم رمي الجمرات بمني .. مطلوب شياطين جدد

ابعت سي في وصورتين

..... نور ....5/12

ماشي يا عم نور خد عندك الرساله دي

في مسابقه لاختيار اجمل تيس

قلت ابلغك اذا بتحب تشارك


*

13 -يرجي عدم الضغط الي اسفل الا بعد 3 ايام


قلنا بعد 3 ايام


بتكلم عربي بعد 3 ايام


لانك عنيد و دمك عسل عيد كريم قبل كل البشر

كل سنه وانت طيب

.... علاء محمود 5/12


*

14-لو حسيت انك محتاجلي

افتح الشباك واندهلي

هتسمع صوت بيقولك

" نام يا عبيييييييييييييييط "

... رقم غريب مريب عجيب


انا عارف هو يا علاء يا نور

ماهما اللي غاويين تهزيق فيا


*

15- في زحام الاعوام .. يمر العام بعد العام

وانا اقول لك كل عام وانت الخير لكل عام

...كرامه ..1/1/2009


*

16- بحبك حب لو طلع السما ينورها .. ولو نزل الارض يدمرها

ولو راح فلسطين يحررها

حمدي ....7/1


طاب ما تبعته فلسطين يا عم الحج مستني ايه








18- كل سنه وانت طيب ابعتلك حصان ولا عروسة مولد

انا هبعتلك عروسه ... علي ما تفرج

...حسين ..9/3


*

19- happy birth day وعقبال مييييييييييييييييت سنه

... كرامه 30/3


*

20- يسعد ربي صباح حبيبي

نور..... 11/4


*

21- احيانا نمتلك اشياء لا نعرف قيمتها الا بعد ان تتركنا

فما بالك ان كنت تعرف قيمتها وتتركنا فجأة فكيف تكون الحياه

... لولو....20/5


*

22- يا فرحتي برسايلك يا خويا دا بدل ما تشيعلي

حته مرود .. ولا اتر.. ترينج..

علي النعمه بحبك اكتر من عمرو دياب

....حسام ... 30/7/2009


ختامها مسك يا حسام عايز حته قماش

وترينج

وعمرودياب

**

كفايه كده بقي
طبعا دي مش كل الرسايل اللي جاتلي
بس دول اللي اختارتهم
لاني محبتش يكون البوست اطول من كده

الثلاثاء، يوليو 28، 2009

حدوته .......اهداء الي روح محمد الفارس


مكنش نصيبها تبقي حكاية ملتوته

وحدوته

ولا أحلام في قلب البحر

مكبوته

ولا شمس في مدارها بدور

ولا سكه وطريق من نور

ولا ضحكة بنات الحور

ولا في عيوني اشوفها

احلي بنوته


***

مكنش نصيبها تبقي اميرة الامرا

ولا غنوة

ودنيا رسمتها لبكره

ولا ف سمايا اجمل طيف

ولا ف كلامي احلي حروف

ولا منها فضل حاجه

غير الزكرى


***

ومنفعشي

اكون لك طيف

وماكملشي

واسمي يكون

صدي مبحوح

لاسمك بس ما وصلشي

لكنه ارتد

وفك طلاسم الاطلال

وشكلها نجوم في سماه

رسم بالنووور

ولون ضحكة بتزوق

خدود الورد

ولملم م الدموع حبات

وشكلها بقت لؤلؤ

علي وتر الجمال مرصوص

كأنه عقد

***

وكان حكم القدر يبقى

سكوت صوتك

نهاية كل حدوته

ورغم انك

هتفضل في القلوب عايش

لكن جوايا

ماتت ألف حدوته


*****

حاجه صغنونه كده قبل ما امشي


******

امتثالا بالمثل اللي بيقول

الضحك من غير سبب قلة ادب

والدنيا ايه غير شويه نكد فوق بعضيهم

وبكره النكد بكره

فغانا من موقعي هذا اؤيد دعوة صديقي


في الوست ده

وهو اعتبار يوم 10 اغسطس هو يوم للبهجه

يعني كل الناس تجهز بوستات خفيفه في اليوم ده

عايزين اليوم ده يبقي يوم كله ضحك




الجمعة، يوليو 24، 2009

اضراب .........23 يوليو


حد سمع عن إضراب 23 يوليو

( لاء ..... انا بقول اضراااب مش ثوره )

دا بقى إضراب قام بيه مجموعة من العمال الهنوووود

بس مش في الهند

لااااااء ...دا عندي في الموقع

اه اصل شكلهم بيتفرجوا علي قناة الحصيره كتيييير

(طاب وحياتكم لاشيل التلافزيون اللي مبوظ خلاقكم ده واحرمكم من اميتاب باتشان)

*****

الموضوع وما فيه اني رحت الشغل يوم الخميس 23 يوليو

لقيت العمال الهنود والبنغال كل واحد لابس الجيبه بتاعته ولسه ما لبسش هدوم الشغل

( اه والله ... اصل هدومهم العاديه عبارة عن قميص وحته قماشه ( ازار ) بيلفها علي نصه شبه الجيبه كده )

- ايش مشكل ليش ما في شغل الحين ( ايه يارجاله ليه مش شغالين )

- احنا سكّر شغل مهندس .. احنا في انسان مهندس ..كتير مشكل فيه ... انا ما في نوم

كيف شغل ....انا في انسان مهندس ما في سيم سيم حيوان ( احنا عاملين اضراب يا معلم لحد ما تتظبطوا معانا )


****

اول مره اقف هذا الموقف

طول عمري ببقي علي الاقل متعاطف مع الاضرابات

المرادي الاضراب معمول ضدي

يعني انا اللي لازم افض الاضراب ده

****

طبعا لبست عباءة الحكومة الرشيده وقلت اقلد الست عيشه

وافض الاضراب


المشكله أساسا انه مفيش شغل يعني المواقع واقفه بسبب التمويل

وانا كل يوم اقعد الصبح اخترعلهم في شغلانه يعملوها عشان ما يقعدوش من غير شغل

دانا ببقى ناقص اخليهم يهدوا المبني ويبنوها تاني ( سبع مرااااات )

يعني الاضراب ولا هيفرق معانا اصلا


بس بيني وبينكم انا خفت

اه مانا مش ناقص محمود سعد يشردلي في البيت بيتك

ولا احمد المسلماني يقطع فروتي في الطبعه الاولي

ويا خوفي من الجرايد الخضرا واللي هتكتبه

كله هيستلمني يا معلم

"الآلاف من العمال يضربون عند ابو العريف نظرا لسوء المعامله وطولة لسانه "

مع اني والله مؤدب معاهم ثم هما فين الالاف دول

دا كلهم 15 عامل

وعشان ابعد القيل والقال اضطررت اني اعقد صفقه دنيئه معاهم

وهي اني البي كل طلباتهم بمجرد ما تيجي اي دفعه ماليه من الاداره

وان ما لبيتهاش ساعتها يبقي يضربو ا ... هو احنا ورانا حاجه


المشكله اساسا انهم من كام شهر بيطالبوا بالطلبات دي

و نوعدهم ان اول ما تيجي فلوس نلبيها علي طوووول

ولما تيجي الفلوس كل واحد بيتلهي في عد فلوسه وبينسي طلباته


وكانت طلبات العمال تتلخص في

1-

2-

3-

4-

5-

ايه الفضول ده يعني لازم تعرفوا الطلبات

****

المهم اني بعد ما فضيت الاضراب

لقيتني بغني ( انا مصري وابويا مصري وكل مصري .............عليه)



الأربعاء، يوليو 15، 2009

ملك .......وكتابه

ازيكم يا بشر

انا جاي اهزر معاكم النهارده

والكلام ده هزار في هزار مش اكتر

اوعي حد يفهمني صح



انتي ياللي نور حيـــــــــاتي


دي الفاتوره بتيجي نــــــــار


قربك اغلي امنياتــــــــــــي


شكلي ناوي الانتحـــــــــــــار


مش بدوق النوم ليلاتـــــــــي


اصل اوضتي فيها فــــــــــار


عمري ما فكرت اسيبـــــــــك


دانتي احلي كيس فيشـــــــــــار


*******

ياللي ساكنه جوه قلبــــــــــــــي


واخده شقة بمطرحيـــــــــــــــــن


اوعي تمشي وتسيبينــــــــــــــي


فين اجار الاسبوعيـــــــــــــــــن


روحي يا روحي في ايديـــــكي


اه وماكلتش من يوميــــــــــــن


يالا ردي روحي ليـــــــــــــــــا


واعزميني في الحسيـــــــــــــــــن


*******


انت يا نجمه في سمايـــــــــــــــــا


والنجوم ولعة وجحيـــــــــــــــــــم


انتي يا قمري وهوايـــــــــــــــــا


والقمر صخر وقديـــــــــــــــــــم


عارفه ليه انتي منايـــــــــــــــــــا


اصل عقلي مش سليـــــــــــــــــم


دانتي كل حاجه عنــــــــــــــــدي


وبتغني عن حوجة اللئيـــــــــــــم


******


كل ليلـه بيكي بحلــــــــــــــــــــم


واصحي م النوم عالكابــــــــوس


ياما بسهرلك ليالـــــــــــــــــــــــي


مش بنام انا م النامـــــــــــــــــوس


ياما قلبي قال بحبـــــــــــــــــــــــك


ما الكلام مش بالفلـــــــــــــــــــــوس


نفسي اجيب الدنيا ليكـــــــــــــــــــي


زي عفريت الفانـــــــــــــــــــــــوس


******


واخيرا الكلام ده مش اهداء لحد

مع اني كنت عايز اهديها لناس كتير قوي

( وش بيلعب حواجبه )