الثلاثاء، مارس 17، 2009

يووووم ...في المطبخ ......(1)

السلام عليكم
لموضوع بتاع النهارده عشان الناس اللي ملهاش ف الطبيخ زيي
لكن لو حد بيعرف يطبخ بلاش يقرا
لانه مش هيستفيد حاحه
اما اللي ما بيعرفووووش 
اكيد هيستفيدوووو ا كتيييير

الحقيقه انا طول عمري علاقني بالمطبخ كمكان كانت لا تتعدي
اني بس كنت احب اسرق اللحمة من الحلل 
او بما ان شكلي اللي يشوفه لازم يقول علي هفتان وجعان وصدمان
فاصعب عليه ويروح مسلكلي حتتين لحمه كده ف الخباثة
ومن علي وش القفص كمان

اما علاقتي بالطبيخ نفسه فكانت علاقه غير مسبوقه
كنت كل ميت سنه لما اتزنق وافكر اعمل اي اكله 
وكان مصيرها يا اما تترمي
يا تترمي برضه
او ان كان  حد من اصحابي موجود وفكرت انتقم منه ولا حاجه
غير كده ماكنش ليه اي صله بالطبيخ

لكن بعد ما سافرت كان لازم اعتمد علي نفسي في موضوع الاكل ده
وبالفعل  في الاول اعتمدت علي نفسي
كنت كل يوم اتغدي في المطعم اللي قريب من الموقع
واخد عشاء وانا مروح
لحد ما واحد صاحبي مغترب زيي كده بيكلمني وبيطمن علي موضوع الاكل
ده فقلتله تني مقضيها مطاااااعم
قالي " يا ابني اعمل زيي كل ما ا تزنق 
اجيب شوية بطاطس علي طماطم علي بصل وتبقي صينية بطاطس
ما فيش اسهل من كده
- ايه داااااااه دا الموضوع سهل اهو امال انا كنت مصعب الامور ليه كده
وعنها ونزلت السوق
اشتريت حاجات تكفيني 3 سنين علي اساس اني هطبخ كل يوم بقي
مكنتش اعرف انها مره ومش هتتكرر وهضطر افتح
سوق خضار عندي في الموقع عشان ابيع الحاجات اللي اشتريتها زياده دي
واهو منه شغل ومنه تجاره
( ودا اول درس   هتتعلموه مني لو ما بتعرفوش تطبخوا )


جهزت نفسي ورحت لابس البالطو والطربوش والشورت والفانله والكاب
وجهزت عدة الطبخ
ورحت محضر صينيه كبيره ورحت حاطط البصل والبطاطس والطماطم فيها و.....
وو......................
وبعدين ...... اعمل ايه بعد كده
انا مش عارف اعمل ايه
-اه ما فيش غير اختي كيمو اللي هتنقذني
( ودا تاني درس .....لازم يكون ليك اخت اسمها كيمو تساعدك لما تحتااس )

- الوووووووو....كيمو  ازيك يا حبيبتي باختصار شديد انا بطبخ ومحتاج منك شوية مساعده كده
بس بسرعه والنبي عشان الفاتوره بتيجي نار
( ودي درس كمان ... لازم يكون تليفونك خط مش كارت احسن الرصيد يخلص والطبخه تبوظ)
- كيمو :  معقول يا حبيبي هتطبخ ..يا عيني ؟!!!
قولي هتطبخ ايه ووصلت لحد فين
انا : اه انا هعمل صينية بطاطس
كيمو : صينية بطاطس مره واحده
انا : ايه ده هي المقادير كتيره انا ممكن اقسمهم علي مرتين
كيمو : لا يا حبيبي مش قصدي بس قولي وصلت لحد فين
انا  : انا حطيت البطاطس والطماطم والبصل في الصينيه  اعمل ايه بعد كده ؟ 
كيمو   : حطهم بقي في الفرن
انا : في الفرن ......!! علي طول كده طاب ما الطبيخ سهل اهو امال انا كنت بقول صعب ليه 
 كيمو  : علي طول ازاي
انا : من غير زيت ولا سمن ولا بهارات والحاجات الغريبه دي
كيمو  : استني ياد يا محمد  انت مش حاطط سمنه او زيت
انا  :  لأ وبعدين البطاطس شكلها مبعجره قوي  والبصل ليه ورق ناشف كده
وكمان الطماطم فيها حاجات خضره طالعه من نص الحبايه كده ودا من ايه بقي يا كيمو
كيموو :  ايه داااااه  انت حاططهم زي ما هما استني يااااااد
انت لازم الاول يا حبيبي تقشر البطاطس والبصل وتقطعهم طرنشات وتحط زيت او سمن وترصهم فـ...........
انا  : استني  ....استني   اقشر البطاطس  دي عارفها بس ايه علاقة المجاري باللي احنا فيه ده
اه ولا انت قصدك علي حفر القواعد المنفصله للاسوار
كيمو  :  استني استني   ايه بس اللي بتقوله دا يظهر الشغل لحس دماغك
انا اقصد اعملهم حلقات
انا :  حلقات  وابقي اقعد اتفرج عليهم في رمضان ولا ايه
طاب اعملهم كام حلقه 30 ولا اعمل حساب يومين العيد معايا ؟ !!!
كيمو  : يا ابني اقصد دوايييييير
انا  : اه دواير طاب استني هدخل اجيب البرجل وجاي
كيمو  :  برجل ايه انت هتتجنني  ايه ما عندكش سكينه 
انا    سكينه .....! مش عارف هدخل اشوف العده اللي حوه دي
طاب تنفع سنجه   او ساطور ولا اجيب شفرة الحلاقه
اقولك فيه مسدس صوت
ولا اي حاجه من عده الخناقات اللي جوه دي
كيمو  :  مسدس ايه انت هتقتلهم  بقولك اقطعهم 
انا  :  ماشي طاب هسيبك بقي عشان  اعمل اللي انت قولتيلي عليه
كيموو :  استني .... انت عارف انت هتحطهم ازاي في الصنيه  ؟ 
انا :  ايه دا هما ليهم طريقه كمان
كيمو : اه هتحطهم علي طبقات  طبقه بصــ........
انا : اه عارفها دي طبقات مع الدمك جيدا بواسطه دكاك يدوي بحيث لا يزيد سمك الطبقه عن 30سم
ايه دا هو ردم برمال نظيفه
كيمو : امشي يااااد 
اعمل اللي تعمله  اقولك اطلب دليفري  ولا روح كل في المطعم اريحلك واريحلي

وطبعا نفذت كلام كيمو بالحرف الواحد وكمان حطيت الفراخ اللي كنت سالقها ومجهزها 
بس ما رضيتش اقول لكيمو عليها احسن تعقدني 
( اه طبعا في واحد بيقول اني حاطط الفراخ صاحيه  لا يا معلم انا اصلا شاريها مدبوحه )
وظبط الصينيه ورحت حاططها في الفرن

المره الجايه بقي هتعرفوا مصير البطاطس
ايه اللي هيجرالها وهيجرالي


هناك 65 تعليقًا:

BAsMA يقول...

ايه دة يافنان

هو دة الطبخ ولا بلاش
ربنا يستر على ولايانا
نصيحه منى:::

طلع الصنيه من الفرن ومتورهاش لحد وكولها لوحدك وبلاش حد يوشفك خااااااااالص
مش عايزين خساير ف الارواح كفايه المديات ربنا يكرمك

BAsMA يقول...

ايه ده انا اول تعليق

والتانى كمان ياحلاوة يا ولاد

BAsMA يقول...

وايه دة كمان التالت ياسلااااام

طب كويس والله

BAsMA يقول...

والرابع ده بقى رخامه

هيا طلبه معايا رخامة حد عندو اعتراض

اااااه بحسب يعنى

سلاااااموز بقى

mohamed ghalia يقول...

ههههههههههههههه
أكلة تفوت ولا حد يموووووووووووووت
عشان تحرم هههههههههههه

أبو العريف يقول...

BAsMA
ماشي يا بسمه
انا مش هتديكي منها
وبعدين مش تصبري لما تغرفي ايه اللي حصلها
وبعدين انا بفكر ما اقولش ايه اللي حصلها
وبلاش فضايح اكتر من كده

د. ياسر عمر عبد الفتاح يقول...

والله فكرتنى بنفسى لما بحاول أفتكس نفسى وأرتكب جريمة الطبخ لأنها غير إنها بتترمى ساعات بولع فى المطبخ والبيت

أبو العريف يقول...

BAsMA
لا يا ستي رخمي براحتك
محدش عنه اعترااااض

أبو العريف يقول...

mohamed ghalia
حرمت والله
بس هي ولا حد يموت
بس فيه حد اتخرب بيته في الفاتوره بتاعة التليفون

أبو العريف يقول...

د. ياسر عمر عبد الفتاح

لا والله يا دكتور
انا ربنا سترها معايا ومولعتش المطبخ
بس الافتكاسات احيانا رغم انها بتترمي
الا انها بتبقي ممتعه
وخاصة لو ليك اصحاب مقاطيع ياكلو اي حاجه
يا سلام بقي لو نجرب فيهم

ستيته حسب الله الحمش يقول...

ههههههههههههههههههههههههههههههههههه
ربنا يكرمك كان نفسي اضحك لأني متغاظة ومفروسة
انت ضحكتني حتى الدموع
ربنا يبارك فيك ويبعت ليك اللي ينقذك من الوحلة السودة دي

اهم حاجة الترنشات وعلاقتها بالمجاري هههههههههههههههههههههههههه

تحياتي

أبو العريف يقول...

ستيته حسب الله الحمش
كويس اني قدرت اضحكك
بس مالهاش لازمه الدموع دي
ولا انت متغاظه وبتتلككي

maha zein يقول...

يييييييييييييييي
محبش نظام التشويق ده
احب الحاجة علي بعضها

جهزت نفسي ورحت لابس البالطو والطربوش والشورت والفانله والكاب
وجهزت عدة الطبخ

هههههههههه
ده ايه ده ان شاء الله
هو ده الاكل اللى بيلبسوله

بس ان شاء الله تطلع حلوة وجميلة

مش ابو العريف اللى عاملها

حقودي يقول...

فضحتنا
ليه بس كده ياابني
.....
...
..
.
الحمد لله الحمد لله يعني
مش شكر في نفسي ولا حاجه
بس أنا الحاجه الوحيده اللي واقفه معايا
في موضوع الطبخ ده
هو طبق الجبنه بالقوطه
الا متعرفش بيتعمل أزاي يا كبير
:)
تحياتي

محمد عتلم يقول...

ايه يابنى الفضايح دى..؟ مالها الجبنه والطماطم ولا البيض والبطاطس المحمره ؟؟
انا عشت سنين كتير اوى لوحدى يمكن اكتر من 10 سنين وحاولت فيهم انى اعمل اكلات فى البيت بس فشلت فشلت فشلت . وكل مره اشترى لحوم وخضار يكفى عيله بحالها ويترمى طبعا عشان بيطلع فى الاخر اختراع كده زيد مبيد البنى ادمين بس فضلت ورا الموضوع والله سنين لغاية ماعرفت اعمل حاجات بسيطه كده على أدى
وعليها بأه ياريس .. بقيت لهلوبه وفتحت على الرابع وبقيت باعمل اكلات جامده .
لا يأس مع المطبخ ولا طبيخ مع اليأس
المهم انا مش عايز اطمن على البطاطس بتاعتك انا عايز اطمن على صحتك بعد ماكلت منها .. ولا رميتها ؟؟ انا شاكك ان قطط الجيران بتدعيلك من بعد الاكله دى بس فيهم كام حالة تسمم اكيد بس القطط بسبع ارواح متخافش عليهم. المهم ياكلو بطاطس وفراخ

fnoonh يقول...

هههههههههههههههههه
جميل قوي يلا خليك شاطر واتدرب عشان تبقى تطبخ لزوجتك ايوة افرض يوم تعبت ولا حاجة ولا طلعت مابتعرفش تطبخ هتعمل ايه هتقضيها ديليفري
لا يبقى تطبخ احسن بدل مايتخرب بيتك

ههههههههههههههههههههههههه

بس حلو انك تجرب الحياة تجارب والطبخ على فكرة سهل جدا جدا بس لو تحبه وتاخده على انه متعه بتستمتع وانت بتعملها

وربنا يعينك


على فكرة
انا جوعت
يلا بقى جيب الصينية
ولا مش ناوي تدوقنا

أبو العريف يقول...

maha zein
مش تشويق ولا حاجه يا مها
بس ما حبيتش اطول احسن تزهقوووووا
وعموما
مش هقولك طلعت عامله ازااااي
تشويق بقي
هه
بس

أحمـــــــــــــد أبو العلا يقول...

هههههههههههه
ايه ده؟
مسدسات صوت وحلقات رمضان؟!!!
ده مبقاش مطبخ
ههههه

على فكره كلنا هذا الرجل
كلنا سعات كده نحب نعك في المطبخ
انا بدعوك عشان تشوف العك بتاعي, كتبت عنه من فتره
http://ahmedaboelella.blogspot.com/2009/01/blog-post_27.html

مدونتك رائعه
انا ان شاء الله هلبد هنا عند باب البلوج بتاعك

سلامووووووز

أبو العريف يقول...

حقودي
جبنه بالقوطه
انت عديت بقي
يابني
انا بحاول اتعلم اسلق البيض بقالي خمس سنين
وكل نمره يطلع مش مستوي

أبو العريف يقول...

محمد عتلم
لالالالالالالالالالا
انا دلوقت بقيت ميه ميه ياريس
بعمل حاجات غريبه جدا
وبضطر اكلها
وبقعد اخترع اكلات عجيبه
وابقي عايز بس اقدم علي براءة اختراع
واهو كله ماشي
المشكله لني ساعات بعمل اكله وتطلع حلوه
اجي اعملها تاني معرفش
الا هو دا من ايه

أبو العريف يقول...

fnoonh
اساعد مين
انااااااا
لالالالالالالالالالالالا
صعبه قوي حكاية الطبيخ دي
انا بس هنا عشان مضطر
بس انا ممكن اساعدها اني
اكل الاكل اللي هتعمله
وبرضه هسرق اللحمة من الحلل
وبعدين دانا اتخرب بيتي تلفونات عشان البطاطس
تدفعي كام وتدوقي البطاطس
وبعدين دي لسه في الفرن

أبو العريف يقول...

أحمـــــــــــــد أبو العلا
ايوه يا معلم
ايه رايك تديني شوية لموووون
وتاخد طبق بطاطس واهو كل واحد ينتقم من التاني شر انتقام

شفقة هانم واحسان بك يقول...

يا راجل حرام عليك دى كده مابقتش بطاطس ...انت احسنلك المطعم وشراء العبد ولا تربيته
واوع تكررها تانى
تحياتى شفقة

رئـــــيسـة حزب الأحلام يقول...

هههههههههههههههههههه
ايه دة دة انت طباخ ماهر
بس سيبك احسن حاجة عملتها انك جبت دليفرى
ربنا يعينك
تحياتى

MǿиY El-Shreef يقول...

هههههههههههههههه

انا علاقتي بالمطبخ زيك بالظبط بس انا بعرف اعمل شاي والحمدلله :D

بس انت بجد حطيتهم زي ماهما ههههههههههههه

ربنا يكون ف عونك يابني

ونصيحه بلاش تاكلها خالص انت انزل المطعم الي جمبك واطلب نفر رز ونص فرخه ع الفحم وخلاص :D:D

صفـــــاء يقول...

لا مصير ايه بقى ما خلاص
مصيرها ومصيرك
هو نفسه مصير يوسف شاهين لما ولعو فى الكتب اخر الفيلم
مالك انت ومال الطبيخ
انت يعنى شايفها ناقصه عك ودعك
روح شوفلك أساس تحطه والا سملات ترميها والا حاجه
وابعد عن الاكل والنبى دة مفاضلش غيرة
قبل ما يقطعوة هو كمان

maha zein يقول...

والله انت لماح يا ابو العريف

انت الوحيد اللى خد باله من موضوع اني مبقتش اجيب سيرة المحروس الماجستير
تصدق اني من اول ما جيت من الغردقة وانا بستهبل اوي
وبقيت مكسلة اخرج اروح المكتبة
وعماله امثل وقال اقول هبدا من اول الاسبوع
ولا ببدأ ولا بتنيل

انت قلبت المواجع عليا ليه
اكونش اتحسدت؟
ولا اتصدمت من رحلة الغردقة

أبو العريف يقول...

شفقة هانم واحسان بك
انا فعلا حرمت
وبشتري من المطعم علي طول
دانا حتي بفكر اشارك الراجل في المطغم عشان
اكل براحتي بقي

أبو العريف يقول...

رئـــــيسـة حزب الأحلام
ايه ده
بقي كده
مش عاجبك طبيخي
دا حتي من النوع اللي الواحد بياكل
صوابعه وراه
بس من الغيظ

أبو العريف يقول...

MǿиY El-Shreef
ايه دا
حتي البنات
فيهم ناس زيي
الحمد لله مش الرجاله بس
اللي بيقضوها دليفري


موني
انت في السعوديه
انا حاسس انك يا فيها يا زورتيها قبل كده

أبو العريف يقول...

صفـــــاء
كده
طيب والله مانا مديكي من البطاطس
علي فكره
انا رميتها واشتريت من المطعم بطاطس تحفه
مش هعزمكوووووا عليها

أبو العريف يقول...

maha zein
بصىاحه اه
انت اتحسدتي
وانا اللي عمال احقد واجسد فيكي من ساعة
مات رحتي الغردقه واحنا لا
وكمان جايه عماله تحكي وتورينا الصور وتغيظينا
انا اللي حسدتك
هه
بس

ميرام يقول...

هههههههههه
لا بجد الهندسة مؤثرة
بيقولو
اذا دخل المرء كلية الهندسة ..
ترك ماتبقى من عقله على بوابتها ..
يارب مااوصلش للمرحلة دي ...
عشان احنا اللي هنطبخ في الاخر
هههههه
تحيــــــاتي
(لصينية البطاطس )

أبو العريف يقول...

ميرام

ايه دا اعتبر دا بجد يعني
الهندسه لحست دامغي
طاب لو عرفتي اني معماري
يعني كلنا ملحوسين الدماغ
هه
بس

بس خلاص ... يقول...

صينيه بطاطس مره واحده ايه الجرأه دى انت فاكر نفسك ابو العريف بصحيح
ايه ده انا شامه ريحة شياط ...الحقونا ياناس حريقه حريقه .ز انت حطيت الصينيه فى الفرن فاضيه نسيت الطرنشات ياهندسه

أبو العريف يقول...

بس خلاص
حمدالله علي السلامه
انت بتغبي فين

لالالالالالالالالالالالالالالالا
شيط ايه بس
المره الجايه تعرفي ايه اللي حصل

MǿиY El-Shreef يقول...

انا عايشه هناك ياعمووو :D:D

موجة يقول...

بصراحة يا ابو العريف انت اسم مدونتك على مسمى تخاريف ابو العريف
المرة دى سميها عك ابو عكعوك
هههههههههههههههههههههههههههههه
بس اقولك
حلوة العكة دى
ياريت الحلقة القادمة تقدملنا عكة المعكرونة بالبعشميل
اكيد هيكون ليها طعم مختلف يا استاذ عكعوك

أبو العريف يقول...

MǿиY El-Shreef
ربنا يرجعك بالسلامه
ويرجعني
الا عمووو دي علي اساس انك توته بنت اخويا
خلاص هعتبرك بنت اخويا
بس ابقي اتدحرجي شويه لتحت وانت تقري اللي كاتبه عشان خاطرها
من نوعية الرباعيات حقك

أبو العريف يقول...

موجة
طيب عشان خاطرك ما فيش حلقه تانيه بقي
وهقفل المسلسل علي كده
ال عك ابو العكوك ال
طاب دوقي البطاطس كده
مش هتنسيها في حياتك

طعمية سخنة يقول...

looooooooooooolz ya man
هههههههه جامد
فيه مسرحية اسمها عائلة سعيدة جدا بتاعة المنتصر بالله و امين الهنيدي و عصام حشيش
اتفرج علي حتة الطبيخ هههههههه
الحلو جيليه !!!!!!

MaNoOoSh يقول...

ياااااااااااااااااااااااه عليكم
هو انتوا لية كل ما تدخلوا المطبخ كدة لازم يتقلب معمل مفاعلات نووية
ههههههههههههههههههههههههه
وطبعا وتقريبا يعنى والله اعلم مصير صينية البطاطس معروف ولو انى متشوقة بردو اعرف عملت ايه بعد المكالمة

MaNoOoSh يقول...

وابقى تعالى اقرأ عندى موضوع قملة الأفكار والبرغوت عمار اللى نط اتحرق فى النار وهو بيتطافص على صنية البطاطس

أمبارح كان عمرى عشرين!!! يقول...

هههههههههه يا ابو العريف ياجامد

أبو العريف يقول...

طعمية سخنة
ايه دا بقي
مسرحيه
اوام ما لحقوا عملو مسرحيه عن صينية البطاطس بتاعتي

أبو العريف يقول...

MaNoOoSh
بقي كده
مصير البطاطس معروف
طاب انا مش قايل بقي طالما كل الناس عارفينه
هه
بس

وكمان البرغوت عمار
بقي هي بقت كده
طيب

MaNoOoSh يقول...

يابو العريف دة احنا بنضحكوا معاك ياراجل
وبعدين دة البرغوت عمار بيتأمر مش زيك خالص ابدا بوتاتا البته
وبعدين نحن نطالبك باخبارنا عن مصير الطرنشات المسكينة اللى هتتحط فى الفرن

أبو العريف يقول...

أمبارح كان عمرى عشرين!!!
متشكر يا مان
نورتني
بيس

شباك موارب يقول...

تستاهل عشان تطبخ تاني
طبعا اكيد اي حد\ مكانك هيزهق وانت معاك حق

اكل البيت برضو ياراجل بيوحش الواحد..

وبعدين ابدا ياعم بحاجه سهله مثلا صنيه مكرونه باشامي او حبه محشي مش صانيه بطاطس مره واحده

اعجبني الموضوع جدا وفي انتظار المزيد

أبو العريف يقول...

MaNoOoSh
ولا يهمك يا باشا
انا كمان بضحك معاكي
اما عن مصير البطاطس
اهم حلجه مصيري انا مش مصير البطاطس

أبو العريف يقول...

شباك موارب
حرمت افكر اطبخ تاني
بس فعلا انا قربت افرقع من اكل المطاعم

كان المفروض اه ابدأ بالحاجات اللي قولت عليها دي
حرام عليكي دا البطاطس اسهل حاجه ومعرفتش اعملها
شكرا
نورتيني

fashkool يقول...

الحكايه مش محتاجه كيمو ولا حاجه
انا باعمل احسن صينيه بطاطس فى العالم
ومش حد بياكل منها خالص
وباضطر ارميها فى الزباله
بس مش قادر اتوب
برضه بعملها
والعيال بيطربونى
والحاجه بتكرشنى ببره البيت عشان ببوظ لها الخزين بتاعها
اما انا باكل ضرب
تحياتى

انت تسال والكمبيوتر يجيب يقول...

دعوه
الأخ العزيز/او الأخت العزيزه
تحيه طيبه
برنامجنا الأذاعى عن النت والمدونات من الأذاعه الرئيسيه لمصر اى اذاعة البرنامج العام يذاع يوميا التاسعه وعشر دقائق صباحا عدا الجمعه
ندعوك لزيارة مدونتنا والتعليق على ما نطرحه من موضوعات وهذه التعليقات تذاع باسماء اصحابها فى حلقات برنامجنا

وبموقعنا رابط بالضغط عليه والأتنتظار قليلا وقت أذاعة البرنامج يمكنك الأستماع الينا
المدونه
http://netonradio.blogspot.com
الموقع
http://dear.to/cairo

فتافيت يقول...

تعرف اللي قاهر نفاسويتي ايه
الفرخة اللي راحت كده بلاش ومعدش لها لازمة
انت عارف كيلو الفراخ دلوقتي بقى بخماشر كنيه.. وانت ضيعتها اعمل فيك ايه بقى
انا بقولك من منمبر فتافيت طلع الصنية على الشارع عدل حتى ما تحولش تشمها لتكون مطلعة غازات سامة

وعوضنا على الله في الفرخة بقى
عااااااااااااااااااا

موجة يقول...

متشكرة اوى يا استاذ عكعوك على سؤالك عليا
ولازم بقى تكمل المسلسل مستنية اعرف العكة الجاية طعمها هيكون ايه
بس بجد احنا مش فاضيين خالص يا ابو العريف
ادعيلنا بدانا نسلم المشاريع
وربنا المستعان بقى

ايوشة يقول...

اتفرج على فتافيت وانت تبئا تمام دى قناة الطبخ الاولى فى العالم العربى :))
على فكرة الطبيح مش صعب بس الناس هى اللى بتصعبها على نفسها حتى البنات دلوقتى مكبرة دماغها

أبو العريف يقول...

fashkool
لا يا استاذي
الموضوع عندي الحمد لله ما وصلش للضرب
اصلي عايش الووووووووووووووووووووون

أبو العريف يقول...

فتافيت

يا ستي هي جات علي الفرخه
انت عارفه انا كلمت كيمو كام ديقيقه دولي
دا تاني يوم الشركه فصلت الخط عني

أبو العريف يقول...

موجة
مين عكعوك
ايه دااااااااااااااه
انتي هتسيحيلي بقي
وعموما احنا دايما بنسأل عليكم
ياكشي يطمر
هه
بس

أبو العريف يقول...

ايوشة
اتفرج
انا ينفع معايا فرجه
انا عايز حد يطبخ وانا بس اكل
وكمان هتعب

شريكة في المطعم يقول...

لا لا انا مليش في الطبخ
ومبحاولش اروح المطبخ اصلا
رحم الله امرئ عرف قدر نفسه....

أبو العريف يقول...

شريكة في المطعم

ايه دا بقي
يبقي انت شريكه في المطعم بالفلوس بس
وما فيش اي مجهوووود
طيب انت شريكه في المطعم
يعني ما تحمليش هم الاكل
تحياتي

ঔღঔ نـــوارة ঔღঔ يقول...

ههههههههههههههههه
هههههههههههههههههههههههه
هههههههههههههههههههههههه

خلاص قربت اموت من الضحك

كل دا على صينية بطاطس وكمان جننت اختك عالفاضي وياريتك عرفت تعملها هههههههههههههه

الطبخ سهل اوووي وفن اقووولك لو حبيت تخترع حاجة

ادخل عالنت وهتلاقي شرح الاكلة بالتفصيل الممل وبالصور يعني مزبطينك عالاخر

او ممكن تستفيد من خبراتي وتدخل مدونتي وتتعلم تطبخ بس ربنا يستر ومتولعش بالبيت هههههههههههههههه

ربنا يعينك على اكل المطاعم ياخويا

مع اني بحبه اووووووووووي هههههههههه

بالتوفيق يارب وعقبال ما نشوفك اكبر طباخ بالدنيا ههههههههههه

أبو العريف يقول...

ঔღঔ نـــوارة ঔღঔ

سهل ايه بس
انا كنت فاكر كده
انا ابصم بالعشره دلوقت
واقول الستات دول بيتعبووووو اوي

كمان النت
دا اختي كانت بتشرحلي علي الهواء مباشرة
وبرضه ما عرفتش

نظره عين يقول...

ابوووووووووو العريف على فكره انا اول مره اكتب تعليق عند اى حد بس بجد جميل اووووى البطاطس اللى اتحرقت دى انا بقى دخلت وقلت هااكل وكده خصوصا انى كنت جعانه مووووت بس الله يسامحك انت بجد شبعتنى عموما فرصه تانيه ف حاجه اكبر بقى بس يلا انا دخلت مدونتك ع اساس انها اسمها ابو العريف ماكنتش اعرف انك بجد ابو العريف