السبت، أبريل 24، 2010

إعلانات مبــــــــــــــــــــــوبة


للبيـــــع
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

مدونة للبيع
ــــــــــــــــ

بما اني بقالي فتره كبيره مش عارف اكتب ولا اقرأ اي حاجه فقررت ابيع المدونه
واللي مواصفاتها كالتالي

لاعلي سعر
مدونه مصريه ترفيهيه ثقافيه مهلبيه ميه ميه
مدونه فاخره ساخره زاخره باخره
مدونة بسيطه حويطه غويطه عبيطه

مدونة تخاريف ابو االعريف مدونه شرحه وبرحه وتحتوي علي الكثير من التخاريف
فاتحه علي البحري وقريبه من المواصلات
احلي جيران حيث يحدها من الشمال شاب فقري ومن الجنوب كيكي عووووووووووووووووووو
ومن الشرق احوال الهوي وتخاريف ايوشه وعالم مولان ومن الغرب مش عارفه بس نفسي اعرف
والشارع كله مدونات جامده بصو كده عالشمال

والمفاهمه مع البواب


حلم للبيع
ـــــــــــــ
لعدم الجدوى والجديه ولظروف السفر حلم للبيع
حلم بسيط وصغير وبرئ ولسه جديد استعمال مهندس
مقاس small بس للي عنده استعداد يكافح عشان حلمه
حلم مهوش مستحيل بس صاحبه نفسه اتقطع


مطلوب
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

مطلوب عروسه
ـــــــــــــــــــــــــــــ
مطلوب عروسه ( ليا انا طبعا ) بالمواصفات التاليه
- قصننه
- مجنونه
- بتعرف تقشر برتقان
- بتلبس كوتشيات

من يجد فيه المواصفات فليتفضل بارسال ( cv ) وصورتين 6*9
علي العنوان التالي
( السعوديه - الدور الثاني )
ملحوظه : -
لا يشترط الخبـــــــــــــــــــره


وظائف خاليه
___________________________________________

مطلوب فورا

مدرب للاهلي
_______

اي حد ان شاء الله حتي اي وزه علي راي عبله كامل
اهو اي حد والسلام عشان نستريح من حسام البدري ده


رئيس جمهوريه
________

مطلوب رئيس جمهوريه معاه عصايه سحريه
تقدر تغير حال البلد تقدر تقضي عالفساد تقدر توحد الناس وتلمهم حواليه
تقدر تصلح الاقتصاد والتعليم والصحه والنقل والمواصلات
تقدر تتقدم بينا او باي حد المهم تتقدم
تقدر ترفع اسم البلد
تقدر تعيشنا ف حريه من غير طوارئ ولا تعذيب
تقدر تحل مشاكلنا من فقر لبطاله لجهل لمرض
كفايه كده احسن تعبت اكيد كلكم عارفين الباقي

ملحوظه :-
يشترط خبره لا تقل عن 30 سنه


هناك 23 تعليقًا:

Me7'o يقول...

يا نهار تهييس

طب والله أحلى بوست هيست فيه يا أبو العريف

Me7'o يقول...

سؤال بسيط بس

هو تقشير البرتقان عاملك مشكلة كبيرة قوى كده

بيقولك اللى بيحلم بواحدة تقشرله البرتقان يبقى ربنا هايرزقه بواحدة تنتف ريشه

هههههههه

فتاه من الصعيد يقول...

اوعى تكون هتقفلها ... هزعل بجد

ربنا معاك وتلاقي كل اللي بتتمناهم

تحياتي

موجة يقول...

مطلوب عروسه
ـــــــــــــــــــــــــــــ
مطلوب عروسه ( ليا انا طبعا ) بالمواصفات التاليه
- قصننه
- مجنونه
- بتعرف تقشر برتقان
- بتلبس كوتشيات

انت مش قولت لى انك لاقيتها
ولا باينك بتشتغلنا يابو العريف
عموما ربنا يوفقك ويوقفها فى طريقك

كيكى عوووووو يقول...

ربنا يكرمك ببنت فاكهانى
وخريجة مستشفى العباسية
ويكون قربيها بتاع جزم
ويكرمك كتيرررررررررررررررررر اوى وتحقق حلمك يااااااااااااااارب

منــار فايد يقول...

انا قررت أشتري
بس انت ماقلتش عايز فيها كام؟؟

هيا تسوى كتير؟؟؟

أشتريها منك بحله محشي
وصنيتين مكرونه باشامل
وربع فرخه
((ملاحظه انت بتحب الصدر ولا الورك)
عشان اعمل حسابي في القطعيه....


بمناسبه الطلبات التانيه
واضح انك عندك امل المدونه تجيب كتير
وبتمنها تتجوز وتشتغل وتعيش
عشان كدا اقولك
انسلى كل الاحلام الباقيه

وخليك في المدونه
واول سعر عالي

بيييييييييييع

ستيتة حسب الله الحمش يقول...

كل ده من السعودية
لأ بقول لك ايه
اخشوشن كده وشد حيلك
هانت خالص مالص

ولو ع المدونة المدونين مفلسين وكله بايع مش شاري
ولو ع العرايس البنات كتير بس المشكلة نجيب منين واحدة تجيد تقشير البرتقال؟ :)

الشـوكة الــنـاعـمـة يقول...

ههههههههههه
موتنى من الضحك بجد
ممكن اعرف مقاش الكوتشى كام
يمكن اجيب لك عروسه
تحياتى

قلم رصاص يقول...

انا جاهز أشيل
هههههههههههههههه

ايه ياعم انت جرالك ايه بس
مكنت كويس وكان فاضل لك 20 سنه وتحقق كل احلامك ههههههه

ربنا يسهل لك امورك قريب

بس صحيح ايه حكاية تقشير البرتقان دي؟

انت غريييييييب ياهاني غررررررريب

ههههههههههههه

تقبل مروري وتحيتي

well يقول...

الحلم عمره ماكان للبيع ..

مدرب للاهلى ..رئيس جمهورية ..لا ياعم يفتح الله

تحياتى

أحــوال الهـوي يقول...

انا شاري يا ابو العريف
لان المدونه دي ما ترحش لغريب
و تقعد فيها برضه و تسد دينك براحتك انت احلي جار و اشتري و جودك بالغالي

العروسه موجوده طول عقلة الصباع يعني خاتم في صباعك و بتعرف تقشر عصير البرتقان و الصورةموجوده بس عايزة النفس اللي تشوف

و رئيس الجمهورية نسيت تقول ان اول حرف من اسمه حسني مبارك

تحياتي

رجل تحت الصفر يقول...

لا و الأهم

الملحوظة الأخيرة

"خبرة 30 سنة "


----------------

كان فيه صورة جميلة جدا و عجبتني لمدون مش لاقي حاجة يكتبها شوف صاحبه قام قال له ايه

http://lh3.ggpht.com/_IXL-kwIONmc/S9UIgn0HjnI/AAAAAAAAATg/rlCskgaxLeo/nothing-to-say.gif

بالله عليك لو جت لك بيعة للمدونة اوعى تبيعها

اجرها احسن ...اجرها قانون جديد

كيــــــــــــارا يقول...

ههههههههههههههههههههههه

انا اشتري المدونة يلا تدفع كام




يوه اقصد عاوز فيها كام :)

*********

الحلم ايه بئااااا

******

ياجدعان الباشمهندس هيموت ويتجوز

حدش يعرفله عروسة :-p

*******


اما الوظائف الخاليه فمليييييش فيها اطلاقا

المهندس يقول...

بصراحة ... دمعت عيناي من الضحك بعد قراءة البوست ... وكاد الجيران ان يطلبوا الشرطة من ضحكي بعد تعليق ميخو

اجمل بوست ... واجمل ابو العريف ... واجمل ميخو ... انت دعيت في العمرة انه دمك يزداد خفة ولا ايه ؟

هكمل الرد علي البوست بينا وبين بعض ... سلالالالالالالالام دلوقتي

sony2000 يقول...

طب وليييييييييييييييييه بيع المدونه بس
هي دخلت نظام الخصخصه ولا ايه:))

رنونة حكومة ميخو يقول...

لاعلي سعرمدونه مصريه ترفيهيه ثقافيه مهلبيه ميه ميه مدونه فاخره ساخره زاخره باخره مدونة بسيطه حويطه غويطه عبيطه

ههههههههههههههههههه

عشان نستريح من حسام البدري ده
اه والله ده خنقنى فى ماتش الزمالك

ربنا يرزقك بعروسة تقشر برتقان وبطيخ وشماام وكنتلوب كمان :)

ضحكتني ع الصبح والله

محمد عتلم يقول...

والنبى يا بو العريف
شوف لمدونتى معاك بيعه
الهى يارب يكرمك ... بيعهم بيعه وحده
اقوللك ... بيع مدونتك واديله مدونتى مجانا

ђager ZaǮbal يقول...

طيب يا تري هتبيع بكام ؟؟

:))))))))

مهندس مصري يقول...

تصدق بجد الواحد بقى له فترة لا عارف يكتب حاجة و لا يقرأ لحد و حالته عجب
بس إعلانات دمها خفيف
:)
ربنا يوعدك بالعروسة المطابقة للمواصفات و المخططات المعتمدة :))

mohamed ghalia يقول...

واضح انك هتتشد ياباشا
هههههه

خواطر شابة يقول...

انا يمكن حأشتري منك الحلم الصغننن فحلاوة الحياة تكون عندما نعيش لتحقيق هدف
سعيدة بالتعرف على مدونتك وان شاء الله يدوم التواصل
دمت بكل ود

ليس فقيرا من يحب يقول...

ايه يا محمد

هتهاجر وبتبيع فى العفش بتاعك ولا ايه

انا هاشترى منك حلمك وهاشترى المدونه

بالمبلغ اللى تحدده بس هارجعهملك تانى

واهو ابقى اخدت ثواب انى افك حاله الفلس اللى انت فيها

وهاكلم بابا على موضوع الاعلان بتاع

الرئاسه ده بس المشكله فى العصايه نجيبها منين

دا الشعب ده عايز ولا 80 مليون عصايه لما مشاكله تتحل

وبالنوسبه للعروسه فبيتهيألى انك

تخفف الشروط شويه وتكتفى بانها تكون بتقشر سفندى

اما بالنوسبه للمدرب فانا اعرف الواد حماده ابن بربره جارنا هههههههههههههه بيتهيالى ده انسب واحد يدربلكم الفريق التعبان ده يمكن تتعدلوا شويه


هههههههههههههههه
ربنا يحققلك كل احلامك

أحــوال الهـوي يقول...

ايه الرومانزيه دي كلها

ايييييييييييييييييييييه

و الله يا باشمهندس انت عليك كلمات جميلة تنفع تحب و تتحب و بعدين ما تصرش علي تقشير البرتقان مشيها عصير

بس بصراحه كلمات جميلة فكرتني بشبابي

مش عارف ليه لما اعلق عندك ماباقدرش اتكلم الا بهزار يمكن لخفة دمك

تحياتي