الجمعة، فبراير 05، 2010

هبطل الســـجاير


نفسي ابطل السجاير واكون انسان جديد

بس ما اقدرش اوعد بموضوع الحديد ده عشان خلاص يناير عدي

طبعا الموضوع محتاجله شوية اراده قويه

علي شوية اصرار وحبة عزيمه وتحدي

وطبعا الحكايه مش حكاية نيكوتين او قطران

وكلام من ده

الموضوع موضوع تعود


يعني مثلا الواحد بيتعود انه دايما في حاجه محشوره بين صوابعه

او بين شفايفه طول الوقت

وبعدين مين يقدر يقاوم فكرة انه ينفخخخخخخخخخخخخخ

الله علي شكل الكلام وصوتك وهو خارج مختلط

بالدخان القرمزي ( عمرك شفت دخان قرمزي )

( ثم هو ايه اللون القرمزي ده اصلا )

واللي بيرسم خطوط افكارك قبل ما تتلاشي

في سماء الغرفه ( علي اساس انه مفيش سقف )



لأ والولاعه

انا مقدرش اتخيل حياتي بدون ولاعة

وافرض حبيت اولع روما بحالها

اعمل ايه

اقول والنبي ناولوني الولاعه ما ولاعتي في جيبي واديها


طبعا غير برستيج العلبة المارلبورو جمب الموبايل والمفاتيح

تبقي عامله احلي شغل ف القعده

حتي لو اللي جواها سجاير كلوباطره او حتي فررررط



طبعا احساسك وانت خرمان ومعاكش سجاير

وييجي واحد يحييك بسوجاره احساس لا يمكن وصفه

اوعىىىىىىىىىىىىىىى

وللا في رمضان بقي وانت قاعد مش طايق كلمه من حد

وبتخانق ف طوب الارض

اصلك خرماااااااااااااااااااان



نفسي ابطل السجاير واكون انسان جوديد يا جدعان

بس المشكله مش في الاراده ولا الاصرار موجودين الحمد لله

المشكله اني مش بشرب سجايراصلا

مش بدخخخخخخخخخخخخخخن من اصله

طاب ابطلها ازاي

*****

اللي عايز اقوله من التهييس اللي فوق ده

ان الواحد فيه حاجات كتيره بيعملها

وبيبقي عارف انها غلط ومش بيحاول يغيرها

لانه اتعود عليها

انا كمان في سلبيات كتيره قوي عندي

منها اللي قدرت احط ايدي عليها وبحاول اغيرها

وساعات بنجح وساعات لا

ومنها اللي مش شايفها

وبستني حد قريب مني يدلني عليها

هناك 72 تعليقًا:

غير معرف يقول...

لو كنت بدخن ماكنتش بطلت السجاير ابدااااااااا :)

تحياتي

غير معرف يقول...

اهم حاجه ان الانسان يكون عنده قدره علي التغيير .. ويكون فعلا من جواه عايز ومستعد يتغير ..
ساعتها بس هيتغير :)

Arsenal Way يقول...



إيه يا عم انت هتشتغل الناس .. الناس كلها كانت متعاطفه معاك عشان نفسك تبطل و مش قادر و في الاخر طلع السبب انك مش بتشرب هههههههههههه

عموما فعلا في كتير في حياتنا غلط و احنا عرفينوا غلط و مش عارف ليه مش بنبطله
و انا اول واحد نص حياتي غلط انا عارفه و مش بغيره للاسف

ليس فقيرا من يحب يقول...

هههههههههههههههههههههه

مساءك سكر يا ابو العريف

ههههههههههههههههههه والله بوست زى العسل

انا قعدت اقول فى عقل بالى لما المشكله مش فى الاراده اومال المشكله فى ايه يا جدعان اتاريك مبتشربش سوجاير اصلن ههههههههه
بص كلنا بشر جوانا الحلو والوحش وجوانا
السلبيات وجوانا الايجابيات وبعدين فى حجات الواحد بيحاول يغيرها مبيعرفش وحجات الايام اللى هيا اللى بتغيرها فينا غصب عننا
بس طالما الناس بتحاول تتغلب على عيوبها وتخفف سلبياتها فده فى حد ذاته حاجه كويسه قوى ويكفينا ثواب مجاهده نفسنا وطمعنا فى اننا نكون احسن
وده برده بيدل على ان جوانا نضيف
وفينا الخير
يلهوى على الرغى
تسلم ايدك

واقعد بالعافيه

maha zein يقول...

ما انا اتخضيت
بس ربنا سترها
بوست غريب شوية في طريقته
حساه مختلف شوية في لهجته
ولا انا لما غيبت اختلفت ولا ايه

ربنا يبعد عنك وعن شباب المسلمين السجاير واي حاجة بتتنفخ
حتي لو بلالين

Kiara يقول...

لوك لوك لوك لوك ايه دا ايه الرغي دا
وبتقولو البنات هي الللي رغاية

لالالا لازم تعالج نفسك اوعي اوعي تسكت عليالموضوع دا لايجيلك كساح من كتر الكلام ولا حاجه ههههههههههههه هيبقي منظرك تحفه ساعتها

ياااااااااااااااه

كل دا رغي مش ممكن مش ممكن ايه الرغي دا

هههههههههههههههههه

جد شوية اهو الرغي دا بئا اللي هموت واتعالج منه اصله الشجاير بتاعتي

:)))))))

لا بجد البوست تحفه ويارب كلنا نقدر نحط ايدينا علي العيب ونصلحه ومش نسكت عليه

ومن موقعي هذا انا قلت عيبك من زمان لكن للافس مش عارف تصلحه يااااااا لو صلحته هتبقي ولا شعبان عبدالرحيم في زمانه :-p

سمع هوص (Abo 3li) يقول...

اول زيارة ومش الاخيرة ان شاء الله
وانا كمان عاوز ابطل السجاير ... رغم اني مش بدخن................................................................................................

د. ياسر عمر عبد الفتاح يقول...

ربنا يعينك عليها وتقدر تبطلها
محتاجة شوية إرادة وتصميم بعد الدعاء والإعانة الإلهية ,, وعلبة شامبيكس بتاع فايزر :)

rony يقول...

انت عندك اراده وقويه كمان
بس هى البدايه بتكون صعبه شويه
لكن اكيد هتحاول وهتقدر
مش بس فى السجاير وفى السلبيات التانيه كمان
يا ريت كلنا نكون فى عيوننا نظره
واضحه وصريحه نشوف بيها سلبياتنا ونحاول نتغير
اشمعنى انت يعنى ؟
تحياتى

غير معرف يقول...

لو على السلبيات فا حياتنا كلها مليانه حاجات سلبيه

ممكن تحسبها من اول ما تصحى من النوم لحد ما تنام تانى وحتى وانتا بتنام وبتحلم ممكن تكون بتفكر تعمل حاجات سلبيه تانى يوم

ممكن تبقى نايم ونفسك تقوم تشرب سيجاره ودى اقل حاجه

ماجتش على السجاير

خلينا نطور من حياتنا واحده واحده

نبدأ بحياتنا من الاول ونعيد بناء اللى فقد

أبو العريف يقول...

فتاه من الصعيد

ليــــــــــــــه

ما تقوليلي قبل ما ابطل

منوراني

أبو العريف يقول...

Hager Za3bal

والاهم انه يحاول يهاجر

لان اوقات بنبقي عايزين نتغير ومش بنحاول

منوراني

أبو العريف يقول...

مصطفى أبوزيد

ازيك يا درش

انا عارف انك انت كمان عايز تبطل

بس مش السجاير

هههههههههههههههههه

الفلك سجاره يا ريس بمناسبة اننا بطلنا

والله الناس ممكن تصدق فينا

منورني يا عم

Remas يقول...

كدا ؟

وانا اللى اعدى اشوف طريقة اقولها لك علشان تبطل السجاير

هههههههههه

بس البوست جميل وفكرته حلوة

هو فعلا السلبيات اللى فينا واللى لازم نتخلص من التعود عليها زى موضوع السجاير بالظبط محتاجة ارادة وتحدى ذات

بويت لذيذ بجد يا باشا

أبو العريف يقول...

ليس فقيرا من يحب

مساءك سكر يا رانيا

مش عارف والله اقول ايه بعد الرغي ده كله

قصدي الكلام الجميل ده

دا تعليقك احسن من البوست

وكلامك مظبوط

بس لو حبة سكر يبقي زي الفل


منوراني يا عم الحج

أبو العريف يقول...

maha zein

الداكتوره مها عندنا

يا مرحبا يا مرحبا

لا ما تتخضيش انا بس بهزر

بس مش عارف البوست لهجته متغيره ازاي

يمكن عشان بقالي كتير ف السعوديه

نسيت اللهجه بتاعتي

ههههههههههههههههه

ربنا يكرمك يا رب

منوراني

أبو العريف يقول...

كيــــــــــــارا

لوك لوك لوك

انا اللي رغاي برضك

يا بنتي دانتي كاتبه بوست مش تعليق

ههههههههههههه

لا طبعا هتفضل الستات

رغايااااااااااااااااات

نكديات

جد شويه

مفيش جد من النهارده مفيش جد

انا جدووووووووووووووو


منوراني يا كيارا

فين من زمااااااااااااان

أبو العريف يقول...

سمع هوص (Abo 3li)

يا مراحب

طبعا منورني ويارب متكونش الاخيره

ربنا يقدرك وتبطل السجاير

اللي مش بتشربها دي

أبو العريف يقول...

د. ياسر عمر عبد الفتاح

منورني يا دكتور

بس احب اقول اني مش هبطل سجاير بالعند فيك

اه طبعا

مش هبطل



اصلي مش بدخن

أبو العريف يقول...

rony

ازيك يا روني

متشكر جدااا

طبعا ربنا يقدرنا كلنا ونغير سلبياتنا

وربنا يدينا الاراده والعزيمه

ونقدر نصلح من نفسنا

تحياتي

أبو العريف يقول...

مستخلص افندى

معاط حق طبعا يا باشا

مفيش اكتر من السلبيات

بس ربنا يقدرنا ونقدر نصلح من نفسنا

منورني

قلم رصاص يقول...

ههههههههههههه

ابو العرارررريف
ازيك؟

البوست دا شدني اوي وتعطفت معاك جدا
وكنت خلاص هعييييييييط عشانك هههههه

الاقيك في الاخر مشكلتك انك مش بتشرب سحاير عشان تقدر تبطل .. مشكلتك انك بتدخن بس !!!

بس بجد ربنا يعينك وتبطل السجاير
بلاش وجع قلب ياعم

ربنا معاك يارب

تقبل مروري بدون نفس

د. ياسر عمر عبد الفتاح يقول...

ياباشا أنا قريت البوست كله
بس مع ذلك مفهمتش إنك بتقصد من كلمة التهييس ,, إنك مش بتدخن
بس أنا قريت البوست كله
مش من عادتي إني أعلق بعد ما أقرأ العنوان علشان أثبت حضور
وخاصة معاك يا هندسة :)

يلا حصل خير
المهم إنت عامل إيه؟
من زمان مجتش عندك ولا علقت

ستيتة يقول...

يا مزاجك العالي

ده انا رحت معاك وجيت وطلعت ونزلت

بس المغزى روعة بجد
ياريت كل واحد فينا يجد صديق مخلص صادق يهدي له عيوبه
وياريت لو عرفها يشتغل عليها
وياريت ربنا يرضى عنا ويعافينا من كل ابتلاء

بوست حلو قوي
وها ابطل السجاير
بس لما يجي يناير :)

القدر و انا يقول...

ابو العريف
كتبت تعليق طويل البلوج لطشه منى
صعب اننا نتخلص من العادات السلبية
واصعب اننا نستمر فى التمسك بالعادات الجميلة التى نريدها
لكن النتيجة اذا تحدينا الصعب وانتصرنا على الاصعب مذهلة
تغيرنا الى الافضل
تزيد احترامنا لانفسنا قبل ان تزيده عند الغير
واحنا المصريين ما شاء الله عندنا كم رهيب من العادات السيئة منها
عدم الهتمام - بالرياضة- والصحة احترام المواعيد احترام - خصوصية الاخرين
ييييييه ماتعدش
تحياتى

غير معرف يقول...

ياريت بجد اللى بيدخن السجاير يبطلها لانة بيئذى غيرة اللى ملهوش ذنب انة يشم ريحة دخانها الفظيع ويكتم على انفاسة

وانا بكرة السجاير ايوة بكرهااكيد

واللى مايشربها قصادى يبقا يوم فرحة وعيد

نـــوارة فــن الجمــال يقول...

ههههههههههههههه

افففففففف ريحة السجاير وحشة

متتصورش بكره التدخين اد ايه ريحته وحشة :]

الحمد لله انك مش بتدخن بفرح اووي لما اشوف شباب زي الفل وملهمش بالهبل دا :]

مفيش حد مفيهوش سلبيات او عنده عادات غلط ومتعود عليها وصعب يبطلها بس يبطلها ازاي هي دي المشكلة

محتاج ارادة قوية وعزيمة ومداومة بس مشكلتنا بنعرف انه دا غلط وبرضوا مش بنبطله

غلاسة كدا :]

واحنا جبت تشبيه جامد لانه السجاير اصعب حاجة و الشباب مش قادرة تبطله خالص

ربنا يبعدنا عن كل حاجة وحشة

دمت بحفظ الرحمن

ابو على يقول...

انت عارف انا بقالى 15سنه بشرب سجاير

نفسى اعرف فرق الاحساس بين اللى مبطل سجاير وبين اللى بيشرب

مش بمزاجى يقول...

تول انا اتخضيت من البوست
مش عارفة ليه
مع انى مقريتش عند حضرتك كتير
بس مش متخيلة ان حضرتك ممكن تكون بدخن
يمكن تجميع ملامح الشخصية من الكلام هو االى ادانى الايحاء ده
وبجد الى عاوز يعمل حاجة بيعملها
انا هقول لحضرتك مثل بسيط
انا والدى كان بيدخن عشرين سنة
تقريبا من وهو فى الجامعة
ولسه مبطل سجاير من حوالى سنة
ولوحده والله لا راح لدكاترة ولا حتى اى حاجة
كل الى حصل ان اخويا اتكلم معاه شوية
بعدها بحوالى اسبوعين لاقيناه بيقول انا هبطل السجاير وفعلا بطلها ومرجعلهاش تانى
شكرااااااا لحضرتك على فكرة البوست الجميلة

لاسع افندى يقول...

ايه رأيك نتعلمها سوا علشان نعرف نبطلها
ههههههههه


تحياتى

رضا الكومى يقول...

طب إفرض معرفتش تبطل السجاير اللى انت ما بتشربهاش
هتعمل إيه ؟؟؟؟؟؟؟؟

mohamed ghalia يقول...

أكيد معاك حق
احيانا كتير بيكون الصح قريب مننا قوى بس برده مش بنشوفه

غير معرف يقول...

لاني من النوع اللي موش بيغير عاداته حتى لو قاتله :)

تحياتي

Unknown يقول...

الله! الله! الله
هى شحططة وخلاص:)
لمّا أنت ما بتشربش
بكتب كل الكلام دا ليه؟:)
قاتل الله التعود ياابو العريف
العارف كل حاجةالتعود هــو أول
الداء وأساس البلاء (بعيد عنك)

Unknown يقول...

ايه الاشراف على
التعليقات دى
ياابووووووو
لو كنت بتشرب
سجاير دلوقتى
كنت عرضت عليك
خرطوشة بحالها لأجل
تشيلوووووووووووهـ
(بأختصار رشوة يعنى
بأختصار ومن غير كسوف:)

حـــلـــم كـــان يقول...

عندك حق يعنى لو الواحد جيه يولع روما هيعمل ايه

صدق انت هتخلنى افكر اشرب سجاير عشان الموضوع ده

أحــوال الهـوي يقول...

خضتني يا كابتن
قلت هو محمد بيدخن
بس انا ما شفتوش بيدخن
بس كلامه بيأكد ان مدخن
بس انا متأكد انه مش

و في الاخر طلعت بحكمة من بين رماد السيجارة و الفلتر

خلتني اكح

تحياتي

Unknown يقول...

انت ضحكتنى جامد على فكرة

أبو العريف يقول...

قلم رصاص

هههههههههههههههه

ازيك يا باشا

انا مش بشرب سجاير ولا بدخن يا عم

اكتبها ازاي دي

هههههههههههه

ربنا يصلح حالنا جميعا

منورني يا باشا

أبو العريف يقول...

د. ياسر عمر عبد الفتاح

منورني للمره التانيه علي التوازي يا دكتور

والله يا باشا انا استغربت

بس هي طريقة البوست غريبه يظهر اني معرفتش اوصل الفكره

دا اذا كان فيه فكره من اصله

هههههههههههههههههه


منورني يا دكتور

أبو العريف يقول...

ستيته حسب الله الحمش

ازيك يا دكتوره

مين مغزي ده

هههههههههههههههه

تسلمي يا دكتوره

ربنا يقدرنا ويصلح حالنا

منوراني

أبو العريف يقول...

القدر و انا

ههههههههههههه

ولا يهمك

هو بيعملها معايا علي طووووول


فعلا العادات السيئه كتير جدااا

وربنا يقدرنا ونقدر نتحكم فيها

منورني

أبو العريف يقول...

غير معرف

ربنا يصلح حالنا جميعا

ويقدرنا علي ترك كل العادات السيئه

أبو العريف يقول...

نـــوارة فــن الجمــال

ازيك يا نواره

انا كمان بكره ريحه الدخان جدا

والمحاسب اللي ساكن معايا بيشرب خمشاشر علبه سجاير ف اليوم

ودايما كان معبأ الشقه

بس الحمد لله دلوقت مقضيها تحت ف المكتب

ومعبأ مكتبه دلوقت هع هع هع


منوراني

أبو العريف يقول...

ابو علي

لو عيز تعرف فرق الاحساس بطل

وانت تعرف

سهله يا عم الحج

أبو العريف يقول...

مش بمزاجى

اولا متشكر علي فكرتك عني

اللي وصلت من كلامي

معرفش ازاي

ههههههههه


بس فعلا موضوع التدخين عايز شويه اصرار

انا مثلا كنت بشرب الشاي بغباء

بجد

وكبرت ف دماغي اني ابطل الشاي

اوم ايه

بسلامتي مجيتش ابطل الا ايام الامتحانات

الحمد لله بطلته ايام الامتحانات

وشربته بعد ما خلصت

ههههههههههههههههه

بس من ساعتها بقي عادي بالنسبالي

مش بشربه بالشراهه زي الاول

منوراني

أبو العريف يقول...

لاسع افندى

معاك يا ريس

قولي هتبدأ امتي وانا معاك

ههههههههههههههه

منورني

أبو العريف يقول...

رضا الكومي

مش عارف بس اكيد هقدر ابطلها

بس صحيح ازاي

دانا مش بشربها

تصدق صعبه دي

أبو العريف يقول...

mohamed ghalia

ازيك يا محمد

ربنا يقدرنا يا محمد ونعمل الصح

منورني

أبو العريف يقول...

فتاه من الصعيد

منوراني للمره التانيه يا دكتوره

بس اعتقد انك تقدري تغيري اي عاده

لو حاولتي

شكلك محاولتيش

هههههههههههههه


علي فكره في عادات لذيذه

مش سلبيه قوي يعني دي انا عن نفسي مش بغيرها

زي اني ابهدل اوضتي اول ما ادخلها

مهما كانت مرتبه

منوراني

أبو العريف يقول...

norahaty

ازيك يا دكتوره

فعلا قاتل التعود

بس ايه رايك في الخودعه دي


الاشراف عالتعليقات عشان ادي فرصه

لشويه اصدقاء بيحبوا يحترموني قوي

ومش حابب حد يشوف احترامهم ههههههههههههه

عشان كده فاتح الغير معررررررررف

منوراني

أبو العريف يقول...

حـــلـــم كــــان

شفت ازاي

عشان تعرفوا ان معايا حق

اللي يغيظ ان اخويا مره جابلي ولاعه هديه

وهو عارف اني مش بدخن

اكيد كان عارف حكاية روما دي

أبو العريف يقول...

أحــوال الهـوي

ازيك يا دكتور

كنت متأكد كنت متأكد


مع اني كنت شاكك

هههههههههههه

ايه بقي الحكمه دي اللي خلتك تكح

منورني يا باشا

أبو العريف يقول...

enjy

انا سعيد اني قدرت اعمل ده

تحياتي

الشعب لابد له من حكومه تشكمه يقول...

خضتنى يا اخى:)
اصلى مش بحب منظر اللى بيدخنوا اصلا وفى نفس الوقت قلت لفنسى مش هعمل واعظ واقعد اقولك اعمل واعمل,دا غير انى مش بستوعب فكره ان حد يخرج دخان من مناخيره دى:)بضايق.

ندخل باه على المهم عارف بجد لو كل حد صمم انه يغير حاجه فى نفسه هتتغير هى محتاجه شويه مجاهده واصرار مش اكتر,
انا مثلا كنت عصبيه شويه بس الحمد لله من وانا تقريبا 18 سنه قررت انى هبطل العصبيه دى واتحكم فيها واحده واحده وتاتا تاتا بطلتها الحمد لله وتحولت لبروووووود قاتل يفرس اللى ادامى:))

وكما قال اوباما ييس وى كاااااااااان

yasmina يقول...

السلام عليكم
يمكن تكون دى اول زيارة ليا فى المدونة الجميلة اوى دى
بس اللى اكيد وطبعا مش تكون الاخيرة
لانها بجد مدونة جميييييلة اوى

غير بقى البوست الجميل اوى دة واللى وقع قلبى بصراحة لانى مش بحب اللى بيدخنوا دول خالص وطريقة البوست غريبة اوى ازاى واحد مش شايف حياته من غير تعب ودمار وبيتكلم عليهم كانه شئ عادى يعنى

بس البوست اكييييد فرحنى فى الاخر وان حضرتك مش بتدخن احسن والله
وربنا يبعدهم عن حضرتك كمان

وربنا يهدى اللى بيدخنوا دول ويديهم طبعا الارادة والعزيمة القوية دى
لانه فعلا زى ما حضرتك قولت تعود وادمان كمان ربنا يهديهم

تحياتى دايما لحضرتك
ويبقى التواصل
سلااااااااااااام
ومعلشى اذا كنت طولت شوية

MaNoOoSh يقول...

بقى المشكلة انك مش بتدخن أصلا
ماااااااااااااشي
والدخان القرمزي
ماااااااااااااشي


بس عندك حق
ساعات كتير ناس دلوا الواحد على عيوب فى شخصيته وقدر الحمد لله يصلحها

-_- يقول...

مستحيل ادخن
انا شفت ناس كتير ماتوا قدامي بسبب السرطان ..
كانوا كلهم مدخنين جدا ..
يارب عافينا جميعا ..

Ramy Wasel يقول...

ابو العريف باشا

معلش
انا مقصر معاك
بس ظروف الشغل والدراسه
وعلى رأى المثل
المال وحش
المهم
ربنا يكرمك وتبطل السجاير
فى اى شهر يناير
شعبوله مش محدد السنه
يعنى اى شهر يناير يعجبك
السنه اللى جايه
او اللى بعدها

Unknown يقول...

ههههههههههه
حلو انك هتبطل تشرب حاجة مش بتشربها اصلا
دا نوع جديد من محاربة النفس وقوة الارادة

elsha3er يقول...

السلام عليكم

اولا شكرا على الاشتغالة ثانيا بالنسبة للسجاير انا كنت بدخن وبطلتها بعد سنتين تدخين والله الامر كله ارادة وانا عايز اية

تحياتى

احمد الشاعر

>>> يقول...

موضوع جه على الوتر الحساس بالنسبة لي

لأني بقالي أكتر من اسبوعين بحاول أبطل سجاير ومش عارف

وإشي خطط وإشي تقنيات وإشي تمارين .. ومفيش فايدة

بس أول الغيث قطرة

كفاية إننا ننوي

تحياتي لك

تقبل مروري الأول على مدونتك

بَرَاء

well يقول...

مش مهم تكون انسان جديد لان انت انسان جميل
لكن المهم تبطل السجاير وتشيل حديد ...
ياريت لو تزور البوست ده

http://kashkol100.blogspot.com/2010/01/blog-post_16.html

Sweet Violet يقول...

ده انت حببتني فيها بسبب البرستيج الفظيع اللي قولته..ايه ده هو كل مميزات كده مافيش اي عيب
اممم انا فهمت ده اعلان للمار و الكيلو صح صح انكر بقي الاعتراف مش هيفيدك D:
جد بقي اكبر كارثة هو موضوع التعود ده
علشان كده المفروض الواحد يراقب افعاله قبل ماتتحول لعادة

قيس بن الملووووح يقول...

نحن في حاجه الي رأيك في مشاكل القراء بمدونة "دقات قلب بعد الخمسين"
مع خالص تقديري

Unknown يقول...

أبو العريف
العارف كل
حاجة ياريت
تطمنـاعليك.

miroooo يقول...

السلام عليكم
ازيك ابو العريف؟
بصراحه السجاير دى حاجه مقذذه
وفعلا عايزه اراده علشان الواحد يبطلها بس مين يسمع ويفهم
ربنا يهديهم
دمت بكل الخير

محمد سعد القويري يقول...

الأخ الفاضل :: أبو العريف ::
مساء الخير

وأنا نفسي أبطل سجاير مع أني ما أدخنش :)

العادات تتغير ولكنها حتما كما ذكرت تحتاج إلى جهد وجهد وجهد ..

حقيقة .. كثيرا ما أنصح الطلاب المهملين والكسالى بالجد والتحسين من مستواهم وتحصيلهم ولكني أفاجأ أنه .. لا أحد يتغير .. حتى أصبحت أعتاد على ذلك .. فالتغيير إلى الأفضل صعب - ليس مستحيلاً - يعني أقدر أقول لك إنو التغيير بناء على وعظ الطلاب يكون بنسبة 5 إلى 7 %
نسبة قليلة

لكن مش بطالة

ودمت بود

رحلتنا في الحياة يقول...

افتكرتك بتشرب بجد :(
بس احسن حاجة انك مش بتشرب

محمد عتلم يقول...

ازيك يا واد يابو العريف
اخبارا يه
اوعى يبنى تبطل سجاير .. انتا عايز تكون انسان سليم ولا ايه ؟؟ اخص عليك راجل ..... ولا بلاش احسن تزعل
يبنى انتا لو بطلت السجاير هتلاقى نفسك اتغيرت وشوف بأه اللى هيجرالك
هتصحى الصبح بدرى نشيط ووزنك يزيد شزيه والرئه تبقى مزبوطه ومتكحش ولياقتك البدنيه تزيد وتعرف تطلع السلالم من غير ماتتعب وكفائتك فى الشغل بتزيد ومش هتبقى أرفان اغلب الوقت وريحتك هتبقى حلوه على طول وهتاكل بنفس مفتوحه اكتر ومش هتدى فرصه للمراض اللى بنسمع عنها انها تضايقك فى حياتك وكمان هتعرف توفر جزء من المرتب يعنى 200 / 300 ريال تمن علبه فى اليوم على الأقل وكمان زياراتك للطبيب هتقل بمعدل كبير على مدار حياتك و,,,و,,,و,,,و
حاجات كتير طبعا هتختلف انتا فى غنا عنها يا راجل ومش وقتها دلوقتى خالص
استمر يابو العريف فى السجاير بس ياريت تشوف حاجه اتقل من المارلبورو شويه عشان تنجز وتجيب من الاخر بدرى بدرى .. اقوللك .. شيل الفلتر خالص
صباح الفل

غير معرف يقول...

وحشتني :)

وينك مختفي

يارب تكون بالف خير

سي يو :)

رنونة حكومة ميخو يقول...

دايما بحس ان شرب السجاير ليه احساس حلو بس عمر يما جاتلى ولا هتجيلي الجراة اللى تخليني افكر اصلا انى المس سيجاراية
الحمد لله انك مش بتدخن وربنا يهدي كل اللى بيدخنوا..
كمان حكاية التغيير دي بتبقى سهلة لما يحصل موقف تتعلم منه انك كنت غلط او حاجة تندم عليها قوي ساعتها بتتغير فجاة انما بيبقى صعب قوي من غير اى حافز