الاثنين، فبراير 01، 2010

انا .......... وأمم افريقيا




قبل اما اجي هنا كانت الكوره عندي مرتبطه بالصحبه واللمه


مكنتش بتفرق معايا قوي


بس كنت دايما بقابل نور ونروح نشوف الماتشات عالقهوة ونعشى ثم نتمشى


فكنت بستي الماتشات عشان خاطر نوووووور


لكن هنا في السعوديه الوضع اختلف


بقيت الكوره مرتبطه باسم مصر


بحب اسم مصر وعلم مصر يترفع في اي حاجه


انشاله لعب البلي لمسافات طويله هع هع هع


بحب منظر الاعلام وهي بترفرف


بحب الحاجات اللي بتتعمل في الشوارع مع اني مستحيل اشارك فيها




*****


امم افريقيا ليها زكريات خاصه معايا صعب تتنسي


1998 بوركينا فاسو




طبعا ساعتها مكنتش مهتم بالكوره بس كل اللي فاكره اني كنت في ثانويه عامه


وان قطعة الفهم في امتحان الفرنساوي كانت عن كاس افريقيا


وفاكر انه كان فيه سؤال عن عدد مرات فوز مصر بالبطوله


وساعتها كانت الاجابه 4 مرات


اللي غايظني بقي اني رغم اني كنت مقفل الامتحان جبت 46 بس


اموت واعرف الاربع درجات دول راحوا فين


منا لو اخدتهم كان زماني علي الاقل دخلت كلية هندسه


وبقيت مهندس ومين عارف مش يمكن كنت زماني شغال ف السعوديه دلوقت




****


2006 مصر


ودي اعتقد كانت بداية الاهتمام الرهيب بالكوره مش اهتمامي انا لا اهتمام كل البشر


كنت اول مره اشوف الستات في بلدنا بيتكلموا ف الكوره


والخناق المعتاد بتاع عايزه اشوف المسلسل لا هنشوف الماتش اختفى تماما


لان كله بيشوف الماتش


ويوم النهائي ( مصر وكوت ديفوار)


كنت داخل دور تعب بس علي خفيف


وجه واحد صاحبي قاللي بلاش النوم ف السرير عشان التعب ما يمسكش فيك


تعالي نشوف الماتش ف القهوه وفعلا سمعت كلامه ورحت معاه


بس طبعا محسيتش بالماتش ولا استمتعت بيه


لان التعب كان عمال يزيد وبمجرد الحكم ما صفر


( تصدقوا ما صفرش ساعتها دا ابو تريكه جاب ضربه الجزاء الاخيره وقعد يلعب استغمايه هو والحضري )


لقيتني مش قادر اقوم من مكاني واضطر صاحبي ان يسندني هو واحد تاني لحد البيت


وبالليل كنت مشرف عند الدكتور




***


2008 غانا


حلفت عشان خاطر عمر زكي لاشجع الزمالك لمدة اسبوع بسبب تألقه في البطوله


بس حظهم وحش الزمالك ما لعبش ولا ماتش في الاسبوع ده نيهاهاهاهاها


كل الماتشات كنت بشوفها مع نفس شوية البشر وفي نفس الموكنه


حتي كنت بخاف اغير هدومي عشان متفائل بيها


يوم النهائي كان قلبي هيقف


مع اني كنت واثييييييييييق م الفوووووووووووز




***


2010انجولا




بعد الاحداث الدراماتيكيه في تصفيات كاس العالم


وكمان لاني مش في مصر


البطوله المرادي كان ليها طعم تاني


وكان في حاجات لذيذه حصلت


مثلا


في ماتش نيجيريا نيجيريا جابت جون قلت بس خرجنا م البطوله


واللعيبه متأثرين باللي حصل


رحنا نصلي العشاء جينا لقيناهم متعادلين ثم الفوز 3-1


ودا نفس اللي حصل بالظبط في ماتش الكاميرون


بس كنت متأكد اني هرجع م الصلاه الاقيهم متعادلين فرجعت اسال


مين اللي جاب الجوووووووووووون




يوم ماتش الجزاير


اعتبرت انه صعود الجزاير بطريقه غريبه لدور ال8


وفوزها الغريب برضه علي كوت ديفوار دا هديه من ربنا عشان نهزمهم الهزيمه الكبيره دي




الغريب ان زميلنا المحاسب ( اللي مالوش في الكوره بتاتا البته )


وينطبق عليه قول اللي ملهمش فيها بيشجعوا مصر واحنا معاهم ( لو قلتله الشوط ساعتين ممكن يصدق )


قال هنجيب 3 صفر قلناله طب خليها اربعه


وفعلااااااااااااااااا جبنا 3 اجوان لقيناه بيقولنا لسه باقي جون وفعلا قبل ما يخلص كلامه جبنا الرابع




وفي النهائي


قاعدين محروق دمنا وغانا ضاغطه


جه المحاسب من بره


بيقول جدو هيجيب جون دلوقت وفعلاااااااااا


دقيقه واحده وجاب جدو الجون


مع اني كنت متشائم


وكنت مش واثيييييق م الفووووووز


هناك 35 تعليقًا:

شهد الكلمات يقول...

مبروووووك لمصر

مش قادرة اقولك انا مبسوطة اد اية بالفوز ده

و قصاد الفرحة دي في حزن من اللي بيحصل في الشارع بعد الماتشات خاصة اني ساكنة جنب الاستاد و كان في شاشات عرض و اتدبسنا في الزحمة
يمكن انتا في الغربة بتشوف ده في التي في حاجة حلوةو مبهجة
بس ده جانب اه مبهج و مفرح لكن اية ذنب اللي راكن عربيته في الشارع ان الناس تقف عليها و تقعد تتنطط و تقول مصر
ولا عربية اسعاف تفضل سارينتها تتحايل علي الناس عشان يبعدوا و يفضوا الطريق للمريض اللي هايموت في العربية معاهم
ولا واحد يتاخر على شغله
ولا واحدة ميت واحد يتحرش بيها في الزحمة
ولا واحد يتسرق موبايله من البلطجية اللي مالية الشارع
كل ده التليفزيون مش بيجيبه

ماللي يفرح يفرح منغير ما يأذي حد
هو لازم ننزل الشارع و نرمي بلانا على غيرنا
ماحنا فرحنا في بيتنا و اتنططنا و هيصنا منغير ما نضر حد

طولت كتير في التعليق معلش بس ماصدقت اقول راي

و مع كل ده مبروك لمصر

ঔღঔ نـــوارة ঔღঔ يقول...

الف مليووووون مبرووووووووك

السنة دي غير عن كل السنين الي فاتت تابعت الماتشات كلها وبحماس جامد

وتصور كنت اسيب المسلسل علشانها :]

والله يستاهلوا الفوز لعبوا جااااامد

لما دخل جدو في الاخر وقرب الوقت يخلص انا فقدت الامل وقلللللت شكلها هتنتهي بتعادل سلبي ويحرقوا دمنا بشوط تالت

الحمد لله طلعوا جامدين

وينك يابني وحشتني والله

يارب تكون بالف خير

دمت بحفظ الرحمن

ستيته حسب الله الحمش يقول...

هههههههههههههههههههههههههههه
ربنا يكرمك زي ما ضحكتني
بس كام سؤال اجباري

1- هل لو خدت الاربع درجات كان ممكن تدخل طب من علمي رياضة؟ :)

2- تفتكر فيه ارتباط شرطي بين صلاتك للعشا كل مرة وكام جون بيجوا ساعة الصلاة؟ :)

3- ممكن تسلم لي على المحاسب البركة ده وتقول له ستيتة بتسلم عليك وبتسألك
الزمالك السنة دي عا يفضل في الدوري الممتاز ولا ها يفلسع؟ :)



مبروك لمصر
انا عارفة فرحتك في الغربة شكلها ايه تماماااااااااااااااااااا

منــار فايد يقول...

صاحبم المحاسب بيشجه مصر وانا معاه
أنا لو منك اعت بصاحبي ده جدا
واعينه محاسب قانوني
محاسب مالي
خبير ابراج
اهي شغلانه وخلاص

انا بقى اول تفاعلي مع كاس الامم كان2006.....
كنت ساعتها في تانيه طب
وكنت سعيده جدا بالفوز
واتفقنا وعملنا احتفاليات في الجامعه يومها
2008
كان يوم احلى
كان عندنا تجمع رهيب في الكوره
من العيلتين
وزي ماكنت بتقول
اللي مالهمشي فيها بيشجعوا واحنا معاهم
2010
كانت احاث غريبه وجديده
فكيت الجبس قبل ماتش الجزاير بنص ساعه
وكانت مباراه مصر والكاميرون صوره بس
وكنت عامله معلقه عندنا في البيت
في الفاينال بقى
حكايه
ماكانشي حد عندنا وكنا قاعدين عادي
بس للاسف كنا قليلين جدا عن2008
والحمد الله
فرحنا جداااااااا


الف الف مبروك ياباشمهندس
كان معكم
من قلب الحدث
محدثتكم
منار فايد

ليس فقيرا من يحب يقول...

مليووووووووووووون مبروك يا ابو العريف

اتارى الشعب الطيب ده بيستنشق على

حاجه تفرحه

الفرحه حلوة ومنظر الناس فى الشوارع

والاعلام جو روووووووووووعه

انا ذكرياتى مع الكورة بدأت مع 2006 وكنا بناخد

جنيه على الجون والنهائى خمسه او عشره جنيه

هههههههههههههههههههه

الف مبروك ويارب كل الايام فرح وسعاده

وبصراحه المحاسب زميلك ده راجل طيب

وسكرة تسمع الماتش معاه بقى باذن الله 2012

اقعد بالعافيه

الشعب لابد له من حكومه تشكمه يقول...

ابأه خلى صاحبك ده جمبك علطووووووووووول دااا بررررركه:)

عارف فكرتنى ببطولة 98 كان وقتها الجوهرى هو اللى بيدرب مصر,

ومنساش اخويا وهو بيقول اصل الجوهرى دا تفكيره عقيم هو يحط الاعيبه كلها ادام الجون ويدافع ويباه كده بيلعب كوره.

كان الجوهرى كل ماتش وعلى الرغم من اننا كسبنا البطوله كان عملهم شلل رباعى:)

دى كانت اول اهتماماتى بالكوره .

مش بمزاجى يقول...

مبروووووووووووووك مليون مبروك لمصر وان شاء الله 2012 ناخد الكاس وتكون فى مصر مع نووووووور
وتفرحوا سوا
وترجع من الغربة يا بشمهندس



على الهامش

انا مدرسة فرنساوى
واحب اقولك انك لومكنتش غلط
ممكن تكون غلطت فى الاستلنج للحروف
فنقصوك
ههههههههههههههههههههه
شفت بفسرهالك اهه بعد كام سنة

القدر و انا يقول...

ابو العريف
مبروك عليك الفرحة والفوز
اد ايه دا مهم لكل المصريين لكن انا واثقة ان فى الغربة حتحسها اكتر وحتتمناها اكثر
تحياتى

د. ياسر عمر عبد الفتاح يقول...

ههههههههههه
ألف مبروك يا عم
طبعاً الأحسايس الوطنية بتكون ليها نكهة خاصة في الغربة
لأن الغربة بتضيف لها بعض التوابل "الحراقة"

قلم رصاص يقول...

ايه رأيك بقى ان حتة لعب بلي مسافات طويلة دي بتاعتي بقى وانت لقطتها مني

هههههههههههههههههههههههههه

ضحكتني جدا

والف مبروووووووووك لمصر

لاسع افندى يقول...

85 مليووووووووووووون مبرووووووووووك



تحياتى

فتاه من الصعيد يقول...

مبروووووووووك لمصر

احسن بوست قريته عن كاس افريقيا

تحياتي

norahaty يقول...

فعلاً ياابو العريف
العارف كل حـــــاجة
فى الغربة كل شىء بيبقى
له طعم تانى وخصوصاً اى حاجة
حلوة بيجى فيها إسم بلدنا
ماكنتش بصدق الكلام دا
زمان لكن لمّا جربت
عرفت وصدقت.
ربنا يردك
لبلدك ولأهلك
ولبيتك بالسلامة يارب.

mohamed ghalia يقول...

مليووووووووووووون مبروك لمصر
فعلا الكرة بتكون مصدر فرحة كبير خصوصا للمغتربين

هتلاقينى هنــــاك اوعى متجيش يقول...

تسلم وترجع لبلدك ساعتها تبقى تصدق افرحة نفسك بس المرة الجاية ان شاء الله ويانا ووسط اهللك وحبايبك

أبو العريف يقول...

شهد الكلمات

طبعا الف مبرووووك

عارف طبعا ان بعض الناس بتتصرف تصرفات

مش ولا بد في الفرحه

يمكن قبل ما اجي هنا كنت بعتبر اللي بيحصل

ف الشوارع ده تفاهات

بس البعد بيفرق مع الواحد

لو الفرحه هتبقي بدون ما نأذي حد تبقي جميله جدااا


حاجه تانيه

لما 200 فرد يعملوا مظاهره في اي حته ف مصر

الامن بيفرقهم وممكن يعتقلهم بدعوي انهم

معطلين المرور

لكن ف الكوره لو الاف محدش بيكلمهم

كانهم مش بيعطلوا المرور


نورتيني

أبو العريف يقول...

ঔღঔ نـــوارة ঔღ

ازيك يا نواره

نواره بتشجع مصر ... واحنا معاها

الف مبروووك

اكيد هما فازوا عشان انت تابعت الماتشات

متشكر جدا علي سؤالك

انا بخير الحمد لله


منوره الدنيا

أبو العريف يقول...

ستيته حسب الله الحمش

ازيك يا دكتوره

هجاوب ع اسئلتك

1- علي ايامنا كان فيه حاجه اسمها علمي شامل بس برضه ال4 درجات مش هيعملوا حاجه


2- مش عارف بس كنتا نروح نصلي نرجع نلاقيهم متعادلين

3- المحاسب

تقريبا ميعرفش انه فيه نادي اسمه الزمالك

منوراني

أبو العريف يقول...

منار فايد

الف مبروك يا دكتوره

طبعا الكوره مع اللمه والصبحه ليها شكل تاني

تخيلي بقي لو بتشوفي الماتش ف قهووووه

بيبقي احلي من الاستاد

بس لو حد معاكي تعرفيه عشان ساعة الجوووووون يشاركك الفرحه


طبعا اكيد تعليقك كان احسن من علي محمد علي

ومن الشوالي كمان

الماتش بصوت منار امتع

بس تلاقي مش عارف الفاول من الكورنر هع هع هع


منوره يا منار

أبو العريف يقول...

ليس فقيرا من يحب

ازيك يا رانيا

عامله ايه

كنت بتاخدي كام السنادي عالجوووووووون

ايه الناس الماديه دي

الف مبروووك يا رانيا

ويارب دايما ف فرخح وسعاده

منوراني

أبو العريف يقول...

الشعب لابد له من حكومه تشكمه

ازيك يا شيما

كل اللي فاكره من 98 الامتحان

لكن الجوهري واللعيبه

ولا الهوا

حتي معررررفش اذا كان مدرب كويس ولا اي كلام

من 2006 اهتميت اكتر

منوراني

أبو العريف يقول...

مش بمزاجي

ازيك يا استاذه

الف مبروووك

والفرحه حلوه بجد

بالنسبه للفرنساوي

انا لا طبعا مغلطش ف الاسبلينج

دانا حتي نص الكلمه الاخير ده اللي مش بيتنطق مش بكتبه اصلا


منوراني بجد

أبو العريف يقول...

القدر و انا

الله يبارك فيكي

اكيد ف ا لغربه بتفرق كتير

بس الفرحه ف وسط اهلك اكيد ليها طعم اجمل

منوراني

أبو العريف يقول...

د. ياسر عمر عبد الفتاح

ازيك يا دكتور

حمد الله عالسلامه

طبعا في توابل حراقه

وشطه وبهارات كمان

منور يا باشا

أبو العريف يقول...

قلم رصاص

ماشي يا عم الحاج

المهم نفرح القطها منك تلقطها مني

بس تحيا مصر يا عم

منور

أبو العريف يقول...

لاسع افندى

الف مبروك يا باشا وعقبال 2012

ويارب دايما في فرح وسعاده

منوووووووووووور

أبو العريف يقول...

فتاه من الصعيد

ازيك يا دكتوره

الف مبروووك ليكي

وربنا يخليكي يا رب

منوراني

أبو العريف يقول...

norahaty

ازيك يا دكتوره

الف مبروووك

فعلا الفرحه هنا ليها طعم تاني

واي حاجه ترفع اسم مصر بتفرق كتير جدا مع الواحد


منوراني

أبو العريف يقول...

mohamed ghalia

محمد باشا

مبرووووك

ودايما يارب ف فرح وسعاده

واكيد مش هنبحث عن السعاده

لاننا عارفين طريها

عندك يا ريس

منور

أبو العريف يقول...

هتلاقيني هناك اوعي ماتجيش

ايمن باشا

الف مبروك ليك

الواد زياد عامل ايه

شاف الماتشات وللا لسه صغير

منور يا باشا

ميمى واحمد يقول...

عندنا حفلة لأحد الأصدقاء هنا في المدونة دي

الصديق / مهندس مصري بيحب مصر

well يقول...

تشجع الزمالك اسبوع ....طب وعشان جدو هتشجع الاتحاد السكندرى كام اسبوع

مبروووووووووووووووك

رجل تحت الصفر يقول...

لأ بقى أنا كنت واثييق م الفوز


و على فكرة صاحب حضرتك الأستاذ اللي مالوش في الكورة ، أحب أقوله ان فيه واحد صاحبي صورة طبق الأصل و قال نفس الكلام و ردينا عليه بنفس اتلكلام و حصل ان الجزائر اتغلبت 4 برضه سبحان الله

كل شئ يحصل ده عادي

انما الجزائر تتغلب عندكم في السعودية و عندنا في مصر 4 برضه


شئ عجيب

مهندس مصري يقول...

فعلاً الفرحة برة مصر ليها طعم تاني يا زميلي في الهندسة و التدوين :)

عايش... ولكن !!!! يقول...

مليووووووووووووووووووووون مبروووووووووووووك
الشعب ده يا جماعه ناقص فرحه والله وما بيصدق حاجه يخرج فيها الكبت اللى جواه