الاثنين، نوفمبر 08، 2010

مين ده ..........؟


بدءا

لا الحال بيتغير

بعيد عنك

ولا الايام بترضى تفوت

ولا قلبي عاد يصبر

علي فراقك

وم الاشواق خلاص بيموت
*****
مين ده اللي يقدر


مين ده اللي يقدر يجرحك

هي الملايكه بتنجرح

دانا لو بايدي افرحك

اتعب سنين واسقيك فرح

***

مين ده اللي قلبه يطاوعه ده ويعمل كده

معقوله حد يبيع ملاك بالشكل ده

وف الزمان ده نلاقي فين زيك كده

ضحكة عيونك تملي كل الكون فرح

مين ده اللي يقدر يجرحك

هي الملايكه بتنجرح

***

مين ده اللي يقدر يقسى علي قلب القمر

لو في قلوب بالشكل ده تبقي حجر

دانت اللي زيك مستحيل بين البشر

دانت اللي زيك حلم م الاحلام طرح

مين ده اللي يقدر يجرحك

هي الملايكه بتنجرح

****

مين ده اللي يتحمل يشوف دمعة عنيك

دانا لو هتبكي عنيك هموت م الخوف عليك

وده مين يشوف طيبتك وميسلمش ليك

اول ما شفت عنيك لقيت قلبي انشرح

مين ده اللي يقدر يجرحك

هي الملايكه بتنجرح

انا لو بايدي افرحك

املى الحياه لعنيك فرح

هناك 15 تعليقًا:

غير معرف يقول...

ايوه كدا يا عم ارجع لنا تاني زي زمان جامدا قوي يا محمد ....

vanilla scent يقول...

في ناس بتقدر تجرح مهما كان مين قدامها

لكن ...

جميله اوي كلماتك

ونغمتها اغنية طعمه اوي :)

ولد تحت الصفر يقول...

ديوان في صفحة
:)

eng_semsem يقول...

اكيد انت كاتب ده ليا انا عارف ما تنكرش
جميله الرجعه من تاني والاحلى الكلمات اللي انت راجع بيها ويا مان ربنا يهنيها ويهنيك وما يجبش لاجرح ولا زعل هواحناوخدين منها ايه
تقبل تحياتي

Tears يقول...

فيه اغنية لعمرو دياب كان بيقول فيها كلهم بيقولوا كده فى الاول و الكلام الحلو بيتحول

للاسف الاغنية كلامها صح

ميرام يقول...

الله
الله
الله
اللللللللللللللللللللللللللللللللللله
بجددددددددد
مين دددددددددددددده
(:


مستنية الجديييييييييد
(:

miroooo يقول...

ايه الجمال ده ؟ بجد تحفه
تصفيق حااااااااااد
ربنا يسعد قلبك ويجمعك بمن تحب
تحياتى

قلم رصاص يقول...

جميله اوي يا ابو العراريف

صمت المشاعر يقول...

كلماتك جميله جداااا ومعبره

دمت مبدعااا

صمت المشاعر يقول...

كلماتك جميله جدا ومعبره

دمت بكل خير

بس خلاص ... يقول...

كل سنة وانت طيب يابو العريف
تحياتى

shoshta_ joker يقول...

السلام عليكم.......

ازيك ياابوالعريف


كلكم وحشنىىىىىىى موووووت والله

ومعلش مقصرة ومش بتابع بس خلاص باذن الله حرجع تانى ابقى معاكم

دعواتكم

استنون بقى ارجع تانى بمدونتى الرئيسية fasion
http://shemo-fashion.blogspot.com/



دومتم بخير فى رعاية الله
shemo

كــركــبــة دمـــاغ ㋡ يقول...

كل سنه وانت طيب وبالف خير وصحة وسلامة يا ياشمهندس

وربنا يعود عليك الايام بكل خير وانت في احسن حاااااااااال يارب

وعيد سعيد عليك وعلى كل حباااااايبك

(f)

غير معرف يقول...

والديناميت في اليوم يا صديقي!

موجة يقول...

بوكيه ورد تحفة
ميرسى
طبعا انت عرفت تعليقى من زمااان
تحب اقولهولك تانى:)
مش هتكتب لى بوست بمناسبة عيد ميلادى بقى
عيد ميلادى قرب