الأربعاء، يونيو 17، 2009

ردي علي .......ولد غلبان

الحقيقه انا كنت ناوي اول بوست ينزل

يكون حاجه دمها خفيف

حكم انا بقالي فتره منكد عليكم وقارفكم معايا

بس وانا في مدونة اسكت يا ابني

قريت البوست ده


و عجبني جدا مما استفزني اني ارد عليه

ودي كانت المحاوله يارب تعجبكم


******

ومهما يعدي تاني زمان

هيفضل حلمي جوايا

ومش هيموت

وهقفل سكة السؤالات

ما بينا

وهكتفي بسكوت

ودمعاتي مش هحبسها

وهبكي

بس من غير صوت

*

مانا عارف

باني مشيت في سكه هنتهي بدموع

لكني خلاص

معدش في ايدي تاني رجـــــــوع

*

ومجدافي ولو مكسوووور
ولا هيفرق

لاني في بحرك المسحور
بحب اغرق

وحتي سمايا لو ضلمه

اكيد انا منها لحظة نور

في يوم هسرق

*

وهستني

عنيكي في يوم تضويلي

ولو ف منام

وهعمل ايه

وايه تاني اللي بإديه

غير الاحلام

*

ولو مكتوبلي تبقي بعيده عن عيني

مش انساكي

بقيتي خلاص بتجري في شراييني

وبلقاكي

في زاكرتي

في احلامي

ولياليه

وايامي

حروفك شكلت لغتي

واسمك هو صوت صمتي

بقيتي جزء من روحي

وتكويني

**

وف الملعب

هكون عاشق

وكورتي بتجري قدامي

ونتسابق

وتسبقني

واحصلها

وتسبقني

وتهرب زي احلامي

ومش فارق

ولو يا حبيبتي مقدرتش
اجيب اجوان

وشبكة حلمي مسدوده

وفيها حيطان

بتمنعني

فما خسرتش

جنون اللعبه متعني

***

وبتقولي منيش قمرك

ومتعشليش

اقولك لا

لاهو بكيفك

ولا بأمرك

وارجوكي ما تتضايقيش

دا من امتي القمر كان يوم

كده بيختار

لمين يبعت شعاع نوره

ومين يحجب ضياه عنه

وما يضويش

****

وتتسابقي مع الكلمات

وبتعاندي

اقول كلمه تقولي كلام

وبتعدي

( بحبك -بس - لو - قادر - تكون - قدي )

يرد القلب كلماتك

وبدموعه كتب ردي

( هحبك - حتي - لو - كل - الظروف - ضدي )


******


هناك 28 تعليقًا:

Sweet Violet يقول...

"وهقفل سكة السؤالات

ما بينا

وهكتفي بسكوت

ودمعاتي مش هحبسها

وهبكي

بس من غير صوت"

المقطع ده يقتل بجد .. مش عارفة اقولك عمل جوايا ايه

):

mohamed ghalia يقول...

الله عليك يا أبو العريف هايل بجد تسلم ايدك

MaNoOoSh يقول...

الشعر جميل جدا ومزيكته عجباني

واكتر جزء اثر فيا الكلمتين الاخرانيين

بحبك بس لو قادر تكون قدي
هحبك حتى لو كل الظروف ضدي

تسلم ايدك يا فنان

د. ياسر عمر عبد الفتاح يقول...

إيه يا عم الجمدان ده
إيه القوة دي
يا عمنا تسلم إيدك
جامد والله

ستيته حسب الله الحمش يقول...

الله
الله
الله
عودا حميدا وعودة قوية قوي
في الجون
مش ها اختار مقاطع لأنها تحفة وتقريبا ها اشتغل "حرامي" واشقطها
آه عجبتني بقى وربنا يغفر لي
أهيءأهيءأهيء "دموع تماسيح"

تسلم ايدك يا باشمهندس

لاسع افندى يقول...

بحبك -بس - لو - قادر - تكون - قدي

هحبك - حتي - لو - كل - الظروف - ضدي

كلام جامد ورد بليغ
تحياتى

hager za3bal يقول...

وهستني


عنيكي في يوم تضويلي


ولو ف منام


وهعمل ايه


وايه تاني اللي بإديه


غير الاحلام






---------------



وهقفل سكة السؤالات

ما بينا

وهكتفي بسكوت

من كتر ما كلامك عجبني حفظته !!

ايه الموهبه دي؟؟!

اكتر من رائع
بجد دي اجمل حاجه قريتهالك

تسلم ايديك

نقد لتخاريف ابو العريف يقول...

الله ينور عليك الكلام حلو بس معلهش المضون مش كويس حتي لو انت بترد وانت ولد غلبان انا واثقه ان شخصيتك قويه وهازعل اوي لو كانت ديه شخصيتك لان الصوره اليي رسماه لك في خيالي هتتغير

norahaty يقول...

حلــــــــــــوة
ومش تخاريف ابداً
دى تفانيـــــن

الشعب لابد له من حكومه تشكمه يقول...

ايه الفنش القوى ده اخر جزء جااامد..انت طلعت رومانسى ولا ايه؟؟
حلو جميل الله عليه تحفه..زى الفل لاالالالا الياسمين لالالالا القرنفل...وعودا احمد او محمود شوف اسمك واخترا اللى يليق عليه:))

عمرو وجيه يقول...

جميلة جدا

انا قريت ولد غلبان برده

ردك عليها جميل جدا

سلمت اناملك

م/ الحسيني لزومي يقول...

انا مريت علشان اسلم لاني من فترة طويلة لم امر لانشغالي
تقبل تحياتي

MǿиY El-Shreef يقول...

ومجدافي ولو مكسوووور
ولا هيفرق

لاني في بحرك المسحور
بحب اغرق

يالهوي كنت هعيط ف الاخر ايييييييه ده

بجد تحفه يامحمد

والله العظيم تحفه اوووووووووي وانت وميرام تعملوا دويتو اخر حاجه

الله الله الله

مش عارفه اقولك ايه بجد

تسلم ايدك

ميرام يقول...

أبو العريف
(:
انت عارف رأيي طبعا مش هيكون جديد عليك
(:
بس كان لازم أجي أسجله هنا (:
بتفاصيله بقى ..

المطلع عجبني جداا ...بجد
والوزن فيه تحفة



مانا عارف
باني مشيت في سكه هنتهي بدموع

حسيت هنا بكسر شوية ..أو اطالة ...
البيت الي بعده ظبطها ..ومعناه حلو ..


أن عارفة انك ممكن تخطفها في الالقاء فماتبانش (::
الجزء الي بعد جميل بجد معنى ووزن وايقاع


بس عايزة أقولك أنا رفعتلك القبعة هنا


ولو يا حبيبتي مقدرتش
اجيب اجوان
وشبكة حلمي مسدوده
وفيها حيطان
بتمنعني
فما خسرتش
جنون اللعبه متعني

بجد المعنى هنا مش طبيـــعي (: (:
ولازم أقول اللــه ...(:


انت ماتعرفش انا مستمتعه قد ايه بالقصيدة دي
لأن حاتم كان كاتب
( بحبك _ بس _ مستني _ أكون _ قدك )
(بحبك _ بس _ مش _ قادر _ أكون _قدك)
وانا رديت عليه ..
( هحبك _ بس _ لو _ تقدر _ تكون _ قدي)
(ده_ مش _ ممكن _فيوم _ تقدر_ تكون قدي)

وانت ختمت ختام مسك...
( هحبك - حتي - لو - كل - الظروف - ضدي )


الله بجد ...
تحيـــاتي ..
ياباشمهندس
(:

Teawater يقول...

جااااااااااامد جدا انا خدت اول كوبيليه وحيته ع الماسنجر لانه عجبنيجدا ده بعد اذنكم

نـــــــــــــور يقول...

لا جامد
جامد جامد يعنى

دلوقت بس انا فهمت ليه....
:)
افهم انت لوحدك ياسوسه

نقد لتخاريف ابو العريف يقول...

بس انا بسأل ابو
العريف سؤال ويا ريت يجاوب عليه بصراحه
بيدخل كلام في الموضوع زي كلمة سؤلات و
وكلمة زكراتي مش عارفه بس بحس انك بتتحايل علي الكلام عشان تمشيه مع بعضه

شباك موارب يقول...

حميله اوي
احساسها جميل
ومن امته القمر كان يوم
كده بيختار
لمين يبعت شعاع نوره
ومين يحجب ضياه عنه ومايضويش

جميله اوي اوي
ايقظت فينا احساس جميل اوي
شكرا ليك

well يقول...

بجد انتوا التلاتة بتكملوا بعض
انتوا التلاتة فنانين بجد موهوبين بجد
حاتم عبد الفتاح وميرام وابو العريف
بجد ابداع وفكرة ان هى ترد عليه وانت ترد عليه عجبتنى جدا وانا بفكر ارد عليك بس خسارة مش هقدر اوصل لابداعكم

كيــــــــــــارا يقول...

ودمعاتي مش هحبسها

وهبكي

بس من غير صوت

احساسك فاق الوصف ووصل للقلوب

:(

ايوشة يقول...

الله جميلة قوى كلماتها تسلم ايديك بجد حلوة جداااا

أبو العريف يقول...

Sweet Violet

يا ستي يقتل ايه
فيه حد في الدنيا يقول سؤلات
دي جمله عيالي قوي


متشكر
جدااا

mohamed ghalia

شكرا يا باشا
وحمدالله عالسلامه
انت فين من زمتن يا عم الحج

نورتني



MaNoOoSh

منوش
نورتيني طبعا
والجزء اللي عجبك ده
طبعا ميرام عامله البدايه حلوه قوي
اللي هي
هحبك _ بس _ لو _ تقدر _ تكون _ قدي

فردي عليها كان بنفس اللغه
تحياتي


د. ياسر عمر عبد الفتاح

جمدان ايه يا عم الحج
دي تخاريف
بس انت اللي عنيك حلوه

شكرا يا مان
تحياتي



ستيته حسب الله الحمش

هههههههههه
هههههههههههه

تشتغلي حرامي
لو اعرف كده مكنتش سكّرت المدونه
امسك حرامي
واكيد كنت هتبقي في العصابه

اشفطيها
ولا يهمك
دي حاجه تسعدني جدااا

أبو العريف يقول...

لاسع افندى

شكرا يا باشا
بس عشان تعرف ان احنا كمان لاسعين
ياله ايها خدمه



hager za3bal

شعقوله دي
دي محاولات يا جودعان
علي ادنا كده

طبعا متشكر جدا
هلي كلامك اللي ما استحقوش
وانا سعيد انه عجبك وحفظتيه

( يا شيخه احفظيلك كلمتين ينفعوكي )
وش بيستعبط




نقد لتخاريف ابو العريف

مش لازم كلام الواحد يعبر عن شخصيته
والدليل انك بتلاقي حد كاتب كلام
وفي نفس الوقت كاتب عكسه

وزي ما يكون سمعت مقوله بتقول
ان المبدع هو اللي يقدر يقنعك
بفكره وعكسها

تحياتي
وانا سعيد بنقدك



norahaty

شكرا يا ابله الدكتوره
بس قبل ما تمشي

هاتي الفلوس اللي عليكي
( وش بيلعب حواجبه )



عمرو وجيه

ايوه كده يا عم الحج
عايزين الناس اللي قرت
ولد غلبان
تحياتي



م/ الحسيني لزومي

نورتني يا هندسه
تحياتي لحضرتك

أبو العريف يقول...

MǿиY El-Shreef

ايه دا بقي
محمد كده حاف
انت نسيتي اني عمك
ولا ايه

اوعي تكوني عرفتي ان روان
مش بتقولي غير يا محمد حاف كده برضه
انا قلت انت هتعوضي حكايه روان دي
ياله يا ستي قولي اللي يعجبك


علي فكره الجزء اللي اختارتيه
انا حابه قوي



ميرام

بصراحه بقي قصيدتك تخلي الحجر
ينطق
هي فعلا جامده جدااا
واستفزتني جدا اني اكتب حاجه
مش ترد عليها
ولكن تكون بنفس النكهه
لكن طبعا المحاوله طلعت بالشكل ده
انا عارف فيها شويه قصور
وحاجات زي ما تقولي كده كانت عايزه تظبط
بس انا بحب اول حاجه اكتبها
ومش بحب التعديل الكتير

وبجد انا نفسي اقرا
قصيده قصير اليد
بتاعة حاتم
لان ردك عليه كان هايل
فكنت عايز اعرف ايه
اللي استفزك تكتبي الكلام الجميل ده


تحياتي




نـــــــــــــور

سوسه
اشتم اشتم
علموك في بلدك كده

وبعدين انا اتشتم اه
الشتيمه مش بتلزق
لكن انضرب لا

نورتي الدنيا يا نور
وهتفضلي منوراها كده
غصم عنك

افهمي انت بقي لوحدك

أبو العريف يقول...

Teawater

نورتيني
وحمدالله عالسلامه
ويارب ترجعي تنوري مدونتك تاني

تحياتي



نقد لتخاريف ابو العريف

ماشي يا باشا
معاكي كل الحق فعلا
انا بتحايل علي الكلمات
عشان اظبط الوزن
ودا اعتقد مباح حتي في الشعر الفصحي

ما سمعتيش
عن حاجه اسمها الضروره الشعريه




شباك موارب

متشكر جدا يا منار
انا سعيد برأيك
نورتيني جد
( وش مش بيعمل حاجه خالص ههههههههه)




well

انا طبعا ما قريتش
قصيدة حاتم و نفسي بجد اقراها

ومستني ردك
اكيد هيبقي جنيل
تحياتي




كيــــــــــــارا
اشمعني يعني الحته دي اللي عجبتك

مبسوطه قوي انه راجل وهيعيط
يا شماتة ابله كيارا فيه

ماشي يا ست
الناس بتبان في المواقف دي
او المحطات دكهي



ايوشة
متشكر جدا يا ايوشه
نورتيني

جريدة الصباح العربي يقول...

يفتح باب بيت المدونين ذراعيه لكل الموهبين في :
1/ القصة القصيرة
2/ الشعر بشتى أنواعه
3/ الرواية "رواية سنوية سنقوم بنشرها في الجريدة"
إذا وجدت في نفسك القدرة على المشاركة أرجوا التواصل معي على الميل التالي
arabicsabah@yahoo.com
شروط المسابقة
1/ ..............................
2/ .............................
3/ ..............................
لا يوجد شروط الشرط الوحيد هو العمل الجيد , والعمل المحترم البعيد عن الإسفاف
المقالات أرجوا أن تكون تخص الانسان العربي , تاريخه , عاداته وتقاليده , مقالات إجتماعية وثقافية ....
أرجوا التفاعل معنا في الجروب على العنوان التالي
http://www.facebook.com/groups.php?ref=sb#/group.php?gid=78080770039
انتهينا من مسابقة العدد الاول ونحتاج كميات أكثر من القصص لباقي الاعداد
العدد الاول سيكون في يوليو وقد قمنا بتأجيله نظراً للامتحانات الدراسية وسنكون بالاسواق بعدها ...
المسابقة ستكون دورية نريد أن نظهر أكبر عدد من الأدباء الشباب الى النور
تحياتي للجميع

aidy يقول...

يرد القلب كلماتك


وبدموعه كتب ردي


( هحبك - حتي - لو - كل - الظروف - ضدي



بجد عجبتنى اوى الجزئية دى

كلماتك كالعادة رائعة

والبوست رائع

والمعنى مش كئيب اوى بس حسيت فيه بتحدى

تحياتى ليك

ميرام يقول...

انا نزلت قصيدة حاتم
(:
موجودة عندي عالبلوج
(:
هتنورني تاني
(:
(: