الأحد، فبراير 22، 2009

انا والابراج الصينيه


من فتره كده بفتح الدستور الاسبوعي بتاع يوم الاربع اوم ايه لقيت موضوع عن الابراج الصينيه حد سمع عن الابراج الصينيه دي

الابراج الصينيه دي عباره عن شوية مواشي اقصد حيوانات مانفهمونيش غلط انا اقصد ان كل برج علي اسم حيوان ومواليد البرج دا بيحملوا بعض صفات الحيوان ده

المهم

انا بعديها كنت قاعد مع جماعه اصحابي ف رحت مطلع الجرنال وقعدت اسأل كل واحد عن تاريخ ميلاده واقوله علي البرج بتاعه وهاتك يا ضحك وتريقه عليه

اللي مثلا برج الارنب

-وانا اقول ودانك طويله كده ليه

-استني بقي هجيبلك جزر تاكل وتدخل الغشه علي طول

وهكذا دواليك وطبعا كل اللي موجودين ما سلموش من تريقتي

وبعدين راح واحد فيهم سألني ( وانت بقي برج ايه يا معلم)

تخيلوا انا ما كنتش لسه شفت انا برج ايه وقبل ما اشوف برجي راح واخد الجرنال ومن حظي الاخبر انه كان عارف

تاريخ ميلادي تخيلوا انا طلعت برج ايه

انا طلعت برج ................. لأ مهو انا مش ناقص تريقه هنا كمان كفايه اللي شفته علي ايد اصحابي

يا اولاد الكلب يا بتوع الصين دا انتو قاصديني انا بقي

لا والدستور كمان قاصدها معايا طيب يا دستور انا مش هقراك تاني

و كانت ثوره عارمه علي كل ماهو صيني

وحلفت لانا مقاطع المنتجات الصينيه

اول حاجه دخلت علي المطبخ كسرت الطقم الصيني وكل الاطباق الصيني

وجري علي اوضتي

المنبه صيني رحت راميه من الشباك

ساعة الحيط صيني ... الولاعة ... الطفايه ...اكسسوارات الكمبيوتر....كله صيني

ايه دا الدولاب ... المكتب ... المكتبه حتي البرواز اللي علي الحيطه .......كله صيني

انا هتجنن انا عايش في بكين ولا ايه

دخلت عند اخويا احمد الكاست بتاعي عنده

- ايه يا معلم بتلقب ف الكاسيت كده ليه

- الكاسيت دا سوني ياباني مش كده

- اه بس تقفيل صيني

- نعم

- الصين دلوقت يا معلم اخدت توكيلات جميع الماركات العالميه لانها بتصنعها بتكلفه اقل وبيقولو انها نفس الجوده

كنت هتجنن قلت اقعد اريح اعصابي شويه ف الصاله ففتحت التليفزيون ( مش صيني )

لقيت واحد بيقول " وربنا وربنا كمان مره لنيمك مم المغرب يا صين "

ودا طبعا كان محمد هنيدي في فول الصين العظيم

رحت مغير القناه لقيت واحد بيقول " بيفكر بالصيني ... بيفكر بالصيني "

فيلم الحاسه السابعه

رحت مغير قولت اشوف قنوات الرياضه لقيت المذيع بيقول

" ومازلنا اعزائي المشاهدين في متابعة فعاليات افتتاح دورة الالعاب الرياضيه اولمبياد 2008 من بكين"

الحقوووووووووني الصين ورايا ف كل حته ايه داااااااه فرحت قافل التليفزيون

شويه والباب خبط مالقيتش حد فتح قولت اقوم افتح تخيلوا لقيت ايه

لقيت واحده ست شايله شنطه كبيره جدااا قولت لنفسي

-" ايه دا الست دي شبه الصينيين شكلك بدأت تهيس يا معلم الصين لحست دماغك"

- " اهيس لأ دي الست دي صينيه فعلا "

قالتلي بلغه عربي مكسر كده

" عايز تشتري حاجات"

صرخت ف وشهااا "لالالالالالالالالالالالالالالالالا"

الست اخدت ديلها ف سنانها وجريت

- احنا ينفع نقاطع المنتجات الصينيه

دي مش دعوه للمقاطعه دا مجرد سؤال خطر ببالي لما كل حاجه صيني امال احنا بنصنّع ايه

انا خايف بكره الاقي رغيف العيش مكتوب عليه

मेड इन चाइना

ملحوظه

اللي يعرف انا برجي الصيني ايه يا ريت مايقولش عليه وليه جايزه قيمه

-

هناك 38 تعليقًا:

maha zein يقول...

صينك
ماشي ماشي
عموما انا توقعت برجك
بقه عمال تتريق وانت برج ال ....
ولا بلاش
استر عليك احسن

عموما انا ممكن اهددك
لاني من الاخر مبخفش من حد
اصلي برج النمر سيادتك
اه وربنا
نيييياع
اه نمر بقه
قوة ايه وخفة ايه ورشاقة ايه وعضلات ايه
هقول ايه ولا ايه

يلا هحاول اتواضع بقه

عموما انا عن نفسي بقلق من الحاجة الصيني
حتي لو حلوة
لان اي حاجة صيني طبيعي مش بتعيش
بس هقول ايه
قدرنا
ده انا جيبت من السوبر ماركت كاليماري
تتخيل طلع ميد ان شاينا
حتي السمك والكلماري يا ربي
حتي التفاح الاحمر
بقه صيني
نقول ايه يا جدع
يلا
المهم انك طلعت برج ال ....

الا انت برجك ايه صح

maiosha يقول...

ههههههههههههههههههههه
ايه البوست الجامد ده

بس عيب عليك تعلقنا ومتقولناش على البرج بتاعك

بس فعلا الصين بقت محصرانا.. انا حاسة انى ممكن اقوم يوم من النوم الاقى عنيا بقت ضيقة ولا بتكلم صينى

ربنا يسترها معانا

ومن موقعى هذا .. احب اعلن عن مكافأة مجزية جدا اكبر من مكافأة ابو العريف للى يعرف برجه الصينى.. خلينا نرد التريقة اللى اتريقها على خلق الله

نيهاهاهاهاهاها

ضحكات شريرة متقطعة

ستيتة يقول...

بالنسبة للأبراج الصينية ضحكو عليك
احنا بقالنا في عام البغل ثلاثين سنه كاملين
وبيقولوا الثلاثين اللي جاين عام الجحش

مينفعش نقاطع الصين طبعا
امال نجيب فنوس رمضان بتاع حمادة اللي بيقول بابا فين منين

ربنا يخلي الصين "بلاد نم نم " هم اللي عرفونا بابا موقعه فين .. كان ياعين امه تايهه

نـــــور يقول...

حلوه يابو العريف
تصدف كنت دايما اقول لو الصين امنا الروحيه سابتنا قدام باب ملجأ احنا هنموت من الجوع
اسكت يابو العريف ده كويس انك مااخدتش بالك ان مصر كلها بقت صينى الا حلويات المولد هى اللى بتتعمل هنا
معلش هى مأثره عليا اصلى لسه واكلاها
بقولك ايه؟
ماتقولى انا برج ايه علشان اعرف منه انت برج ايه؟
اصل كنت بسمع دكتوره زعروره فى التليفزيون بتتكلم عنهم بس مكنتش بفهم حاجه
بس اوووووووعى
اللى بنعمله فى الناس هيتعمل فينا ولا ايييييييييه؟
الا يعنى ايه الكلمه اللى انت كاتبها عالرغيف دى؟
مصيبه لتكون مش عارف :)

Teawater يقول...

هههههههههههههههههههههه
طيب طيب ع كده بيتكم معدش في حاجه
ع فكرة انا باضحك ع خبيتنا اننا معدناش
بنعمل حاجه غير اننا بنزود ديونا ونستلف من الصين يعني والي زاد وغطا
جابلونا لغايه البيت
ربنا يستر لا طبعا احنا منقدرش نقاطع الصين
ملحوظة
اقلب سجاده الصلاة كده هتلاقي التيكيت
صنع في الصين
وزيها الفوانيس والكراريس والاقلام
وكووول حاجاتنا الخلطات المكاوي التلاجات اللبس
الاريشاربات
لتيرشيرتات
برجك بقا الصيني يا سيدي
ماليش دعوة مش هفضح بس انا افخر ببرج الصيني الحصان
فارسه يعني والفارس اخلاق
نييييس توبيك

عاشقه وغلبانه يقول...

اكيد برج الطور الصيني
هههههههههههههههههههه

الصين دي هاتحتل مصر قريب


ربنا يقويك
بس اللي اعرفه ان الابراج الصينيه دي علي حسب سنه الميلاد
يعني كل سنه ببرج
ههههههههههههههههههه

تحياتي

Sweet Violet يقول...

ههههههههههههههههههههههههههههه

ماهو كده الواحد لما بيهرب من حاجه بتجرى وراااااااااه

بس الحمدلله يعنى البيت كله اتدشدش ولا كان فى منتاجات مش صينى ؟؟؟

ده حتى نوكيا بقت صينى

بس صحيح انت عيد ميلادك كام ؟؟؟

سؤال برئ جداااااااااا بلاش تفهمنى صح ((:

اسماء واحلام فى وجدانى يقول...

ازيك وعام ايه انا اسف جدا لانى لم اقرا الموضوع

لعدم وجود الوقت لدى وغيابى المستمر

ولكنى احببت ان اقول لك انى موجود

وان شاء الله عما قريب ساتواجد واقم عندك

هذا لو سمحت لى

موجة يقول...

انا احتج
اشمعنى بقى كتبت بس عن عام الارنب بقى او برج الارنب
وانا مالى ماليش دعوة عاوزة حقىىىىىى
كمان لو حبيت تقاطع المنتجات الصينى يبقى احب ابشرك انك هتمشى حافى ومش لابس هدوم كمان وهتعيش بلا اكل بلا شرب بلا ماوى بلا .........
بلا كل حاجة بقى لان كل حاجة هنا بقيت صينى ماعدا احنا
انا خايفة فى مرة اقوم من النوم الاقى البشر اتحولو وبقو صينى
ونيهاااااااو بقى يا شيشيية
اصلى كنت بحاول اتعلم اتكلم صينى من اربع شهور فاتو ولسة مكملتش الا تلات ارع كلمات
نيهاووووو بقى ياشيشية يعنى باى بقى ياجميل
هههههههه اى خدعة
طولت عليك
تحياتى بس زعلانة وربنا عشان الارنب وودانة الطويلة دى اشمعنة الارنب

موجة يقول...

اه صحيح انا كمان عاوزة اقولك ان الابراج الصينى بتتحدد بسنة الميلاد وانا بقى عرفت انت برج ايه لو عاوز تعرف اذا كنت بتكلم جد ولا لاء
صرح لى اقول انت برج ايه وانا هقول عشان اثبت لك انى عرفت
ههههههههههههه

اقصوصه يقول...

هههههههههههه

انا خايفه تكون

من مواليد البرج اللي ميتسماش

بس يلا

هونها وتهون :)

رئيس التحرير يقول...

بسم الله الرحمن الرحيم
السلام عليكم ورحمه الله وبركاته
ابراج صيني ...وعيش صيني
قول لمصر بلدنا ...صيني عيالك
و قول لكل بناتنا صيني عزالك
وانا والله مش فاهم حاجه
وعرفت انت برج ايه...
انت برج الجزيره!!!
اهو دا الحاجه الوحيده الي مش صيني ف بلدنا

rona يقول...

لا الموضوع جامد جدا
بسهنسيب الصينونروح فين طيب
مهى جودتها جيده وسعرها افضل

أبو العريف يقول...

maha zein

استري علي وحيات ابوكي
انا عارفك مابيهمكيش
وحياة المروحه اللي شفطتك لتستري علي
وبعدين نمر ايه
هو النمر بيتشفط قولي قط .فار
وبعدين سمك دا اسمع عنه
اما الكالـ............ايه
دي صحراء في افريقيا دي
ولا تقريبا جزر في المحيط الهندي

أبو العريف يقول...

maiosha
ايه دا بقي دا بقي دا بقي بقي ده
مكافأه للي يعرف برجي الصيني
طاب تديني كام وانا أقولك
المشكله ان ناس كتير عرفوه بس متسترين علي
ربنا يكرمهم
الحمدلله انك ما عرفتيهوش والا التريقه كانت هتبقي للركب
بس الصين مشاصرنا احنا بس دي محاصره كل العالم

وبعدين انا اتكسفت مرضيتش اقول كل الحاجات الصيني اللي عندنا لا يعتبروني عميل

أبو العريف يقول...

ستيته حسب الله الحمش
والله معاكي حق عام البغل
وبقلنا 30 سنه
يعني كل البشوات اللي نفسم يعرفو انا برج ايه يستريحو ا لان الحال من بعضه
بس الحمد لله نفدنا احنا من حكايه عام الجحش دي

أبو العريف يقول...

Habiba
بالنسبه لحلاوة المولد انا ما دقتش عشان احكم
فانتي لو اديتيني حته انا ممكن اقولك هي صيني ولا من ابو قتاته
اما بالنسبه للابراج فالحمد لله الزهايمر مظبط المسائل ونساني حتي هي ايه الابراج دي
اسكتي مش طلعت بسنة الميلاد يعني انت براءة ياستي مش معايا ف البرج الحقير اياه

اما الكلمه اللي مكتوبه علي العيش دي
مش عااااااااارف
والله انا اصلا كنت كاتب صنع في الصين بس بالانجليزي
فيظهر ان البلوج اتأثر بالموضوع وبدأ يهيس
فلما نشرته طلعت زي مانت شوفتيها كده
قلت والله حلوه اهو الناس ممكن تفكرني اني ابو العريف فعلا وعارفها
بس ياخوفي لو واحد دخل هنا ويكون بيعرف صيني اصل الكلام دا شكله هندي مش صيني

أبو العريف يقول...

Teawater
انت صدقتي اني اقدر اكسر حاجه
دانا كنت اتطردت من البيت شر طرده اهو الواحد تخيل اللي كان عايز يعمله
بس مش عايز حد يغير اسمي من ابو العريف لابو لمعه
ولا كله محصل بعضه
انا فعلا شايف ان كل حاجه صيني
تخيلي اننا لو ما اسنوردناش من الصين هيبقي ايه مصيرنا
مش هنعرف نعيش
اما برج الحصان دي انا بهنيكي علي فروسيتك بس مش هقولك انا برج ايه
انا خايف من الناس التانيين

أبو العريف يقول...

عاشقه وغلبانه

ياريت كان الطور
دا حتي الطور يبقي احسن
وهي فعلا الابراج دي بسنه الميلادبس انا
قريت الموضوع دا من كام شهر ونسيت كل حاجه الا اسم البرج بتاعي
اصله اللي شفته مش قليل
بس من حفر حفره لاخيه

أبو العريف يقول...

Sweet Violet
لن انا فاهمك كويس قوي
بس الحمد لله فضل شوية حاجات كده كان تقفيل ابو قتاته
بس الغريب بقي الست الصينيه دي
والله بعد كدة كان فيه معرض للملابس الصينيه واحد صاحبي قالي عليه

أبو العريف يقول...

اسماء واحلام فى وجدانى
ولا يهمك ياباشا
ترجعلنا بالسلامه

أبو العريف يقول...

موجة
اوباااااس
هي جات فيكي انت
طبعا انا مقصدش
مخدش بالي انك ارنوبه
متزعليش يا باشا
اما بخصوص الجماعه الصينيين
انا خايف الاقي عيال صغيره مكتوب علي قفاهم
.................
تخيلي انا لقيت الجاكت اللي لابسه صيني

بس وحياة ابوكي بلاش فضايح استري علي
اوعي تقولي

أبو العريف يقول...

اقصوصه
تصدقي انا لقيت ناس من البرج اللي ما يتسماش ده
لا ياستي البرج بتاعي ارحم بكتتتتتتتتتتتتتتير
لا وايه وكاتبينه في البروفايل بكل فخر
دانا ..........ومكسوف

أبو العريف يقول...

رئيس التحرير
شرفتنا ياباشا وان شالله ما تكون اخر زياره
فعلا مصر لازم تصين عيالها

أبو العريف يقول...

rona
ياتري رونه يعني روان
اصلي بموت ف الاسم دا عشان البت روان بنت اخويا بحبها موووت وعاملها بوست هينزل قريب

السعر اه اقل بس الجوده مش افضل ولا حاجه

نـــــور يقول...

اسكت ماهو انا عرفت مؤخرا انى ارنوبه :)
قال وايه ياخويا انا اصلا كنت عارفه ان فى ابراج بسنه الميلاد بس مكنتش فاكره ان الدكتوره زعروره قالت انهم الابراج الصينينه

حلاوة المولد هديلك حته عنيا
يالهوى
هو انا هيجيلى اغلى منك ؟
اشيلك حته نوجا؟ ولا بلاش اصلى بحبها
هشيلك حاجه مش اكون انا بحبها p:

اه روح ربنا يوعدك بواحد صينى يدخل البلوج يشهر بيك ويقول انك بتسوأ سمعه الكلام الصينى بالهندى اللى انت كاتبه :))

د. ياسر عمر عبد الفتاح يقول...

هههههههههههههه
أنا حاسس إنى ممكن أجى اسلم على واحد صاحبى يطلع صينى
احنا منقدرش نقاطع الصين أبداً

هيه ابراج الصين دى مش جنب أبراج المهندسين برضه؟؟

محمد عتلم يقول...

ازيك يابو العريف
الصينى مغرق العالم كله مش مصر بس
تخيل فيه سجاجيد صلاه وسبح صينى طب احنا بنعمل ايه بأه ؟؟

أبو العريف يقول...

حبيبه

ماشي اي ستي
واحد صيني يشهر بيه
هو انا ناقصهم هنا كمااااااان
وبعدين انت جبت حلاوة المولد منين

علي فكره مفيش عندي حلاوة مولد خالص وشكلي مش هشوفها الا بعد ما ارجع

روحي بقي كلي جزر وسيبيلي حلاوة المولد

أبو العريف يقول...

د. ياسر عمر عبد الفتاح
انا سعيد جدا بزيارتك
وبعدين الجماعة بتوع الصين دول ماليين البلد
انا خايف اقوم الصبح الاقي عنيه مضيقه ومش بعرف عربي

لا جنب ابراج الاطباء

فضه يقول...

يا ابو العريف وايه وداك هناكيا عمللابراج دى مهى اكيد مضروبه..
بس متزعلش نفسك لو كنت طلعت برج كده ولا كده وانا عارفه انه كده,اهم حاجه متزعلش وكنت تقول مكناش هنتريق ولا حاجه بدل بقى معقلنا يعد يودى ويجيب كده.........

انت حر

بس جميل البوست وتقبل مرورى لمدونتك.

بس خلاص ... يقول...

ياترى انت برج ايه ياهندسة ... ايه البرج اللى طير ابراج عقلك كلها ....
وبعدين ماله الصينى يعنى اذا كان مش عاجبك روح عيش فى كوكب تانى بس قبل ماتروح اتأكد انه انضف من الصينى ومفيهوش ولاواحد صينى
طيب هما غلبوا الناس كلها حتى فى عدد السكان
تعرف تقولى بقا احنا غلبنا فى ايه
لامؤاخذه يعنى بلا خيبه طب وماله صينى صينى بس يعيش

سمكه واحده يقول...

اه والله يا ابو العريف كل حاجه صيني صيني
ده شويه وهنتنفس هوي صيني بس بجد بلد عجباني اوي بنت نفسها بنفسها وبكره هتبقي حاجه
يارتنا زيهم
بس بردو مش بحب الحاجه الصيني
انما انا نفسي اعرف برجي ايه
بس عشان حرام وغلط ان الواحد يقرها ولو حتي علي سيبل الهزار مبحولش اشغل نفسي
تحياتي

أبو العريف يقول...

بس خلاص

نعم عايزاني اقولك انا برج ايه
انا برج الجزيره
هههههههههههههه
معاكي حق والله العظيم
اللي عايز ما يقابلش الصيني
يدور علي كوكب تاني
بس شويه وهنلاقي كواكب صيني

أبو العريف يقول...

سمكه

طبعا احنا لازم نحترم البلد دي اللي قدرت
تستغل العدد الكتير وبدل ما يسببلها مشكله
يكون هو مورد مهم جدااا قدر يغير وجه العالم

أبو العريف يقول...

عتلم

الصيني مغرق العالم فعلا
بس احنا زودوها معانا حبتين
انا خايف علي الاجيال الجديده
يطلع شبه الصينيين

صفــــاء يقول...

.
يعنى خضيت الوليه وجبتلها صرع
وهى ذنبها ايه عشان من الصين وبتشتغل هنا
ما احنا عندنا عجز فى العماله ونقص فى المواليد وبنعوض دة بأستيراد عماله من دول الشرق الادنى
ولا مينفعش نستغنى عن الصينى ... امال نشترى الحاجت الزباله منين... واحنا بنعمل ازبل منها
.

عمدة كفر المظاليم يقول...

أخي الكريم: السلام عليكم ورحمة الله وبركاته

قرأت في جريدة الدستور: "مصر هبة الصين والصينيين"

وقرأت فيها أيضا: "يوجد في مصر 3 أنواع من السلع:
سلع استهلاكية
وسلع انتاجية
وسلع استفزازية