الاثنين، فبراير 09، 2009

قالتلي سلام

النهارده هسبني من الهزار ونخش بقي عالرومانسيه

مع اني مش وش رومانسيه ولا حاجه بس قلت نجرب نكتب

*****

عمرك قابلت حد لمره واحده ويادوب اتكلمتوا كلمنين بس وحسيت انه هو دا الانسان اللي كان نفسك تلاقيه من زماااان

وبعد ما يمشي بتحس انك اتعلقت بيه جدااا و بتقول يارتني كنت عرفته اكتر وحاجات من هذا القبيل

انا شخصيا عمري ما حصلي حاجه زي كده حتي شوف الكلمتين دول كده

***

قالتلي سلاااااااااااااااااااااااااااااااااام

*****

قالتلي سلام ......وتاهت ف الزحام منّي

ومن يومها .......ونار الشوق بتقتـــــلني

سلام ايه دا اللي خلاني ادوب فيها

سلام ايه دا اللي جنني
**

خدت قلبي ... بنظره واحده سحرتنــــي

خدت قلبي .... وانا للحيره سابتنــــــــي

يا قلبي ازاي ... تدوب وتحب من نظره

يا قلبي ازاي ... دي اول مره تقابلنــــي
****

ما كنش سلام ....دي غنوه من شفايفــــها

ماكنش سلام.... يا رتني كنت اعرفهـــــا

سلام ايه دا اللي خلاني ادوب فيها

سلام ايه دا اللي جنني

****
خدت قلبي .... معاها وهي بتسلـــــــم

خدت قلبي .... ف ثانيه راحلها وسلم

يا قلبي ازاي ....اوام ما لحقت تعشقها

يا قلبي ازاي ... يارتنا لحقنا نتكلـــــــم

هناك 36 تعليقًا:

بنت الغربة يقول...

ملحقتش تتكلم دلوقتى
اتكلم تانى لما تشوفها
او خد موبيلها وكلمها
او امشى وراها واعرف عنوانها
او اعرف اسمها بالكامل ايه واعمل سرش على رقم البيت
او اعرف هى بتشتغل فين وزورها
او هى فى كليه ايه ورابط هناك
ايه ياعم انا اللى هاقولك تعمل ايه؟؟؟
هى الرجاله حصلها ايه؟؟؟؟؟
تحياتى

Teawater يقول...

ههههههههه
لا والله ع فكرة مكنش اقصدي اوترك
انا بارخم بس
مش ده بلوجي برده

ههههه
حلو الرومنسيه ديه جلوة جدا

هو بصراحه الشعر مكنش متناغم اوي بس الي حسيته ان جواك احساس

نيس جميييييل

نفرتارى يقول...

اه الجمال ده .. حلوة قووووووووووووووووووى ..
يعنى خلاص خطفتك بسلامها .
عقبال الدنيا ما يخطفها السلام.
بجد تجنن .

تحياتى ،،

وردشان smilyrose يقول...

الله الله الله

يا أبو العريف

والله جميلة جدا وبجد كتير بنقابل ناس

ونتكلم معاهم ونحزن كتير لما يسيبونا

فكرتنى باغنية حليم

على طول الحياة نقابل ناس ونعرف ناس

ونرتاح ويا ناس عن ناس ويطول الزمان بينا

ويغير لون ليالينا ويمكن ننسى كل الناس

ولا ننسى حبايبنا اعز الناس حبايبنا

حبايبنا

مش عارفة جت على بالى

قلت اكتبها

بس بردة تحفه كلماتك

smilyrose

روح الحب الصادق

غير معرف يقول...

هههههههههههههههه
يا سيدى على الرومانسية





معلش معلش.حاول تكلمها تانى

كيكى عوووووو يقول...

تليفوني عايزني اعمله رجيم

قال ايه بيغير كده من كيكي

ان خلص شحن املاه بنزين

وان عطل ابعته للميكانيكي

****
يانهارك الوان كلوركس!!
دنا هفجر المدونة بلى فيها خلاص بقى يضرب عليا المثل....قدوة انا فى عمل الرجيم!!!!
احسسسسسسسسسسسسسسسسسسسسسسسسسسسسسسسسسن دة عقاب من ربنا انك عندك نوبيل زى دة
احسسسسسسسسسسسسسسسسسسسسسسسسسن يارب يجيلك تانى
**وش بيطلع 100 لسان
وخد الكرسى فى الكلوب دة
طراااااااااااااااااااااخ
عوووووووووووووووووووووووووو

كيكى عوووووو يقول...

سيدى ياسيدى على الرومنزية دى
**دة انا هنهار من الرومنزية دى**
بس بينى وبينك تصدق ان دة فعلا الى بيحصل..بس تفتكر الواحد قد اية هيستنى عشان دة يحصل!!
انا برضة كدة هستنى بس عندى يقين انة فى يوم من الايام هيجى لوحدة صدفة
ومن غير ما اضربة هيجى برضة
***بس ياجدع مش كنت اخدت رقم تليفونها ولا هى كانت مستعجلة***
عوووووووووووووووووووووو

أميرة الجنة يقول...

السلام عليكم
هو فى احلى من الرومانسية فى حياتنا
بجد احساسك عالى قوى وجميل جدا ابقى كتر من الرومانسية شوية
سعدت بتعليقك على مدونتى المتواضعة وعلى فكرة كان ليه اثر وادانى دفعة للامام
دمت مبدعا

اسماء واحلام فى وجدانى يقول...

انا طول عمرى حزين وفى ناس ولاد حلال وصفولى مدونة سعتك واول ما اجيلك

الاقيك توبت عن الهزار

طيب ممكن حضرتك ترجع تهزر تانى

احمد

ghorBty يقول...

السلام عليكم

بوست جميل جدا

وبيحصل علي فكرة

مش رسولنا عليه الصلاة والسلام قال

الارواح جنود مجنده من تعارف منها أئتلف وما تنافر منها اختلف

بوركتم

غربتي

جارة القمر يقول...

جميل قلمك
دمجت العامية باللغة العربية
سيدي ياسيدي عالرومانسية
رائع جدا
استمر بالعطاء
شكرا

أبو سنوفة...الدراع اليمين يقول...

يا حلاوة يا ولاد
اللى رماك يرمينا يا عم
اللى عطاك يعطينا
ده انت طلعت نمس
روح كده يا عم
روح كده
بص يا ابو العريف
انا مش سيبة الحرامي ياخد الهبرة لوحده ابدا
انا مبسبش حقي لحد خالص
انا بس بخطط للجدع ده وبتكتكله عشان انا اتخنقت منه من تعذيبه وضربه ليا ولسوعته ليا بشريط اللحام
اللى منه لله ده
عموما قريبا هتشوفني في ثوب جديد
ابلو سنوفة

بس خلاص ... يقول...

ازيك يابو العريف والله بجد بجد انت مشكله
اولا انا موافقه على اقتراحك ودى فكرة جميله جدا واتمنى ان اكون عند حسن ظنك ونعمل حاجة ثنائيه كويسه
بالنسبه بقا لاصحاب السلام هى قالت لك سلام ولا اعلنت عليك الحرب
خدت قلبي ... بنظره واحده سحرتنــــي
ومن يومها .......ونار الشوق بتقتـــــلني

سلام ايه دا اللي جنني
سحر ونار وقتل وجنان يالطيف يالطيف
وكمان بتقول
خدت قلبي .... معاها وهي بتسلـــــــم
دى ناس مفتريه وكمان حراميه ياربى كل ده من سلام
امممممممممممم
شوف ياهندسه مفيش حد احسن من حد لازم لازم تدور عليها واول لما تلاقيها تروح انت كمان رامى عليها 3 سلامات يطرحوها ارضاوتاخد منها قلبك وكمان قلبها
بجد جميله جدا وموقف بيحصل كتير جدا جدا لكن ووووووولايهمك اعمل بس بالنصيحة وهتشوف

Unknown يقول...

يا سلااااااااااااااااام اومال لو كانت قالت ازيك وللا هاو ار يو وللا قالتلك الساعة كام كنت قلت ايه؟؟؟؟

فتــافيت (رحاب الخضري) يقول...

يا سلام ده كله على سبيل التجربة؟؟؟؟
حلوة اوي بجد.. مع انى مش مقتنعة بالحب اللي من اول نظرة ده

بس بجد تسلم ايييييييدك حقيقي جامدة

سلااااااااام .. بس اكيد مش زي سلامها

انت تسال والكمبيوتر يجيب يقول...

سعداء بمرورنا فى المدونه ولذلك نوجه لك هذه الدعوه
دعوه
الأخ العزيز/
تحيه طيبه
برنامجنا الأذاعى عن النت والمدونات من الأذاعه الرئيسيه لمصر اى اذاعة البرنامج العام يذاع يوميا التاسعه وعشر دقائق صباحا عدا الجمعه
ندعوك لزيارة مدونتنا والتعليق على ما نطرحه من موضوعات وهذه التعليقات تذاع باسماء اصحابها فى حلقات برنامجنا

وبموقعنا رابط بالضغط عليه والأتنتظار قليلا وقت أذاعة البرنامج يمكنك الأستماع الينا
المدونه
http://netonradio.blogspot.com
الموقع
http://dear.to/cairo

فكرة من الزمن ده يقول...

لا والله ابو العريف فعلا ليك مستقبل بردو في الرومانسي والله حلوة ومعبرة هي صحيح فيها حاجات مش موزنة شوية بس اهم حاجة فيها احساس بجد
بالتوفيق

أبو العريف يقول...

بنت الغربه

تخيلي ان انا لما كتبت الكلام دا كان مجرد فكره يعني ما كنش حصلي ولا حاجه

بس بعدها بفتره حصل وقابلت بنوته اتعرفت عليها وتاهت في الزحام مني
وبرضه معرفتش اخد تليفوتها ولا ايميلها ولا اي حاجه


انت صدقتي

أبو العريف يقول...

teawatr

شكرا علي رأيك يا باشا وانا بس بحب اهزر معاكي

وانت الوحيده اللي بتقولي رأيك بجد

أبو العريف يقول...

نفرتاري

شكرا ياباشا
نورتيني

اسمك حلو قوي

أبو العريف يقول...

smilyrose
شكرااا علي رأيك بس حقيقي
الانسان ممكن يقابا حد عمل فيه كده
بس ما بيحسش بقيمته الا لما يمشي ويضيييييع



انا ودماغي

اكلمها فين
معاكي تليفونها
لو قابلتيها سلميلي عليها




كيكي

ايه دا كله انت لسه واخده بالك
طاب دانا التليفون دا عقدني انت عملتيله ايه عايز يقلدك

وبعدين ايه كل الدربكه اللي انتي عملاها دي
انا مالي التليفون هو اللي حاطك ف دماغه

وبعدين انتي تبع انهي تنظيم

أبو العريف يقول...

اميرة الجنه


متشكر يا احلي اميرهانت فعلا مدونتك رائعه
وحكتر من الرومانسيه


احمد
لأ يا عم والله ما تبت عن الهزار اللي جاي هزار
بس قلت اجرب حاجه تانيه



ghorBty

متشكر قوي
والله بتحصل واكتر من كده كمااان



جارة القمر

متشكر علي رأيك
بس والله ما لي دعوه بالفصحي
انا احب اقراها بس اكتبها معرفش

أبو العريف يقول...

أبو سنوفة...الدراع اليمين
ايه يا حاجه الرعب اللي داخله علينا بيه
حصلنا القلق
فين بقي اللي انت بتقولي عليه
اهو الحرامي عمل بوست تاني ومعبركيش
شكلك كده مرقده للحرامي دا ومش عايزه تظهري
في الصوره عشان لو اتقفش يروح ف داهيه لوحده



بس خلااااااص

كويس ان الفكره عجبتك بس ايه هنبدأ في التنفيذ ولا زي المره اللي فاتت
انا عموما لسه بدور علي اسم مناسب بس البوست جاهز
دوري معايا وابقي بلغيني والاميل معاكي

اما بالنسبه للسلام
فدي فكره وكتبتها الاول بس حصلت معايا بعدين
ومش هدور طبعا لان الاحساس بياخد فتره ويعدي
بس الواحد بيفضل يدور علي النص التاني لحد ما يتدبس

أبو العريف يقول...

انجي
هي مش سلاماللي عملت دا كله
دا كان حوار كبير جداااا بس الموضوع عن ان الانسان يقابل حد لاول مره ويقول سارست كنت اعرفه



فتافيت
ولا انا مقتنع بيه
وليه مش زي سلامها
دانا حتي مشوفتكيش متخافيش يعني



فكره من الزمن ده

متشكر علي رأيك
بس علي فكره هي موزونه لان الكتابه للاغاني كتابه سماعيه يعني مش لازم تكون علي بحر الرجز او لوافر اوالبسيط او الطويل اواي من بحوور الشعر العربي
وكمان مش لازم تقسمها لتفعيلات

وعلي فكره ايام الجامعه كان ليه واحد صاحبي عايش في دور الملحن زي مانا عايش في دور اللي بيكتب كلمات كده وعملها لحن حلو قوي وكنا بتقعد نغنيها بس ولا حد سمعها

ستيتة يقول...

ايه ده ايه ده ايه ده
يعني كده برضه يامعلم
اسمك ابو العريف وتتكحرت بس من اول سلام

طيب استغل اسمك وكلمها عن الويزر "الجو يعني"
اطلب مونديل كلينكس على ما تفتح شنطتها تدعبس فيها يكون ربنا فتح عليك بكلمتين

هي دلوقتي قالت سلام .. طيب نجيبها ليك منين؟

مدونتك جميلة ودمك خفيف .. دي رد لزيارتك وان شاء الله مش ها تكون اخر زيارة

صفــــاء يقول...

.
يعنى طيب حبها واتعلق بيها من بعد خمس دقايق .... ربع ساعه ... مش اول ما تقولك سلام

ليه يعنى هو انت كنت واقع خالص ومستنى أى كلمه ؟

سخريتك جميله
.

أبو العريف يقول...

ستيته حسب الله الحمش
انت ما تعرفيش اللي فيها دا ابو العريف دي اساسها اني مش عارف حاجه بس اهو بضحك علي نفسي عشان ما يجليش اي انواع الاحباط
اما بالنسبه للحدوته
فهو دا بقي اللي حصل اعمل ايه هقطع نفسي يعني

نورتيني





صفاء

كنت واقع واقع يعني
لوحد كان طلب مني نروج مراجيح السيده ماكنتش هتأخر

شكرااااااااااااا

نـــــور يقول...

هو مش حضرتك برضو اللى كان اسم حد مش فاهم حاجه؟
ممممم ولا انا غلطانه وشكلى وحش؟

على فكره بتحصل الحاله دى بس نادر اوى
انا شخصيا قابلت الحاله دى

كلماتك بتعجبنى جدا على فكره
عارف اللى مش بنساه ايه؟
البوست اللى كنت عمال ترسم فيه ده

ولو ماطلعتش اللى كنت بترسم وكده
يبقى مش تحرجنى وابقى قولى انتى خرفتى خالص
بس بالذوق والنبى بعدين انا بزعل اوى :)

أبو العريف يقول...

Habiba
حبيبه
انا مبسوط جداااا انك لسه فاكراني
حقيقي فرحان قوي ان فيه حد واخد باله

انا فغلا حد مش عارف حاجه
قلت اعمل فيها ابو العريف
والبوست بتاع الرسم دا انا ممكن انزله تاني بعد فتره اذا كان عاجبك

علي فكره انا بعرف ارسم يعني محاولات كده علي قدي وقريب هنزل بوست رسم وكده

والف شكر يا احلي حبيبه

نـــــور يقول...

:)

انا برضو مبسوطه ان شكلى ماطلعش وحش :)
انا فعلا مش ناسيه لا البوست ده ولا الكومنت بتاعى عليه
لانى افتكر ايامها كنت مدايقه شويه وكلامك حنى خلانى رسمت صوره فى خيالى سرحت فيها حتى قلتلك ارسم اللى انت عايزه بس بلون السما والورد علشان تبقى الدنيا حلوه فى عنيك
ده طبعا بالذاكره اللى بجد بحمد ربنا انها طلعت الكلمتين دول لانها ضعيفه جداااااا
انا بصراحه مبسوطه برضو علشان انا طلعت احلى حبيبه
وعلشان كمان حكايه برج الحمل دى مع انى مش ليا فى الابراج اوى يعنى :)

وحاجه اخيره
بخصوص انى مهندسه دى فانت اللى زيى يابابا مش انا اللى زيك انا ولا فخر عندى 21 سنه وقريب هيبقوا 22
مع انى متأكده انك اكبر منى
بس ارجوك بلاش تحرجنى وتقولى انى رخمه وانى مفروض ابقى انا اللى زيك
يعنى خدنى على قد عقلى :)

باى ياهندسه

نـــــور يقول...

على فكره ممكن توفر على نفسك تعب الطريق وتتكلم هنا بس لانى على البلوج وكمان عامله متابعه للتعليقات بتاعتك بتجيلى عالميل بدال ماتروح عندى وتاخد تاكسى رايح وراجع وكده وانا مش عايزه اغرمك كتير

لا انا مش عماره مع انى كان نفسى فيها
انا تخصصى لسه جديد فى مصر اسمه هندسه صناعيه وبيدرس اداره مشروعات ومراقبه جوده وتخطيط انتاج وسلاسل امداد وكده

مش عارفه سمعت عنه ولا لا؟
بس فى كل الحالات ميرسى لزوقك ياهندسه
ولا طبعا لازم اعترف وليا الشرف انى انا اللى زيك

باى تانى

أبو العريف يقول...
أزال المؤلف هذا التعليق.
كراكيب يقول...

ياااااااي يا سحر عيونه ونظراته اول ما تلاقينا عين بعين
ياااااااي شو مهضومة كلماته بدي بسلام كيف لو كانوا سلامين

تخاريفووووو ما انت فظيع في الرومانسية اهو
كمل كمل

peeeeeeace

موجة يقول...

مش شئ غريب لما كنت حد مش عارف حاجة وفجاة كدة تبقى ابو العريف
كلامك حلو وانا مصدقه انه ممكن يحصل لو زرت مدونتى هتلاقينى كاتبة قصة يعنى تشبة كدة بس دة كان سلام بالصوت من غير الصورة
عموما تحياتى لك تمنياتى بالتوفيق

دعاء مواجهات يقول...

جميله هى تخاريفك ومتميزة

دمت بخير ودام تخريفك بخير ايضا

===============================
بقينا بنشوف الى بتقول عليه دا ف الافلام وبس ومينفعش غير افلام اصلا

بيس

أبو العريف يقول...

كراكيب

يا فرحة قلبي بزيارتك يا كراكيب
انتي بتيجي تكركبي المدونه بس انا مبسوووط جدا انك هنا وان تخاريفي عجبتك

هحاول اكمل



موجه
انا سعيد جداا انك لسه فاكره مدونتي القديمه
وعموما هتلاقيني مرابض عندك في المدونه
ومنشكر انك فاكراني


مواجهاااااااات

مواجهات عندنا يا مرحبا يا مرحبا
انا سعيد بزيارتك ومتشكر علي رأيك
والحقيقه اللي انا بقول عليه دا نادرا لما بيحصل بس هي مجرد فكره خطرت علي بالي وكتبتها