الخميس، يناير 29، 2009

تخاريف

دي حاجه كده كتبتها من زمان قوي من يوم ما جبت أول موبايل وطبعا كلكم متخيلين شكله ( ال يعني الواد جاب غير ما هو هو عنك لغاية دلوقت ولا هنفتح من اولها ) ولما خلصت لا كانت تنفع غنوه ولا قصيده ولا حتي خاطره يعني مش لاقيلها مسمي غير

تخـــــــــــــــــــاريف

ظروفي الضنك خلتني اجيب محمول

ماهوش محمول قوي لكن اهو بيقول

ماكنتش عايز ألجأله

ولا أبقي ف عمري من أهله

لكني لقيتني محتاجله

ولازم اشتريه علي طوول

****

ف رحت بسرعه جري اوام

عالواد نبيل (قول رقمك كام )

ودا احسن واد بيبيع محاميل

في المهنه دي دقرم واصيل

وارثها عن جده ابو خليل

في الاصل كان بياع شخاليل

****

من غير ما ألف عليكو وادور

اهي حاجه كده بتأدي الدور

دي حاجه بسيطه قوي علي القد

دي كده وكده مش عده بجد

****

عده مافيش زيها ف الدنيا

شكلها كده شبه الساكسونيا

ناحيه فيها حاجه شبه الشاشه

وزراير ف الناحيه التانيه

****

أله حاسبه وعامله انها محمول

شكلها كان ينفع برايه

تطلبه تلاقيه دايما مشغول

تليفوني دا حكايته حكايه

معرفش بيعمل ايه علي طول

وعايزني ال اجيبله مرايه

صدقني ظبته ف يوم مسطول

بيشم كلف ف كبايه

****

تليفوني يا ناس هيجبلي الضغط

تليفون ما فيهوش مكان للخط

من النوع اللي ساعات يتمط

وبطاريته لما تحط

لازم تجيبلها شقة فووووول

*****

تليفوني عمره ف مره مارن

لو جاتله رساله دا يبقي اتجن

وكل يوم يعمل عيان

وكل ساعه بيخلص شحن

****

تليفوني دا اللي مقضيها وعايش كده حر

يسهرلنص الليل دايما ويقوم الظهر

تليفون بينفض ويفلسع ويغيب م الشغل

ارميه ف الشمس ولما ارجع بلاقيه ف الضل

****

تليفوني جايبلي الكافيه

وقاعد ويايا بالعافيه

واذا رن بلاقي الرنه

اغنيه خالتك حافيه

****

تليفوني عايزني اعمله رجيم

قال ايه بيغير كده من كيكي

ان خلص شحن املاه بنزين

وان عطل ابعته للميكانيكي

****

تليفوني يا ناس أغرب تليفون

ياما نفسي في يوم ألاقيله زبون

أرميه بالليل ف النيل وأصبح

ألاقيه نايم فوق الكوميدون

****

تليفوني ما حدش قده

ولا لاقي له حد يهده

دا ساعات تجيلي انا مكالمات

ألاقيه يرد كده لوحده

***

حد ياخد تليفوني ويديني بداله ولاعه

هناك 43 تعليقًا:

khaled يقول...

السلام عليكم
أهلاً وسهلاً بالمدون الجديدة فى عالنا الصغير
أتمنى لحضرتك مستقبل مبهر
فى عالم التدوين
دومت بكل خير .. وفى إنتظار جديدك

maha zein يقول...

متأكد أنه كان في زراير في الجنب
ولا المحمول ده اصلا اساسا بقرص
يا حاج طمني
يا ابا رد عليا
التليفون ده بزراير ولا قرص
عموما احسنلك اعمله حصاله وخلص
او هقولك
ان شاء الله كده ابقه اعمل بوست عندي نلملك فيه حبة فلوس في ظرف كده ونحاول نجيبلك عده لاسلكي اهون
ده انت عجيب انت وتليفونك

شفقة هانم واحسان بك يقول...

تحفة تحفة
ايه الكلام ده والله برافو عليك
بس بقولك ايه انا لو منك ابيعه واجيب بداله سندوتشات افيد
ههههههههههههههههه
بجد البوست ممتاز

اسماء يقول...

سلام عليكم
ازيك يا ابو العريف
واهلا بيك ف عالم التدوين
ومشكريييييين يا عم ع الزيارة الحلوة
وموضوعك دع فكرني باعز تلفون عندي
بس الحمد لله
بقا دلوقت شغال شاحن
هههههههههههه
وليه يا ابني دوخت من المواضيع
انا لا دوخت حد ولا حاجة
دمت ف حفظ الله
اسماء. المدونخانة

مش أنا يقول...

هو انا دخلت شارع عبد العزيز ولا حاجه
ههههه
:)
أه صحيح نسيت أقول لحضرتك
السلام عليكم ورحمه الله وبركاته
أزيك يا استاذ أبو العريف
بوست روعه جدا جدا
اما بقي بخصوص التسميه
فأنت ممكن تختار حاجه من الاتنين
ياتسيبها علي الله
يا أما تخليها زي ما هي كده
بس بصراحه جميله قوي
ونورت البلوج يا جميل
ونور مدونتي كمان
مع اني :(
بس مش مهم يلا خليها علي الله
أوعي الزيت

بس خلاص ... يقول...

ايه الانقلاب ده من حد مش فاهم حاجة لابو العريف حته واحدة
يابركة سيدى المحمول اللى عمل الانقلاب ده كله
ده انت المفروض تعمله مقام وتخليه كده بركه ومزار سياحى ...
حلو التجديد ياهندسه لك كل التحيات واتمنى لك كل جديد من الموبيلات

عالم حبيب يقول...

ههههههههههههههه بجد جميل جميل جميل

ما شاء الله عليك

عالم حبيب يقول...

اسمع

من فضلك الغي تأكيد الأرقام والحروف عند اضافة تعليق


هاتروح للوحة تحكم المدونة

إعدادات settings
وبعدين

comments تعليقات

وبعدين

Show word verification for comments?

تقوله نو no

علشان التعليق يبقى سهل ما نحتاجش نحط كل مرة الأراقم والحروف

تحياتي

Teawater يقول...

مش مقتنعه
يعني انا اول مرة شيلت عدة كانت 3310
واخر مرة بره كانت 3310
مريت خلال الفترة ديه بـ N73
و 6600 والنجم الشديد
وسامسونج
بس برده شايف ان اهم حاجه في الموبيل ان بيستقبل المكالمات
وبيبعتها
يعني الفايده مش المنظره
بس هي في الاخر كلمات حلوة ولذيذه

roody hanem يقول...

هههههههههههههه

تحفه تليفونك ده بجد

ده اما يبوظ ملوش بيعه تحطه فى النيش على طول

بس جميله

شرفتنى بزيارتك واهلا بيك فى عالم التدوين

محمد عتلم يقول...

لو مش عارف تخلص منه هات شوية بلطجيه يضربوه علقه جامده او شوف حد يقتله واخلص

شادي أصلان يقول...

الف مبروك يامعلم علي المدونة

ومستنين الشغل الجامد
والف شكر علي زيارتك لمدونتي المتواضعة

enjy يقول...

ربنا يصبرك على ما بلاك يا عم....بتفكرنى بموبايلى القديم كان عنده شلل نصفى الله يرحمه بقى مات خالص من يومين

سمكه واحده يقول...

تليفونات بقي
موبيلات بئي
مسدات بئي
رنات بئي هه
ماشي ياخويا؟
ايوه ياعم ماشيه معاك يابختك يابختك
ياتليفوناتك بس بلاش تبدله بالولاعه خساره ده عشره عمر بردو
مبروك علي المدونه الجديده

fashkool يقول...

ازيك يا ابو العريف .. زرتنى لاول مره .. ارجوا دوام الزياره وجيت اخرف معاك و اشوفك لقيت التليفون بتاعك اللى زى انت ما بتقول بترميه فى البحر يرجع لك .. زى القرش المصدى اللى الواحد كلم ما يصرفه يرجع له تانى .. انا عندى اله حاسبه قديمه .. تبادل:؟
تحياتى

gana magde يقول...

ههههههههههههههههه
كل ده للتليفون ده حاله
طب لما تجيب العربيه هتكتبلها ايه
تحياتى

سندريلا يقول...

بجد كلماتك سهله وحلوه وتدخل القلب بسرعه


ومدونتك حلوه

تحياتى لك سندريلا

أبو العريف يقول...

khaled
مشكوور يا باشا
وربنا يوفقك

أبو العريف يقول...

maha zein
حلوه قوي فكرة لم الفاوس دي
المره الجايه هعمل بوست عن الكومبيوتر
عشان ربنا يكرمكو كده وتجيبولي واحد جديد
وبعدين اشوف ايه اللي ناقصني تاني

أبو العريف يقول...

شفقة هانم واحسان بك
حاولت اتخلص منه مش عارف
بس حلوه السنوتشات
احنا شعب بيموت في الاكل

أبو العريف يقول...

اسماء
شرفتيني يا باشا
ياريت تديني الشاحن اللي معاكي علي تليفوني
يمكن حد يرضي ياخدهم ويدينا بدالهم
علبه سالمون

أبو العريف يقول...

مش أنا
امال مين يا عم الحج
شرفتني
ومتشكر علي زيارتك
مع اني خايف من الزيت اللي ملى المكان

أبو العريف يقول...

بس خلاص ...

ابو العريف بس هتلاقيه مش عارف حاجه

شوية تغيير
بس ربنا يستر وما اولعش في المدونه دي هي كمااان
ياريت بقي تردي كعاتك علي الغنوه دي

أبو العريف يقول...

عالم حبيب
متشكر ياباشا علي الزياره
وكمان متشكر علي النصيحه
انا دايما بنسي البتاعه دي

أبو العريف يقول...

Teawater
ولا انا مقتنع
بس ايه التوتر اللي انت عيشتيني فيه ده
انا بهزر بس مع تليفوني
يعني مش بتكلم جد
ثم انا معنديش تليفوووووون

أبو العريف يقول...

roody hanem
اتا حطيته في النيش
قام معجبوش الكلام
عايز اوضه لوحده

أبو العريف يقول...

محمد عتلم

انا خايف اعمل كده يرجع يضربني بعد كده
انت ما تعرفوش دا شرااااني

أبو العريف يقول...

شادي أصلان
الف شكر ياباشا
وانا سعيد انك زورتني
طبعا انا اعرفك من زمان
من الدستووووووووور

أبو العريف يقول...

enjy
الله يرحمه بقي عقبال اليفوني

أبو العريف يقول...

سمكه واحده

مسدات ايه و رنات ايه
دا لا بيرن ولا بيبعت رسايل
ولا اي حاجه قطعي

أبو العريف يقول...

fashkool
انا موافق
بس هي الاله الحاسبه شغاله
ولا هحطها في النيش

أبو العريف يقول...

gana magde
اجيب العربيه الشر بره وبعيد
انا عموما عملت كده فعلا لما اخويا جاب عربيه
وهي ما تتخيرش عن الموبايل
قلت اكتب حاجه ابعتهاله
فقلت

عربية اخويا وحيد عربيه غريبه ونوعها فريد
نصها مصنوع م القش ونصها عامل انه حديـــد


بس مبعتهاش وقلت ابعت اغنية ( يا عزه ) لحماده هلال

أبو العريف يقول...

سندريلا
متشكر جداا
انت اللي كلامك جميل جداااا

smilyrose يقول...

اول زيارة

بس ايه دا يابنى

دا تليفون ولا جر شكل

ربنا يكون فى عونك

ويعفى عنك ويرحمك منه

ويرزقك كدا بتليفون ابن ناس

فيه كدا بلتوس وكاميرا زى الناس

هههههههههههههههههه

اسلوبك جميل وبسيط واجمل ما فيه

بساطة كلماته

smilyrose

روح الحب الصادق

أبو العريف يقول...

smilyrose
انا سعيد جدااا بأول زياره
ويارب ما تكونش الاخيره
وبالمناسبه انا لسه مشتري تليفون النهارده
بس مش هرمي التاني

اسماء واحلام فى وجدانى يقول...

فكرتنى بالشريط اللى فى فيلم ظرف طارق

بس على فكرة انت متاكد ان ده تليفون

ولا حاجة تانية ومتخفية

كل اللى فات كان هزار

لكن الجد كلامك جميل نابع من قلبك

ومن حبك للتليفون

احمد

اقصوصه يقول...

ههههههههههههه

حلوه وايد

طيب اي موديل هالتليفون؟

maiosha يقول...

هههههههههههههههههه
والله حرام عليك .. الكلام ده جامد جدا على فكرة

أنا مش قادرة أبطل ضحك
بس مهما كان التليفون مستقل بنفسه يعنى بيمشى لوحدة ويرد على المكالمات ويغير النغمات
هههههههههههههه
بالمناسبة حلوة اوى نغمة خالتك حافية دى

بجد بوست جمييييييييييل

بالتوفيق إن شاء الله

أبو العريف يقول...

اسماء واحلام فى وجدانى
متشكر جدااا يا بو حميد
وهو مش موضوع حب
هي لحظة تريقه على الناس اللي لازم يكون تليفونها
معرفش عامل ازاااااي

أبو العريف يقول...

اقصوصه

موديل
انت بتشتميه
انا تليفوني يتقاله موديل


شكرااااا

أبو العريف يقول...

ميوشه


انا سعيد جدااااا بتشريفك ليه
يا زيعمة الفاشلين في مصر
مدونتك نحفه

المتبهـدلـون فـي الأرض يقول...

هع هع هع
أول تعلييق



::::::::::

shemo يقول...

السلام عليكم.....
ازيك يا ابوالعريف....
بجد البلوج عندك ليه وحشة
والبوست جاى فى مناسبة فونى المسروق وقولتلى عندى تليفون جامد مواصفاته فى اللينك واتارى دا تليفونك هههههههه مااااااااشى ماشى بس لو جيبت تليفون زى دا يبقى حاعد اعيط كتير ع الضاع ههههههه
بوست لذيذ
دومت بخير
فى رعاية الله .
shemo