الثلاثاء، نوفمبر 24، 2009

مصر..في كأس العالم للمرة الثالثة



المكان ...

استاد القاهرة الدولي

الزمان ...

12 يونيه سنة 2327

الحدث...

المبارة الافتتاحيه في بطولة كأس العالم بين مصر والبرازيل

بعد احتفالات دامت لمدة 10 شهور متواصلة بعد صعود مصر للمرة الثالثة في تاريخها

وبعد اعتذار دولة جزر القمر عن تنظيم البطوله قرر الاتحاد الدولي لنقلها الي مصر

حيث اعتذر ايضا عن تنظيمها كل دول افريقيا

... ودا طبعا بعد توقف للبطوله دام لمدة 17 عام بسبب الحرب العالمية الثالثه والتي كان السبب في قيامها

هو مباراة في كرة القدم في تصفيات المؤهله لكأس العالم

****

نبدأ بتشكيل الفريق المصري اللي بيقوده المدرب الوطني حفيد حسن شحاته

وفي حراسة المرمي حفيد عصام الحضري

خط الضهر حفيد وائل جمعه وحفيد هاني سعيد واكيد انتوا عارفين باقي التشكيل

عشان كده ندخل في احداث المباراه علي طول

بالطبع مازلنا في انتظار نزول الفريقين الي ارض الملعب مش عارف اتاخروا كده ليه

اه جاتلي اخبار حالا ان كاوتش الاتوبيس اللي بيقل المنتخب المصري فرقع

مما اضطر اللعيبه انهم يأجروا عجل من عند عم سعيد العجلاتي اللي اصر انه ياخد

النمر بتاعة فانلات اللعيبه رهن لحد ما يرجعوا العجل

وبالتالي اللعيبه هيلعبوا بدون ارقام

****

واخيرا وصل الفريقين الي ارض الملعب

وضربة البدايه مع منتخب مصر

حفيد ابو تريكه لحفيد بركات ... ماشي حفيد بركات بيمرر لحفيد سيد معوض

اللي بيرفعها حلووووووه لحفيد زيدان وهو والجون وحلوه جوووووووووووووون

ايه الجمال ده الله عليك يا حبيب والديك يا مجرم يا زيدان يا مجرم

اوباااا هو الحكم مش بيصفر ليه محسبهاش ولا ايه

هو فين الحكم اصلا ... انت فين يا حكم ايه يا حكم... الحكم مش موجود في الملعب

اه معلش يا جماعه الحكم كان في الحمام وبالتالي الجون ما اتحسبش لظروف خارجه عن ارادة الحكم

*****

نستأنف احداث المباراه الممتعه للغايه

الكوره مع حفيد روبينيو

بيباصي لحفيد سيلفا وماشي سيلفا

لحفيد كاكا وكوره صاروخيه موجهه لمرمي الحضري

وحلوه يا حضري بيمسك الحضري للكن بتاخد الحضري وجوه الجوووون

وانفجار في مرممي الحضري

ايه اللي بيحصل ده انا شايف ضرب نار واللعيبه بتجري

الله ايه ده انا شايف طائرات مروحيه في الملعب وبتنزل جنوود

والجنوددد شايله دبابات في ايديها ايه اللي بيحصل يا جماعه

استنوا كده انا سامع المعلق الداخلي بيتكلم

لالالالالالالا

دا مكنش المعلق الداخلي دا رئيس الاركان الكوستاريكي بيعلن

احتلال كوستاريكا لمصر لتنضم مصر الي الامبراطوريه الكوستاريكيه العظمي

وبكده تبقي افريقيا كلها في قبضه كوستاريكا

طاب ومصير الماتش ايه

***

اعلن قائد القوات الكوستاريكيه بنقل المباره الي استاد شرم الشيخ

حيث انها تم اعلانها منطقه ذات سياده دوليه منذ خمس سنوات

يعني شرم الشيخ بقت مع نفسيها مش تبع مصر ولا اي بلد تاني

**

والحمد لله ان العربات الكارو اللي كانت جايبه المشجعين لسه وافقه بره الاستاد

عشان تنقلهم مع الفريق لشرم الشيخ لان عم سعيد العجلاتي بعت خد العجل بتاعه

**

كان معكم المعلق الرياضي حفيد مدحت شلبي
وكل سنة وحضراتكم طيبين وعيد سعيد عليكم كلكم

****
ملحوظه
- اي شخص يري تشابه بين احداث القصه واية احداث حقيقيه

يبقي اكيد اكييييد بيستعبط
- الفكره من خيالات قديمه جدا لصديق .. كتبتها باسلوبي متماشية مع الاحداث الجاريه

هناك 33 تعليقًا:

خواطر شابة يقول...

صدق من قال شر البلية ما يضحك
تحياتي

simply me يقول...

حلوه
بس نسيت تقول ان حفيد الريس كان فى حفل الافتتاح ولا خرج قبل طيارات كوستاريكا

غير معرف يقول...

هههههههههههههههههههههههههه

احييك

Remas يقول...

هههههههههههههههههه

الله عليك

ضحكتنى اوى والله في ايام مش عارفه اضحك فيها من قلبي

صحيح
في السعودية بيقولو ايه على اللى حصل في الماتش وما تبعه من احداث ؟

يوميات شاب منوفى يقول...

ههههههههههههههههة
ضحكتنى وانا مليش نفس

Cute Kitty **sookra يقول...

هههههههههههههههههه
حلوه بجد ضحكتنى وانا ماليش نفس اضحك

غير معرف يقول...

هههههههههههههههههههههه

يخرب عقلك بتجيب خفة الدم دي منين

هممووت من الضحك ولهي

هههههههههههههههه

ازيك يا باشا وحشتنا ياراجل وين هالغيبة

يارب تكون بالف خير :) ومتكنش محبط ولا حاجة بسبب كوستاريكا :]

كل سنة وانت طيب وعيد سعيد عليك

دمت بحفظ الرحمن

ستيتة يقول...

هههههههههههههههههههههههههههههههههههههههههههههههههههههههههههههههههه
ضحكتني بشدة وحتى الدموع ربنا يسعدك يارب
اهم شيء ان حتى لما نظمناها كان بعد اعتذار جزر القمر
هههههههههههههههههههههههههه
وبعد حرب
وبعد 317 سنة بس
هههههههههههههههههههههههههههه

رئيس منظمة الهكر يقول...

حلو البوست دة بس انتا متاكد انك بتحب مصر؟ هههههههههههههههههههه عموما اي حاجة في برنامج الماكس انا تحت امرك فيها وياريت نتواصل مع بعض تحياتي

mohamed ghalia يقول...

يااااااااااه ايه ده ده حلم أكيد صح
هههههههههههه

Ahmed يقول...

عم الجميل ابو العريف
كل سنه وانت طيب ياجمييييييييييييل


طبعا مفيش تشابه
والموضوع كله من بنات افكارك
بس بنات افكارك كتروا, لم بناتك يابيه وبلاش تسيبهم كده

وطبعا في نهاية البطوله الرئيس حسني مبارك هيسلم المنتخب الكأس واللي هيستلم الكأس حسام حسن
لأ لأ لأ انا مش عايز الضحكه الصفرا ديه
ايوه هوا السيناريو كده, ولا ليك كلام تاني؟

مسدس صغير يقول...

سيبنا من الكورة
ههههههههه
خدنا منها ايه يعنى غير التهزيق وتقطيع الهدوم
كل سنة وانت طيب وبخير يا جميل
عيد سعيد عليك
وان شاء الله نشوفك قريب

د. ياسر عمر عبد الفتاح يقول...

طيب خد التعليق ده من حفيد ياسر عمر
بص بقى يا حفيد أبو العريف

إنت دمك خفيف زي جدك على فكرة
وأنا جاي أقولك

كل سنة وانت طيب
وجتها ألف نيلة الكورة دي
وقعت الرجالة في بعض

العلم نور يقول...

تخيلات جميلة ومتوقعة .. كل سنة وانت طيب.

كيكى عوووووو يقول...

احتلال كوستاريكا لمصر لتنضم مصر الي الامبراطوريه الكوستاريكيه العظمي


وبكده تبقي افريقيا كلها في قبضه كوستاريكا


طاب ومصير الماتش ايه!!!!
يالهوووووووووووووووووووى يعنى دة كلوا الى همك
احتلال كوستاريكا لمصر لتنضم مصر الي الامبراطوريه الكوستاريكيه العظمي


وبكده تبقي افريقيا كلها في قبضه كوستاريكا

احتلال كوستاريكا لمصر لتنضم مصر الي الامبراطوريه الكوستاريكيه العظمي


وبكده تبقي افريقيا كلها في قبضه كوستاريكا

(`'·.¸ (`'·.¸*¤* ¸.·'´) ¸.·'´)
♥*** happy feast ***♥
(¸.·'´ (¸.·'´*¤* `'·.¸) `'·.¸)
*************************

الشعب لابد له من حكومه تشكمه يقول...

ههههههههههههههههههههههههههههههههههه البوست ده تحفه عجبنى جدااااااااااااااااا..

الا كلمه كده بينى وبينك هو كمان فى توريث فى الكوره والمنتخب :))

كل سنه وانت طيب انا بعيد عليك اهو وعيد سعيد عليك يارب وعلى كل اللى بيحبوك:)

hadeir يقول...

هههههههههههههههههههه
ال 12 يونيه سنة 2327 ال
ده ولا بعد عشر الاف سنه
مهو الفقرى فقرى زى ما بيقولوا :D



عـــيـــد ســــعـــيـــد

نـــــور يقول...

كل سنة وانت طيب ياابو العريف
وعيدك سعيد ان شاء الله والعيد الجاى تكون هنا فى مصر

ليس فقيرا من يحب يقول...

السلام عليكم

كل سنه وانت طيب يارب

عيد سعيد عليك وعلى كل حبايبك

well يقول...

الحلم لسه بيرفرف فى قلبى ويا العلم
نسيتنى انا كنت جى ليه ..ايوا افتكرت
كل عام وانت بخير وعيد مبارك عليك وعلى الامة الاسلامية

رضا الكومى يقول...

الموضوع كله فيه تجنى علينا شوية
صح ؟
وفيه شماتة للهمج البربر
وهيفهموا إن فيه واحد مصرى ما بيحبش بلده
وطبعاً هما فى موضوع الفهم ده احنا عارفينهم كويس
دا لو كانوا بيفكروا .......
وما يعرفوش إن دى خفة دم مصرية والمصرى لا يتأثر بأى شيء

وكل سنة وانت طيب يا باشا

قلم رصاص يقول...

هههههههههههههه بوست جميل

ربنا يبارك لك

وكل سنة وانت طيب ياابو العراريف

في امان الله

Unknown يقول...

ياااااااااأخى!
سيبك من الكورة
شوية ياأبو العريف
وخلينا هنا :كل سنة
وأنت طيب وأضحى مبارك
عليك يارب.والاضحى القادم
تكون مع اسرتك سواء بمصر
او بعرفات.اللهم آمين.

غير معرف يقول...

كوووووووول سنة وانت طيب يارررب

عيد سعيد عليك يارب

ربنا يجعل ايامك كلها اعياد

miroooo يقول...

كل سنه وانت طيب وبصراحه القصه جميله ومضحكه جدا انا متاسفه جدا لانى مقصره فى حقك ومش بازورك كتير بس ربنا يديم التواصل تقبل مرورى تحياتى

(Joudy) يقول...

ههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه

أنا جاية علشان أضحك أساسا

دمت بكل الخير والسعادة والمرح

رحلتنا في الحياة يقول...

يبقى انا بستعبط بقى :)
هو ايه اللى حصل ده صحيح الشعب كله نسى اللى حصل ولا كأن كان غى حاجة
واعتقد ان البوست ده فى الاخر تكتب اللى كتبه حفيد ابو العريف p:

♥نبع الغرام♥♪≈ يقول...

تدوينه جميله

ربنا يسعدك زى ما رسمت البسمة على شفتى


تحياتى لحضرتك

ايناس

الفراغ يقول...

بجد ربنا يجعل ضحكتى فى ميزان حسناتك لانى فى اشد الحاجه لضحكه من القلب
بقول كدا لانى اول مادخلت عندك لقيت كلام وعنوان كروى
قلت يييييييييييييييييه تانى كوره
بس يادوبك لمحت كلمتين
فخدتنى القراءه من نفسى غصب عنى حتى اخر حرف فى البوست
شكرا
لقد استمتعت بالماتش
والحمد لله طلعنا بلا اهداف علشان ماحدش حد بالطوب
بجد ماتش نضيف نضيف

لاسع افندى يقول...

على فكره احفادى راحوا الماتش الفاصل فى السودان سنه2326 واتضربوا من الجمهور الجزائرى


تحيه لاسعه

احمد امين يقول...

يعنى هى ناقصه

أبو العريف يقول...

متشكر ليكم كلكم

وانا عايز اتذر اني مردتش علي تعليقاتكم

يمكن عشان مش لاقي ردود

بس انا كنت عايز اوضح حاجه مهمه

هي اني كتبت الموضوع ده اصلا عشان نضحك

او نخفف من حالة الشحن والحزن والقرف اللي كانت موجوده

لا اقصد اتجني علي مصر ولا اقلل من المنتخب

مجرد فكره للمرح ليس الا

وطبعا محدش يقدر يقول ان في مصري ما بيحبش مصر

كلنا بنحبها مهما عملت فينا

بس احنا اتعودنا اننا نكون اكتر شعب يضحك علي همومه

ايوشة يقول...

مكنتش اعرف انها اتخطبت الف مبروك ربنا يتمم لها بخير يارب


اما بخصوص البوست المتفائل اهو مستنين الالهام بحاجة متفائلة كده ههههه ابقى شوف البوست الاخير يمكن تلاقى فيه بعض التفائل