الجمعة، يوليو 24، 2009

اضراب .........23 يوليو


حد سمع عن إضراب 23 يوليو

( لاء ..... انا بقول اضراااب مش ثوره )

دا بقى إضراب قام بيه مجموعة من العمال الهنوووود

بس مش في الهند

لااااااء ...دا عندي في الموقع

اه اصل شكلهم بيتفرجوا علي قناة الحصيره كتيييير

(طاب وحياتكم لاشيل التلافزيون اللي مبوظ خلاقكم ده واحرمكم من اميتاب باتشان)

*****

الموضوع وما فيه اني رحت الشغل يوم الخميس 23 يوليو

لقيت العمال الهنود والبنغال كل واحد لابس الجيبه بتاعته ولسه ما لبسش هدوم الشغل

( اه والله ... اصل هدومهم العاديه عبارة عن قميص وحته قماشه ( ازار ) بيلفها علي نصه شبه الجيبه كده )

- ايش مشكل ليش ما في شغل الحين ( ايه يارجاله ليه مش شغالين )

- احنا سكّر شغل مهندس .. احنا في انسان مهندس ..كتير مشكل فيه ... انا ما في نوم

كيف شغل ....انا في انسان مهندس ما في سيم سيم حيوان ( احنا عاملين اضراب يا معلم لحد ما تتظبطوا معانا )


****

اول مره اقف هذا الموقف

طول عمري ببقي علي الاقل متعاطف مع الاضرابات

المرادي الاضراب معمول ضدي

يعني انا اللي لازم افض الاضراب ده

****

طبعا لبست عباءة الحكومة الرشيده وقلت اقلد الست عيشه

وافض الاضراب


المشكله أساسا انه مفيش شغل يعني المواقع واقفه بسبب التمويل

وانا كل يوم اقعد الصبح اخترعلهم في شغلانه يعملوها عشان ما يقعدوش من غير شغل

دانا ببقى ناقص اخليهم يهدوا المبني ويبنوها تاني ( سبع مرااااات )

يعني الاضراب ولا هيفرق معانا اصلا


بس بيني وبينكم انا خفت

اه مانا مش ناقص محمود سعد يشردلي في البيت بيتك

ولا احمد المسلماني يقطع فروتي في الطبعه الاولي

ويا خوفي من الجرايد الخضرا واللي هتكتبه

كله هيستلمني يا معلم

"الآلاف من العمال يضربون عند ابو العريف نظرا لسوء المعامله وطولة لسانه "

مع اني والله مؤدب معاهم ثم هما فين الالاف دول

دا كلهم 15 عامل

وعشان ابعد القيل والقال اضطررت اني اعقد صفقه دنيئه معاهم

وهي اني البي كل طلباتهم بمجرد ما تيجي اي دفعه ماليه من الاداره

وان ما لبيتهاش ساعتها يبقي يضربو ا ... هو احنا ورانا حاجه


المشكله اساسا انهم من كام شهر بيطالبوا بالطلبات دي

و نوعدهم ان اول ما تيجي فلوس نلبيها علي طوووول

ولما تيجي الفلوس كل واحد بيتلهي في عد فلوسه وبينسي طلباته


وكانت طلبات العمال تتلخص في

1-

2-

3-

4-

5-

ايه الفضول ده يعني لازم تعرفوا الطلبات

****

المهم اني بعد ما فضيت الاضراب

لقيتني بغني ( انا مصري وابويا مصري وكل مصري .............عليه)



هناك 27 تعليقًا:

Me7'o يقول...

ههههههههههههههه
ضحكتنى والله قوى على الهنود والبنغال دول
ربنا ما يرزقك بفلبينيين

إنت تمشى معاهم سيدا هاتوصل معاهم
إنما ما فى فلوس تبقى سيم سيم مشكل ما فى شغل

ربنا يعينك عليهم
تحياتى أبو العريف
لو عاوز رجالة من الرياض قولى أبعتلك عربيتين صعايدة بمستلزماتهم
تحياتى

أبو العريف يقول...

كراكيب
ههههههههههههههههههه
هههههههههههههههه
تعليققك اختفي في ظرووووف غامضه
معرفش راح فين
انا قلتله نشر
وقعدت ادور عليه شلقط ملقط ملقيتهوش

انا حزين
اجيبه منين دلوقت

ليس فقيرا من يحب يقول...

السلام عليكم

ايه ياعم ابو العريف ده
دا انت قدرات خلاقه
وحتما ولا بد مصر تستفاد منك
فى فض الاضرابات والاشكالات
ملحوظه
دمك سكر

تقبل تحياتى

د. ياسر عمر عبد الفتاح يقول...

ههههههههههههههه
لا مصري مصري يعني
مش أي كلام

يعني إنت طلعت ظالم ومفتري علي العمال الغلابة
وانا اللي كنت فاكرك طيب .. أه منك

mony يقول...

يعنى انت كل اللى عاوزه منهم انهم
يقلعوا الجيبات ويلبسوا بدله الشغل؟؟؟؟؟؟؟

وللا عملوا ايه بعد ما فضيت الاضراب

وللا حسيت بارتياح نفسى واثبت لنفسك انك قادر على فض الاضرابات

وللا هو شغل مصريين وخلاص

منــار فايد يقول...

ايه حتى الهنود عملوها
ماتفكرنيش انا مابكرهشي في حياتي قدهم
سبحان الله وماما دايما تقولي هما عملولك ايه حرام عليكي جايين يشوفوا رزقهم
بجد كنت بحس ان السعوديه مفروض يسموها الهند
كميات رهيبه
والعجيب ان في مناطق في الرياض لما كان بابا بيمشي بالعربيه كنا نلاقيهم واقفين بالمئات كدا وبدون شغل
بدون اي حاجه
على الاقل اللي عندك بيشتغلوا
بس جامده حكايه23

وماله تستاهل امال عامل مهندس كدا ببلاش
لازم تحقق للشعب المطالب
والا انا في قول لكفيل سفر برا
ههههههههههههههههههههه

شكرا جدا ابو العريف

Ramy Wasel يقول...

يا باشا الموضوع اسهل من ذلك
وممكن تسأل اى عسكرى امن مركزى حيقولك على الليله كلها
هوا خرطوم مياه
من بتوع المطافى
او شويه هراوات
اللى بتبقى مع عساكر احتلال مصر
الامن الركزى سابقا
او تأجر شويه بلطجيه
زى الشرطه المصريه ما بتعمل
وتخلع انت من الموضوع

mohamed ghalia يقول...

هههههههههههههه
بسيطة ياباشا
نعملك كام إضراب على الماشى
منور
ههههههههههههههههه
هتوحشنى يامان
ههههههههههههههههه

لاسع افندى يقول...

انا عامل اضراب عن التعليق عندك
لغاية ماتيجى تزورنى فى تخاريف بتاعتى

تحياتى

ديالا يقول...

انا مصري وابويا مصري

والي يحل الاضراب يبقي مصري

والي يعقد صفقا يبقي اكيد مصري

بس اقولك بقي معلومه بجد ورنا اجدع ناس المصريين

قولها باعلي صوتك وارفع راسك لفوق

مصر مصر تحيا مصر

(Joudy) يقول...

حمد الله على السلامة ايه الغيبة دى لا وراجع لنا باضراب الناس شكلها بدأت تفهم وتدور على حقها يالا معلش يا بشمهندس جت فيك المرة دى ما انت مصرى يعنى لازم ينوبك من الحب جانب أهم حاجة انك سليم

دمت بكل الخير والسعادة

المهندس يقول...

الصديق / ابو العريف
رغم انها المرة الاولي التي ازور مدونتك ... فهي حازت اعجابي الشديد ... اولا مهندس زي حالاتي - حبة عياط - .... ثانيا مغترب برضه زي حالاتي - حبتين لاء 3 حبات عياط - ... ثالثا .... دمك خفيف - حبة مش عياط - ...
ثانيا : رغم انه في ناس معجبهمش اللي انت عملته ... الا انه انا شايف انك اتصرفت بقمة الذكاء والحنكة " حلوة حنكة دي " ... اللي بيحكم في التعليقات ...ميعرفش انك بالتصرف ده حميت العمال من بلاووووووووووي كتير كانت هتاجي فوق دماغهم لو انت كنت قرفان - مثلا - واتصلت بادارة الشركة او المؤسسة وابلغتهم باللي عملوه العمال
ثالثا : للاسف عارف انه في ناس هتتغاظ من تعليقي ده ... لكن هي دي الحقيقة ... العمال كان كل اللي عاوزين يسمعوه كلمة كويسة ووعد من المهندس - اللي هوه ابو العريف - انه عارف انهم ليهم طلبات ... وانه هيحاول يحققها ليهم ... يعني مكانش اضراب بالمعني المفهوم
رابعا : مرات بيكون البني ادم ليس في ترف الاختيار بين الصح والخطأ ... لانه لا يمتلك هذا الصح ... فيختار بين الخطأ والاقل خطاءا ... فعشان كده شايف انه ابو العريف اتصرف صح 10/10 في الموقف ده
خامسا وسادسا وسابعا : تشرفت بالتعرف عليك ... وياريت تجيب الاخ " ميخو " معاك وتشرفوني في مدونتي المتواضعة ... واهه مناسبة ...نعمل تجمع للسادة المهندسين المغتربين ... ضحايا الازمة العالمية الجديدة .... الله يخرب بيتك يا بوش ... قعدت تعك طول 8 سنين ... وفي الاخر ممشيتش غير لما جبت للعالم كله ازمة شبه وشك العكر
تشرفت بالتعرف عليك يا ابو العريف ... والسلام عليكم

MǿиY El-Shreef يقول...

ههههههههههه

وانت ليش في تعِب حالك مع هندي بنقلاديشي

ههههههه انت بس قولهم هنجيب غيركم كمان 15 يوم وهيسكتم

دول ناس غلابه وكلاتهم بيجروا ع رزق والله

وماشا الله ظني فيك ماخبش حكيم حكيم من يومك ياعمو

هههههههه
ثلام

كــركــبــة دمـــاغ ㋡ يقول...

هههههههههههههههههههههههههه

ايس فيه بابا انت ..

بجد الناس دي غلابه قوي .. وبتتعب قوي ..

وشايلين البلد كلها .. والسعوديين عايشين عــ قفاهم .. وبيعاملهم معاملة حيوانات فعلا ..


واللبس بتاعهم ده عامل زي اهل اليمن ههههههههه ..

وكانوا بيتريقوا عليهم فــ طاش ما طاش لو تعرفه :D:D

وكله كوووووووووم ونظرة الاحتقار والعنطزة دي كوم تاني ..

ودي ممكن كمان يبصوهالك انت كمان يا هندسه ..

شعب تفكيره عقييييييييييم بجد ..

ومحدش فيه بيشتغل بجد ..

عايشين عـ حقول البترول وبس ..


انا شكلي هتمسك بعد التعليق ده ..هههههههههههههه


بس انت دماغك تماااااااام ..

ومن وجهة نظري اتصرفت صح ..

فــ الجون يا ابو العريف ..

ربنا معاك يارب ويكرمك ويوفقك ..

تحياااااتي ليك ..

Sweet Violet يقول...

امممممممم
اعتقد ان الاضراب هيحصل تانى
لان الصفقة اللى انت عملتها مكررة
شوفت التفاؤل بتاعى بشرة خير اهو ^_^
بس هو الطلبات كتبتها بالحبر السرى لييييييييييييه هه
انت وطنى ولا ايه ؟؟

Ahmed يقول...

هههههههه

ايه رأيك ياعم الحاج
انا جايبلك عقد عمل عشان تشتغل في قوات الأمن المركزي تخصص مكافحة الشغب

لو مش عايز قولي, يبقى الأحسن نبعتلك اتنين عساكر أمن مركزي من عندنا يعملولك أحلى واجب مع الجماعه الهنود دول

على أخر الزمن شوية هنود بجيبات وراكبين الفيل وركنينه جنب الباب بره هيتنططوا علينا

عالم حبيب يقول...

تصدق عامل زيي بالضبط

وانا في الموقع العمال بيجوا يقولولي ( دبي ما في فايدة ) أقولهم ايه اللي مقعدكم فيها .. انت سير انديا .. انديا زين .. بس هما ولاد الذين دول فيهم ميزة خطيرة جدا انهم قلوبهم على قلب بعض .. يعني لما بيقرروا يعملوا حاجة بيقرروها مع بعض ولمصلحة بعض .. بعكسنا المصريين ما شاء الله بنقف لبعض على الواحدة

بس هما في الاخر غلابة .. ربنا يعينك عليهم

نوسه وريمان فى هاكونا مطاطا يقول...

انت لسه هنا؟


لا لا تعالى بسرعه عندنا


تيمون وبوبما عايزينك


كل ما تضحك اكتر كل تاكل بطاطا اكتر

هاكونا مطاطا

مش هتقدر تغمض عنيك

هاكونا مطاطا هديتنا لكل المدونين عشان نخرج من حاله النكد

هاكونا مطاطا تهييس للصبح

هاكونا مطاطا ... لااااا للملل


هاكونا مطاطا... قول لاء للهم

هاكونا مطاطا.... اوعى تزعل ابدااا

هاكونا مطاطا... ارمى الماضى ورا ضهرك


انسى الماضى اللى يغيظ


يلاااااااااا تعالى مستنى ايه

Kiara يقول...

ههههههههههههههههههههه ربنا يكون في عونك يبني بعد الاضراب دا هههههههههههههه

بس ماليش دعوه عاوزه اعرف الطلبات كانت اييييييييييه

جحا المصرى يقول...

هههههههههههههههه
ياعمنا بسيطة نعملك كام مظاهرة على كام انقلاب جيت فى جمل يعنى
هههههههههههههههههههههه

MaNoOoSh يقول...

سيبك من الهنود
وتعالى اعترف
اصلي هموووووووووت واعرف مكان النقط اللي بعد (وكل مصري........ عليه)

المهندس يقول...

الصديق / ابو العريف
شوف البوست ده
http://elmohandes2010.blogspot.com/2009/07/blog-post_26.html
عاوزين همتك يا هندسة ... انا داخل بيك تحدي ومتوقع البوست بتاعك هيفضل يضحكنا لمدة اسبوع ...لاء اسبوعين
اتمني اهتمامك ... وتشريفك لمدونتي المتواضعة ... ووضع اقتراحاتك وتحسيناتك ...علي الفكرة
شكرا ... ودمت دائما بخير ...والسلام عليكم

fnoonh يقول...

انت في جرجر كتير وانا مافي افهم هههههههههههه
يعني طلعت انت السبب في الاضراب ده ليه كده
دا الهنود مننا وعلينا بردوا حاول ترضيهم باي شكل
عموما ربنا يعينك يارب
تحياتيييييييييييييييييي
انا صديق اسمة فنونة

حافظة كلامهم بقة قارفينا في كل حته في جدة
احسن حاجة هنا انه كله مصري في مصري حتى الزبال مصري هههههههه

Unknown يقول...

ابووووووالعريف العارف كل حاجة
انا اشتغلت مع الهنود سنتين الصراحة
وما لقيتش منهم اى حاجة وحشة وكمان
افتكرهم بكل خير يمكن تختلف معايا فى
رأيىّ بس بس بس بس بس بس حبيت اسجل
رأيى.أديهم ماهيتهم ,احترمهم,حدد مسئوليهم
تكسبهم تمام.

Unknown يقول...

وكمــــــــــان نقطة للخلاف
انت كاره ليه قناة الجزيرة؟

بـِصَمتـِـ أميرة ــــى يقول...

هههههههههههه
انا مصرى وابويا مصرى وكل مصرى ....

يالله كل اضراب وانت بصحة وسلامة
بس كنت حكيم كتير فى فك الاضراب !!

تقبل مرورى
(ملكة بحجابى )

كائن الإبداع .... محمد يقول...

تعرف لو انا كنت معدي من جنبهم كنت هعمل ايه



كنت هسلم عليهم و اعزمهم على سندوتشين فول و طعميه ، هتلاقيهم و في غضون 5 دقايق في مستشفى العريش علشان يتعالجوا في القر الأذني ( مش العيني علشان دي كذبة )



أما ليه هما عملوا إضراب ، فأنا متأكد أن إضرابهم ده غيظ - يا شماتة أبله ظاظا فيهم - ، غيظ من المصريين ، اشمعنى يعني المصريين يعملوا اضرابات و اعتصامات - و يا ريت حاجة تنفع - و هيصة و زمبليطة ، راحوا هما جايين يعترضوا على القايمة - و هم أطلعوني عليها ، و اللي بتتلخص بنودها في الآتي



1- بلاش .....
2- يا ريت ....و إلا .....
3- الله يخليك ممكن .....
4- لو قلنا أن .... يبقى غصب عن الـ --- تعمل ....
5- لو ما نفذتش هنولع في الحمارة بتاعات المصاريين و نقول لكل الناس و نفاضحكم ان انتوم موش عارفييين تحافوظو على حميركم ؟!



على فكرة انا غلبت عقبال ما ترجمته للهندي



تحياتي ليك


و اتمنى تقبلني صديق للإضراب ... أقصد البرنامج


أخوك الصغير ... كائن الإبداع...... محمد

اسأل الباشا مهندس عليا هيقولك ده واد رخم ..... أوعى تسمع كلامي !