الجمعة، أبريل 03، 2009

ماشربتش من نيلها......... اهداء الي ستوته

اولا
انا بهدي البوست دا للدكتوره ستيته حسب الله الحمش
( اديني برد الهديه اهو يا ستوته )
ونفس ذات الاغنيه.... اغنية العياط واخده بالك
**************
مين فينا ما بيحبش الغنوه دي
انا شخصيا بحبها جداااا وبحس بحاجات غريبه ساعة بسمعها
( وطنيه بقي وحاجات من دي )
بس حد يعرف ان الست شرين اللي شاربه نيلها كله
اول ما جات تولد راحت ولدت في امريكا عشان الواد يطلع معاه الجنسيه
الامريكاويه وبلا نيلها بلا نيلتها
شفتو اد ايه احنا متناقضين بنحب البلد وبنكرهها في نفس ذات اللحظه
انا شخصيا بمووووووووت فيها وادي الدليل
انا عامل دوتو مع شرين برد علي اغنيتها
ياله عيشووووو
******
بلدنا أمانه في ادينا
.
نعليها مدام عايشين
.
نعيش فيها سنين وسنين
.
واحنا مطمنين
**
بلدنا امانه في ايديهم
.
يبيعوا فيها مدام عايشين
.
ينهبوا فيها سنين وسنين
.
طول ما احنا كده ساكتين
****
ماشربتش من نيلها
.
لا دانا شارب من كيعاني
***
جربت تغنيلها
.
دانا بيغني عليا زماني
***
جربت في عز ما تحزن تمشي في شوارعها وتحكيلها
.
جربت لكني لقيتها بجزمه قديمه وجات رزعاني
***
ما مشيتش في ضواحيها
.
م المشي انا ورموا كعابي
***
طاب ماكبرتش فيها
.
دانا عجزت في عز شبابي
***
ولا ليك صوره عالرمله كانت عالشط في موانيها
.
لأ دانا ليه صور وانا واقف في طابور عيش والناس دهساني
***
دور جواك تلقاها
.
هي الصحبه وهي الاهل
.
عشرة بلدي بتبقي
.
نسيانها عالبال مش سهل
.
انا دورت لكني لقيتها
.
بلد الزحمه وعدم الشغل
.
لقمة عيشنا ولا بنلقاها
.
وبق الميه ماهوش بالسهل
***
يمكن ناسي لأنك فيها
.
مش وحشاك ولا غبت عليها
.
بس اللي مجرب وفارقها
.
قال في الدنيا مفيش بعديها
.
لأ مش ناسي انا دايما فاكر
.
في كل حاجه ترتيبها الاخر
.
نفسي في مره تكون كده سابقه
.
والاقي حد ييجي بعديها
***
ان غبت بحنلها
.
و انسي الدنيا واجيلها
.
وان جيت انسي تفكرني
.
بمليون زكري القلب شايلها
.
ان غبت انا متبهدل
.
وسفارتي ولا بتسأل
.
وان جيت ارجع عبارة الموت
.
بلاقيها واقفه تحمل
.
( مانا لو ليه كرامه في بلدي
.
كانت كرامتنا في عيرها هتفضل )
***
غاليه بلدنا علينا
.
وهتفضل في عنينا
.
ومدام بنحب بلدنا
.
يبقي هتتغير بادينا
.
اسعار غاليه علينا
.
وماهيش اد ادينا
.
ومدام الحزب حاكمنا
.
يبقي الفقر هيقضي علينا
.
***
احنا اللي نعليها
.
بادينا نخليها
.
اجمل لينا ولولادنا
.
مهما العمر يعدي علينا
.
طول ما الظلم ماليها
.
وطوارئ كد فيها
.
هنفضل خايفين من ايها
.
ظابط فاهم انه شاريها
********

هناك 48 تعليقًا:

MǿиY El-Shreef يقول...

الله الله الله الللللللللله

بجد ياعمو جبتها من الاااااااااخر

ان غبت انا متبهدل
.
وسفارتي ولا بتسأل
.
وان جيت ارجع عبارة الموت
.
بلاقيها واقفه تحمل

صح صح صح

بجد تسلم ايدك

المفروض ده يتذاع ف التي في

تسلم ايدك ياعمو ياجااااااااامد

بس خد بالك لو اتاخدت انا ماعرفكش :D

بسمة انور يقول...

ههههههههههههههههههههههههه

انا من الاول انا بقولك انت ملكش حل

والله حلوة وبجد ابقى خلى امريكا تنفعها بسلامتها
هههههههه

تسلم دماغك يا اوستاذنا

تحياتى
بسمة

الغربه يقول...

علي فكره يا جماعه الراجل ده مش بس بيكتب ده بيرسم كمان بطريقه جميله جدا وكمان دماعه حلوه في رسم البيوت ده رسم ليه البيت رسمه جميله وما بياخدش فلوس لانه صاحبي ومتربيين مع بعض ربنا يوفقه يا رب في غربته ويرجعه لينا ولأهله بالسلامه

بس خلاص ... يقول...

يا ابو العريف مالك ومال شيرين .. ما تخلينا يابنى عايشين .. عايز تودينا لفين .. ولو ماشربتش من نيلها فيها ايه لو شربت من الذل ازازتين ...ولا من الغلب راقين .... ومالهم بس الامريكين .. ناس عارفه هى رايحه لفين تعرف بقا تقولى انت جاى منين ورايح لفين
اقولك تعالى شوف التاج لسه منزلاه بوست من ساعتين

موجة يقول...

ههههههههههههههههه
جميلة اوى يابو العريف

ستيتة يقول...

اولا البوست تحفة
ثانيا هو انت فاكر اني مش حاسة زيك
بس نعمل ايه لما بنبعد عنها بنحن للماء الملوث والهوا الملوث والأكل الملوث والمرور الملوث

ثالثا طبعا عندنا شيزوفرينيا
ولو معانا فلوس كنا ادينا للعيال اي جنسية خوفا من اللي ها يشفوه بكره

بس بما ان الرسول ياباشمهندس محمد علي باشا الكبير قال أن منا خير أجناد الأرض
ووصى بنا وقال أننا أهل نسب لحبيبنا الرسول الكريم
وبما أن من وعد الآخرة اننا سنقتل اليهود ولو خلف شجر أو حجر
وبما ان انا بموت في الأمل والتفاؤل
وان شاء الله ها يخرج من ذريتي اللي يحقق الوعد ويحرر الأرض

فأهدي لك "مشربتش من طينها .. يووووووه سوري
مشربتش من نيلها؟
سيبك من أمريكها
امريكا دي زايلة ياليلي يا عيني زي روسيتها



ومتنساش انك اللي حاطط جاهين مش انا


أنا مصر عندي أحب وأجمل الأشياء

باحبها وهي مالكه الأرض شرق وغرب

وباحبها وهي مرميه جريحة حرب

باحبها بعنف وبرقة وعلى استحياء

واكرهها وألعن أبوها بعشق زي الداء

واسيبها واطفش في درب وتبقى هي ف درب

وتلتفت تلقيني جنبها في الكرب

والنبض ينفض عروقي بألف نغمة وضرب



وبرضه شعرك تحفة وعسل وانت فعلا فنان موهوب
وياما فيكي رجالة يامصر زي الفل
بيشربوا


لأ يا معلم من نيلها مش من كيعانهم

القدر و انا يقول...

ابو العريف
يسلم دماغك
فسرت كل مقطع فى الاغنية بجد
بس نسيت اننا احسن شعب يغنى
واكثر شعب يصفق ويهلل
منك لله
كنت باحب اسمعها قوى
دلوقت حاحس بمرارتها قوى قوى
تحياتى

منــار فايد يقول...

فظيعه
تسلم الايادي
ابعتها لشيرين بقى على الايميل

ههههههههههههه
الفكره جميله اوي على فكره

(Joudy) يقول...

ايه ده ياعينى عليك كل ده فى قلبك وساكت شايله لوحدك بجد صعبت عليا وصعب عليا حالنا ده أترينى كنت نايمة ومش حاسهده الظاهر اننا فى غيبوبةومش واخدين بالنا الظاهر اننا اتعودنا اننا نتسرق وكمان عينى عينك أما ياسيدى من حيث نيلها ولله الحمد من خيره ولادنا أصبح عندهم التهاب كبدى من الشرب وأدينا بنجرى علشان نعالج وربنا يستر علينا

S H A H يقول...

كلام في الجون بجد

رحلتنا في الحياة يقول...

هههههههههه كنت طيب هتودعنا قريب ليه كده ولا يعنى فاكر انك برة مصر مش هتتجاب
معلش الاحوال فعلا فى البلد بقيت صعبة جدا بس ان شاء الله هتتغير بينا مسعتش المقولة اللى بتقول بلدنا بتتغير بينا

مسدس صغير يقول...

ههههههههههههههههههههه
ههههههههههههههههههههه

بوست اكتر من رائع
دور جواك تلقاها
.
هي الصحبه وهي الاهل
.
عشرة بلدي بتبقي
.
نسيانها عالبال مش سهل
.
انا دورت لكني لقيتها
.
بلد الزحمه وعدم الشغل
.
لقمة عيشنا ولا بنلقاها
.
وبق الميه ماهوش بالسهل..
........

مش بقولك انت رائع

احييك على البوست الجميل

عاشقه الرومانسيه يقول...

جميل البوست
تسلم ايدك
اوعى شيرين تعرف بيه
بعدين تجيب لها اكتئاب وتعتزل
هههههههههههههه

فتاه حالمه يقول...

ههههههههههههههههههههه
لا حول ولا قوه الا بالله
ليه كدا بس هو احنا متحملين اصلا
خلينا ساكتين
كدا تقلب علينا المواجع الله يسامح حضرتك
بس بوست تحفه بجد
مودتي

إيمان يقول...

جربت في عز ما تحزن تمشي في شوارعها وتحكيلها
.
جربت لكني لقيتها بجزمه قديمه وجات رزعاني
***

هههههههههههههههههههه
ههههههههههههه
يا حبيبتى يا مصر يامصر
ضرب الحبيب زى أكل الزبيب الإيرانى ولا أيه

نظره عين يقول...

حلوه اوى يابو العريف ياريت بقى حد يسمعنا ويفهم اد ايه احنا متبهدلين ومظلومين
عاوزه اشوفك دايما بتعمل كل الجديد ربنا يكرمك يارب سلامى ليك وتحياتى للست شرين

نظره عين يقول...

ابقى زورنى ابو العريف فى مدونتى نظره عين

fnoonh يقول...

رائع رائع رائع رائع

حقيقي كلام جامد بس ربنا يسترها معاك للحكومة تقبض عليك ولا حاجة

لا بجد جميل تسلم ايدك

انا ماهطولش ليخدوني معاك

ههههههههههههههههههه

يلا تقبل تحياتي وتقديري

Unknown يقول...

حلو الدويتو دة
حقيقى اوى
سلام

م/ الحسيني لزومي يقول...

ابو العريف
انت ممكن تضرب عن الطعام احتجاجا علي سلبيتنا وخنوعنا.

0

د. ياسر عمر عبد الفتاح يقول...

هههههههههههههههههههه
هيه دى الوطنية ولا بلاش
أنا أحييك بشدة
وأربت على كتفك
وأبوس على إيدك
لو مسكوك متفلهومش عليا

بـِصَمتـِـ أميرة ــــى يقول...

ههههههه
الله عليك ياريس
واجابات رد اسئلة شيرين كانت فى الصميم
وجووون وجوووون وجووووون

ههههههههههههه
اعتقد انها نفس اجابتنا بالاجماع ولو عملت ورقة بالاجابات هرفع ايدى واستئذنك ابقى من حزب الموافقة واوقع عليها
برافو بجد
تحياتى
تقبل مرورى
ملكة بحجابى

شاب كــ طخين ـــــا يقول...

تسلم ايدك يجد
انتا جيبت من الاخر
بوست جميل اوى

نـــــور يقول...

ياواد انت ياجامد :)

ايه الحلاوة دى بجد
جامده جامده ياابو العريف خصوصا دى
اسعار غاليه علينا
.
وماهيش اد ادينا
.
ومدام الحزب حاكمنا
.
يبقي الفقر هيقضي علينا

بجد عسل :)

MaNoOoSh يقول...

ماشى يابو العريف
مهى ناقصة حساسية وهرش اصلها
ادينى شربت من نيلها اهو وقاعدة اهرش
عاااااااااااااااااااااااااا
ربنا ينتقم من اللى كانت السبب

maha zein يقول...

لا اله الا الله
انا في ايه بالظبط
هو البوست ده منشور بقاله شوية
انا شكل مدونتي باظت
الريدر بيدخلني علي الموضوع القديم
حتي هتلاقيني معلقة فيه اني
منك لشرين يا شيخ
ده انت من ساعة ما اهدتني البوست بتاع التاج والنت فصل ومدونتي اتخربت ومش عارفة اعمل اي حاجة وعملت ابديت للموزيلا فاير فوكس وشغلت الانترنت اكسبلورر ومش راضي يتصلح
وصلتلك كدة بأعجوبة

اقول ايه

بس عارف وانت بترد علي شيرين في الحتة بتاعت عبارة الموت والحجات دي والسفارة اللى بيعاكم
صعب عليا كل واحد متغرب
ربنا يرجعكم بالسلامة
بجد ردودك وهمية علي الست شيرين

محمد عتلم يقول...

اجهز العيش والحلاوه ؟؟

القمر الساهر يقول...

هو انا المفروض اضحك ولا ابكي

بجد جامدة موووت

بس مرة قوي قوي


بس تفااااااااااااااااااااااااااااااااائلوا

اضحكوا على نفسكم شوية

توبيك هايل

maiosha يقول...

ابو العريييييييييييف

ياغينى عليك ده إنت لسه صغير وفى عز شبابك
اقابلك بقى فى مارينا وعليك بخير

كان بدرى عليك والله

بس متقلقش هبقى اجيبلك عيش وحلاوة

يا عينى عليك يا خووووووووووويا

(Joudy) يقول...

انت فين مش باين غبت يوم عن المدونة ياترى انت بخير يارب تكون بأحسن حال وبلاش تقلقنا عليك يارب يكون المانع خير

فتــافيت (رحاب الخضري) يقول...

باظت الاغنية
هئ هئ هئ
اصلا شرين كان قصدها نهر المسيسبي مش نهر النيل
بس احنا اخطلت علينا الامر
بس كلامك حلو جااااوي بجد
هو انت عايش فين في الكرة الارضية؟؟
اصل اتصالات كيكو تبقى برا طابور العيش تبقى جوا
ارسى بقى على مكان علشان ما تستهواش ويجيلك برد

maha zein يقول...

يا جماعة حد يغيتني
انا مدونتي باظت ولا ايه
مش عارفة اكتب اي بوست
لما بفتحه بالفاير فوكس يقولي مش نافع ونوت سكيور وحجات كده
ولما افتحة بالاكسبلورر يقولي ايرور ومش راضي يحفظ البوست
اعمل ايه انا بقه
مدونتي باظت يعني ولا ايه
ما تشوف صرفة يا حج
عملي مهندس ومتغرب بس علي الفاضي

منه لله التاج المهبب
كنت لسة هحله راح الدنيا باظت

انت مش راضي عنه صدقني

يا ريت لو تعرف اعمل ايه تقولي
ولا تسأل حد يعرف
هم ايه ده

غير معرف يقول...

ههههههههههههه
ههههههههههههههه

بجد بجد تووووووووووحفة

كراكيب يقول...

الله الله الله
ياريت يا عمو تسجل الاغنية دي علشان عايزة اعملها داون لود واحطها نغمة موبايلي وكمان كول تون وايييه احطها على البلوج علشان اول ماحد يفتح البلوج تشتغل علطول
ياااااااه حضرتك كنت فين من زمان ده دويتو هايل ماشاء الله
ربنا يخليلنا فنك يا فنان
وحسبي الله ونعم الوكيل
قلبي معاكي يا شيري
:)

miro el niro kwaniro

أبو العريف يقول...

MǿиY El-Shreef
توتا
ايه النداله دي
تبيعي عمك كده
من اول قلمين
طاب انا بقي هعترف عليكي
واول اني عمك
شكراااااااااا



بسمة انور*

ههههههههههه
حلوه بسلامتها دي
انت بتتكلمي علي واحده صاحبتك
ولا جارتكم اللي مطلعه عينك
شكرا يا بسمه
نورتيني


الغربه
ماشي يا عم محمد
اعملي دعايه
بس لازم تقول ببلاش دي
كله هييقولي اشمعني محمد
روح يا شيخ
وتعالي تسرعه


بس خلاص ...
ايه دا بقي
راقين
وازازتين
ولفين
وساعتين
انت مين يا بس خلاص
حلوه اوي ارتجالك
نورتيني


موجة

شكرا يا موجه
انت اجمل

أبو العريف يقول...

ستيته حسب الله الحمش

ايه دا يا ستوته
انت صدقتي ولا ايه
دانا بهزر مع البلد
بلدي وبهزر معاها

شقاوة شعب يا فندم
وبعدسين انت السبب
انت اللي اهديتيني
اغنية العياط بتاعة السعوديه
وبيني وبينك انا ما صدقت
طيب علي فكره انا كاتب حاجه مختلفه خالص عن دي
وبرضه ما شربتش من نيلها
اجيبها المره الجايه

أبو العريف يقول...

القدر و انا

لا يا ستي ما تزعليش والله انا بحبها جدا
بس بهزر
ايه واحد بيهزر مع مصر حد عنده اعتراض


شباك موارب

ابعتها لشرين
دي حفيانه ورايا عشان تاخدها وانا مش راضي
اقل من عمر الشريف يغنيها مش موافق
ليه هو احنا بنلعب


S H A H

باشا متشكر جدا
مدونتك جامده جدا
وتحيا مصر ياعم


ايوشة

ايه دا بقي
انت جايه تهدي النفوس

طبعا بلدنا بتتغير بيهم
هو حد يقدر يقول حاجه
بس معرفش هي بتتغير للأسوأ
ولا للأسوأ

أبو العريف يقول...

(Joudy)

مايصعبش عليكي غالي
دانتي اللي صعبانه علي
انت اللي عماله تشربي من نيلها
انا بقي
بشرب من البحر الاحمرها

متشكر علي سؤالك علي
وما تقلقيش يا باشا
سلميلي علي محمد

أبو العريف يقول...

مسدس صغير

اوعي حد يضرب نار
نورتني يا عم الحج
وشكراااعلي رأيك


عاشقه الرومانسيه

ماتعرف
يارب تعتزل
اهو ابقي عملت حاجه عدله في دنيتي



فتاه حالمه

شكرايا باشا
نورتيني
ماتزعليش ياست
انا مش بقلب المواجع ولا حاجه
انا بس بهزر


إيمان
فعلا ضرب الحبيب زي اكل الزبيب
بس انا مش بحب الزبيب


نظره عين

مبروك يا aliaa
المدونه الجديده
ربنا يوفقك
يالا ورينا الجديد
مستنيين

أبو العريف يقول...

fnoonh

ما تخافيش يا افنان
هو انت مروحه مصر امتي
عشان ابلغ عنك


enjy

شكرااااااا
نورتيني


م/ الحسيني لزومي

ماشي ياهندسه
بس انا كده الخسران
زي ما بيقولوا
هكسر كوع مين
حد فاهم حاجه


د. ياسر عمر عبد الفتاح
ماشي يا دكتور
مش هقول عليك
بس ممكن تديني عنوانك بس
عشان دقة المعلومات


ملكة بحجابى
متشكر يا ملكه
وانا كنت متأكد من الاجماع ده



أمبارح كان عمرى عشرين!!!
شكرا يا باشا
انت الاجمل
نورتني

أبو العريف يقول...

نـــــــــــــور

عجبتك قوي الحته بتاعة الاسعار
ايه الناس دي
انت مافيش في دماغك الا الفلوس
اه يا ماديه

ميرام يقول...

ههههههههه
لا دويتو ممتاز (:
فعلا فعلا يعني ..
ومش عارفه ليه هموت واقولك
اسكت ياابني ...!!

بانتظار جديدك
تحيــــــاتي

aidy يقول...

الله الله

كلماتك بترد على الاغنية وبتضحكنى وبتبكينى فى نفس الوقت

بس على الرغم من كلامك وكلام شيرين

بس كلنا بنحبها ...........

تحياتى ليك ,,

king of shy يقول...

سورى انى اتأخرت فى التعليق بس غصب عنى الدراسة وكده المهم البوست بتاعك هايل بجد عبرت فيه عن المساوئ اللى بنعشها بس بطريقة لذيذة فكرة التركيب على الأغانى قديمة انما طريقتك مختلفة طبعا دى مش مجاملة دى حقيقة.

ملحوظة:
لو اتأخرت تانى فى التعليق هكون حريص ان Joudy تنقلك سلامى دمت بكل خير

Asmaa Fathi يقول...

البوست هايل لو هتكلم عن معناه
بس انت ليه مش شايف غير النص الفاضى من الكوب
مصر مش سفارة ولاحزب ولاحكومة
مصر بلد وناس وتراب ونيل واهرامات وحجات تانية كتير
انا لا بتفلسف ولا حد عبيط مش عايش فى مصر انا معاك ان كل اللى قولته واقع احنا عيشينه بس مينفعش نقول انا اهلك اللى هما ثروتك ناس مصريين وان اقرب وافضل اصحابك مصريين وانك اتعلمت وكبرت فيها كل ده وحتى حاجه واحده تخليك تخلع النضاره السوده اللى شايف بيها مصر
على فكره انا مفيش فى بقى معلقة دهب ولا حاجه ولا دنيتى وردى ومتبهدله زى غيرى كتير بس بحب مصر وشيفاها افضل بلد فى العالم عيبها عيب حكومه مش اكتر

اسفه على الاطاله تحياتى

كله في الكلتش يقول...

موضوعك اكثر من رائع

ودة الكلام اللى قلناه زمااااااان
التناقض فى كل مكان وفى نفس الانسان
لازم نتغلب على التناقض اللى جوانا
علشان نرتقى
وما يأتى الارتقاء بالوطن
الا بالارتقاء بشخصيات الافراد
والاسر والاقاليم ثم بكامل الوطن
ولن يأتى الارتقاء الا بأقلام راقية
تنقد لكى نتعلم منها مثل قلمك

رامى عيسى

maha zein يقول...

كده تفضحني يا حاج
شكرا

Ramy Wasel يقول...

سبحان الله

توافق تفكير والله

بس انت كاتبها بشعر ممتاز

واحنا يا عم على ادنا
يا دوب شوي تحليل

يعنى فى كبايه

مواضيع ممتازه
وسأتابعك دائما باذ الله
واسمحلى اضفك فى المدونات عندى
علشان اتابعك دايما